काठमाडौं– सरकारले पुस १ गतेबाट कम्पनी मोडलमा पञ्जीकृत नभर्इ सञ्चालनमा रहेका सवारी साधनको रुट परमिट खारेज गर्ने भएको छ।
यातायात व्यवस्था विभागले सार्वजनिक यातायात सञ्चालनमा ४० वर्ष देखि जरो गाड्दै आएको ‘सिन्डिकेट’ अन्त्यका लागि कम्पनी मोडलमा दर्ता गरी पञ्जीकृत भएका सवारी साधनलाई मात्रै सवारी सञ्चालन गर्ने दिने भएको हो।
यातायात व्यवस्था विभाग प्रवक्ता गोकर्णप्रसाद उपाध्यायले विभागले पुस १ गतेबाट कम्पनी मोडलमा दर्ता भर्इ पञ्जीकृत भएका सवारी मात्रै सञ्चालन गर्न दिइने बताए।
कम्पनी मोडलमा नगई विभिन्न नामका यातायात समितिका रुपमा सञ्चालन भएका सवारीलाई मात्रै रोक लगाउने गरी सम्पूर्ण तयारी भएको उनको भनाइ छ।
विभागले कम्पनी मोडलमा दर्ता भर्इ पञ्जीकृत भएका सवारी साधन सञ्चालनका लागि आवश्यक ‘प्राइमरी रुट’ अध्ययन पनि गरिसकेको उनको दाबी छ। तर, ‘सेकेन्डरी’ (मझौला सवारी सञ्चालन हुने) रुट र स–सना गल्लीभित्र चल्ने रुटको विषयमा पनि अध्यनन भइसकेको उनले स्पष्ट पारे।
विभागले यसै साताभित्र देशभरीका सवारी रुट अध्ययन गर्दै आवश्यक सवारी संख्या निर्धारण गर्न नसेकपनि शहरी क्षेत्रको रुट अध्ययनको काम अन्त्य गर्दै कार्यान्वयनमा ल्याउने जनाएको छ।
व्यवसायीले भने सरकारसँग ‘यातायात व्यवस्थापन कार्यविधि, २०६०’ को संसोधन २०७४ मा उल्लेख भएका केही कुरा परिमार्जन गर्नुपर्ने माग गर्दै कम्पनी मोडलमा जान आनकानी गर्दै आएका छन्।
नेपाल राष्ट्रिय यातायात व्यवसायी महासंघका महासचिव सरोज सिटौलाले कम्पनी मोडलमा जाँदा हरेक कम्पनीमा सवारीको संख्या असिमित हुनेपर्ने बताए। सरकारले जारी गरेको कार्यविधिमा एउटा कम्पनीमा १ सयभन्दा बढी सवारी हुन नहुने उल्लेख छ।
महासंघले आगामी मंसिर २७ गते केन्द्रीय समितिको बैठकमार्फत ‘कसरी नियम पालन गर्न सकिन्छ?’ भन्ने विषयमा निर्णय गर्ने जनाएको छ।
तर, विभागले भने मंसिर मसान्तसम्ममा समितिमा दर्ता भएका सवारी साधनलाई कम्पनी मोडलमा जाँदै विभागमा पञ्जीकृत गराएर रुट इजाजत नवीकरण गर्न सूचनासमेत प्रकाशन गरेको छ। ‘सरकारले पुस १ गतेबाट समितिको नामबाट रुट परमिट लिँदै सवारी सञ्चालन गर्नेलाई पूर्णरुपमा बन्देज गर्छ’, उपाध्याले भने, ‘कम्पनी मोडलमा दर्ता हुँदै विभागमा पञ्जीकृत भई रुट इजाजत लिएका सवारी मात्रै सञ्चालन गर्न दिन्छौं।’
नियम पालना नगरी सवारी चलाएको भेटिएमा ठाउँको–ठाउँ नै सवारी कब्जामा लिर्इ कारबाही गरिने विभागले स्पष्ट पारेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
