बुटवल– प्रदेश ५ को प्रदेशसभाको हिउँदे अधिवेसन भोलि (बुधबार) देखि सुरु हुँदैछ। दिउँसो १ बजे सुरु हुने अधिवेसन कानुन निर्माणमा केन्द्रित हुने बताइएको छ।
सरकारले प्रदेशसभालाई ‘बिजनेस’ दिनका लागि १५ भन्दा बढी विधेयक स्वीकृत गरिसकेको छ भने ४ वटा विधेयक प्रदेशसभामा दर्ता गराइसकेको छ। ‘यो अधिवेशन विधेयक अधिवेसन हुनेछ, हामी कानुन निर्माणमा केन्द्रित हुँदैछौं,’ प्रदेश सरकारका प्रवक्ता वैजनाथ चौधरीले भने।
प्रदेशसभा सचिवालयले जारी गरेको सम्भावित कार्यसूचीअनुसार १ बजे बैठक सुरु भएलगत्तै प्रदेश प्रमुख उमाकान्त झाबाट प्राप्त प्रदेशसभाको अधिवेसन आह्वान भएको पत्र सभामुख पूर्णबहादुर घर्तीले सुनाउने छन्।
सभामुख घर्तीले दोश्रो अधिवेसनबाट पारित भई प्रदेश प्रमुखबाट प्रमाणीकरण भएका विधेयक सम्बन्धी पत्रहरु पढेर सुनाउने छन्। त्यसपछि दलको तर्फबाट प्रदेशसभा सदस्यहरुले बोल्नेछन्।
बुधबार नै प्रदेशसभामा दुई वटा विधेयक पेस हुने सम्भावित कार्यसूची छ। बैठकमा प्रदेश ५ जाँचबुझ आयोगको गठन तथा काम, कर्तव्य र अधिकारको सम्बन्धमा व्यवस्था गर्न बनेको विधेयक र प्रदेश ५ संघसंस्थाहरुको दर्ता सम्बन्धमा व्यवस्था गर्न बनेको विधेयक पेस हुने प्रदेशसभा सचिवालयका सचिव दुर्लभकुमार पुन मगरले जानकारी दिए।
यस्तै, बैठकमा विशेषाधिकार समितिका सभापति र प्रदेश ५ को नामाकरण र स्थायी राजधानी सम्बन्धी विशेष समितिका संयोजक चयन गरेकोबारे सभामुखले सभालाई जानकारी गराउनेछन्।
बैठकमा प्रदेश ५ को नामाकरण र स्थायी राजधानी सम्बन्धी विशेष समितिको प्रतिवेदन बुझाउने समय थप गरिएको सभामुख घर्तीले सभालाई जानकारी गराउनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
