काठमाडौं– नेपाली कांग्रेसले देशलाई तीव्र विकासको गतिमा लैजान सक्ने क्षमता प्रधानमन्त्रीमा नदेखिएको बताएको छ।
नेपाली कांग्रेस केन्द्रीय कार्यसमिति बैठकमा आइतबार प्रस्तुत भएको राजनीतिक प्रस्ताव मस्यौदामा विगतका प्रधानमन्त्रीहरुलाई भन्दा वर्तमान प्रधानमन्त्रीलाई सहज राजनीतिक वातावरण प्राप्त भए पनि कुशल राजनीतिक क्षमता नदेखिएको आरोप लगाएको छ।
'तुलनात्मक रुपले सहज राजनैतिक वातावरणको सदुपयोग गरेर देशलाई तीव्रतर विकासको गतिमा लैजान सक्ने कुशल शासकीय क्षमता र नेतृत्व उहाँमा देखिएको छैन', मस्यौदामा भनिएको छ।
सर्वत्र अनुभूत गरिएको अधिनायकवादको आशंकालाई खण्डित गर्नेभन्दा सरकारको शैली र व्यवहारले यसलाई पुष्टि गर्ने वस्तुगत आधार प्रदान गरेको मस्यौदामा उल्लेख छ।
त्यसका लागि उसले पाँच वटा आधार व्यक्त गरेको छ– संघीयताप्रति उदासिनता, संविधानप्रति अपनत्व विस्तारमा अवरोध, प्रधानमन्त्री कार्यालयमा शक्ति केन्द्रीकरण, विरोधी स्वर नियन्त्रणको प्रयत्न, सञ्चार माध्यम र अभिव्यक्ति स्वतन्त्रतामा हस्तक्षेप।
एसिया प्यासिफिक समिटमा सरकारको भूमिकाले उसको दिशाहीन शैली र चरित्र छर्लंग हुनपुगेको बताएको छ।
'केही दिन पहिले मात्र अत्यन्त विवादास्पद, एक विदेशी गैरसरकारी संस्थाको सम्मेलनमा स्वयम् सरकार सहआयोजक हुनु, पदीय मर्यादालाई तिलाञ्जली दिँदै प्रधानमन्त्री तीन दिनसम्म होटलमा आयोजकहरुसँग बस्न जानु, कार्यक्रमका लागि सम्पूर्ण सरकारी र नेकपाको संयन्त्रलाई परिचालित गर्नु, राज्यकोषबाट आर्थिक सहयोग गर्नु र अन्तमा प्रधानमन्त्री स्वयले पुरस्कार राशी ग्रहण गर्नु र आशीर्वादका नाममा कुनै एक धर्मप्रचारकलाई महत्व दिनुले यो सरकार दिशाहीन शैली र चरित्र छर्लंग हुनपुगेको छ', प्रतिवेदनमा भनिएको छ।
सरकार निर्लज्जतापूर्वक स्वतन्त्र अभिव्यक्तिलाई नियन्त्रण गर्ने काम गरिरहेको आरोप पनि लगाइएको छ।
'सरकार गठन भएको घडीदेखि नै अभिव्यक्ति तथा प्रेस स्वतन्त्रतालाई संकुचित गर्ने अवाञ्छित उद्देश्यले विद्यमान कानुनको दुरुपयोग तथा अपव्याख्या गरी स्वतन्त्र प्रेस माथि आक्रमण गर्ने क्रम जारी छ', उल्लेख छ।
कांग्रेसको राजनीतिक प्रस्ताव मस्यौदामा एमाले र माओवादीको एकतालाई पनि रुचाइएको छैन। 'सत्ता प्राप्तिका लागि एक हुने, सिद्धान्तको आवरण विस्तारै गाँस्दै जाने र जे-जस्तो उँट बन्ला त्यसलाई आजको माक्र्सवादको विल्ला भिराइदिने, यो रणनीतिले चुनावी सफलता त मिल्यो, तर यसको दुष्परिणाम र द्विविधाले सरकारको गतिलाई गहिरोसँग प्रभाव र दबाबमा राखेको स्पष्ट देखिन्छ', मस्यौदामा भनिएको छ।
कांग्रेसकाे प्रस्तावित राजनीतिक प्रतिवेदन:
याे पनि पढ्नुस्:
कांग्रेसको आरोप– कम्युनिस्ट सरकारको बाटो : निषेध र नियन्त्रणको पासो [अार्थिक प्रतिवेदनसहित]
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768395492.png)
-1768391713.png)
-1764146706.png)
