काठमाडाैं- परराष्ट्रमन्त्री प्रदीप ज्ञवालीले नेपाल बहुपक्षीय राष्ट्रहरूको संगठनका पक्षमा रहेको बताएका छन्। मन्त्री ज्ञवालीले विद्यमान विश्व व्यवस्था धर्मराउन थाल्दा र नयाँ व्यवस्थाको अभावमा नेपाल जस्ता देशलाई अप्ठेरो महशुस भएको बताए।
हालको विश्व व्यवस्थामा रहेका केही देशले विश्व व्यपार संगठन, पेरिस मौसम परिर्वतन, संयुक्त राष्ट्रसंघ मानव अधिकार आयोगजस्ता बहुपक्षीय संगठनबाट आफ्नो पूर्ववत सहमतिलाई पटक–पटक उल्ट्याउँदा विश्व व्यवस्थामा नै समस्या आउन सक्ने खतरा रहेको दाबी गरे।
परराष्ट्र मन्त्रालयको वार्षिक प्रतिवेदन सार्वजनिक कार्यक्रममा बोल्दै मन्त्री ज्ञवालीले नेपालको मौलिक किसिमको शान्ति प्रक्रियाका विषयमा विश्वलाई बताउनुपर्ने आवश्यकता औंल्याए। नेपालको परिचय विश्वमाझ गराउँदा सगरमाथा र बुद्ध जन्मभूमिका अलावा नेपालको मौलिक शान्ति प्रक्रियाका विषयमा पनि अवगत गराउनु पर्ने धारणा राखे।
एक दशकसम्म नेपालमा चलेको द्वन्द्वको अन्त्य मौलिक ढङ्गको शान्ति प्रक्रियाबाट भएको बताउँदै मन्त्री ज्ञवालीले शान्ति प्रक्रियामा नेपालले प्राप्त गरेको सफलता अन्य देशका लागि पनि सहयोगी हुनसक्ने बताए। ‘हाम्रो शान्ति प्रक्रिया विश्वका लागि शान्ति कायम गर्ने उदाहरण हुन सक्छ’, मन्त्री ज्ञवालीले भने, ‘त्यसैले नेपालले विश्वमाझ गौतम बुद्धको देश र सगरमाथाको देश मात्रै भनेर होइन, शान्ति प्रक्रियाको अनुभवका माध्यमबाट पनि परिचित हुनुपर्छ। सरकार त्यही दिशामा उन्मुख छ।’
पछिल्लो समय प्रधानमन्त्री केपी शर्मा ओलीले अन्तर्राष्ट्रिय मञ्चहरूमा नेपालको शान्ति प्रक्रियामा हासिल गरेको सफलतालाई प्रथमिकताका साथ प्रस्तुत गर्ने गरेका छन्।
नेपालको परराष्ट्र नीतिमा छिमेक नीति महत्वपूर्ण भएको बताउँदै मन्त्री ज्ञवालीले सबैसँग मित्रवत सम्बन्ध स्थापना गर्दै कसैसँग पनि दुश्मनी नसाँध्ने नै नेपालको परराष्ट्र नीतिको आधार भएको जिकिर गरे। अर्को देशको आन्तरिक मामिलामा हस्तक्षेप नगर्ने नीतिलाई अंगिकार गर्दै एकअर्काको सार्वभौमसत्तालाई सम्मान गर्ने विषयमा नेपालको सधैँ जोड रहेको उनले बताए।
‘भौगोलिक हिसाबमा देशहरू साना–ठूला भए पनि समानताका आधारमा सबै देश बराबरी रहेका छन्’, मन्त्री ज्ञवालीले भने, ‘हामी समानताका आधारमा परराष्ट्र नीति अघि बढोस् भन्ने चाहन्छौँ।’ नेपालले अरूको सुरक्षा चासोलाई सम्बोधन गर्ने बताउँदै नेपालको चासो पनि अरु देशले बुझ्नु पर्ने उनले तर्क गरे।
मंगलबार सार्वजनिक भएको परराष्ट्र मन्त्रालयको वार्षिक प्रतिवेदनमा नेपालको आगामी दिनको परराष्ट्र नीतिका विषयमा चर्चा गरिएको छ। प्रतिवेदनमा नेपालले छिमेकी देशसँग कस्तो सम्बन्ध स्थापना गर्ने, दात्री निकायसँग कस्तो सम्बन्ध स्थापना गर्ने, आर्थिक कूटनीति सञ्चालनमा सरकारको प्राथमिकता, विदेशमा रहेका नेपाली प्रवासीसँगको सम्बन्ध जस्ता विषय समेटिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
