काठमाडौं– नेपाल कम्युनिस्ट पार्टी (नेकपा)का अध्यक्ष पुष्पकमल दाहाल प्रचण्डले जनताका पकडमै नआउने अमूर्त नाराको कुरा गरेर मात्रै विकास नहुने बताए।
'के हो समृद्धि? कहाँबाट आउँछ समृद्धि? के हो सुखी नेपाली? कहाँबाट आउँछ सुखी नेपाली? भन्ने कुरा योजना र कार्यक्रममा ढालिएन भने, अभियानमा ढालिएन भने, साँस्कृतिक आन्दोलनको रुप दिएर जनतालाई उत्सव जस्तो गरी विकासतिर लैजान सकिएन भने विकास हुँदैन', प्रचण्डले भने।
उनले भइरहेकै ब्युरोक्रेसी र राज्य संरचनाबाट हामी कम्युनिस्टहरुले देखेजस्तो विकास अभियान नचढ्ने ठोकुवा पनि गरे।
खुसीराम पाख्रिनको स्मृति दिवसको अवसरमा आयोजित सांस्कृतिक कार्यक्रममा बोल्दै प्रचण्डले कम्युनिस्टहरुले विकासको कुरालाई अभियान र जनताको उत्सवको रुपमा मनाउने वातावरण बनाउनुपर्नेमा जोड दिए।
प्रचण्डले आफूहरुले जनताको अगाडि गरेको कबुललाई जनताले भरोसा गरेकाले आफूहरु सत्तामा भएको बताए। 'यो ठाउँबाट अगाडि जाने कुरामा हामीले सुखी नेपाली र समृद्ध नेपाल तथा समाजवादको सपना बाँडेका छौं। तर सपनाहरु यदि अभियान, पहलकदमी, कार्यक्रम र सांस्कृतिक आन्दोलनसँग जोडिएनन् भने ती सपनाहरु दुस्वप्न हुनपुग्छन्। त्यसले समाज र राष्ट्रमा केही नयाँ चिज दिने हैसियत राख्दैन', उनले भने।
प्रचण्डले मनमोहन अधिकारी सरकारले सुरु गरेको वृद्धभत्ता र आफ्नो गाउँ आफैं बनाऔं भन्ने कार्यक्रम सम्झिनुपर्ने अवस्था रहेको बताए।
धेरै संघर्ष र बलिदानबाट आफूहरु यो बिन्दुमा आइपुगेको प्रचण्डले बताए। तर चुचुरामा पुगेर अझै माथि जाने कि खस्ने आफैंमा निर्भर रहने उनले बताए। 'चुचुरामा पुग्न मेहनत गरेको थियो भने तल खस्नेलाई कसैले पनि साथ दिँदैन', उनले भने।
प्रचण्डले जनतालाई चेतना फैलाउने काम अभियानको रुपमा सञ्चालन गरेकैले आफूहरु अहिलेको बिन्दुमा आइपुगेको बताए। 'प्रत्येक काम अभियानको रुपमा गर्यौं। घिसिपिटे रुपमा होइन। हामीले गुणात्मकताको साथ एउटा युद्धको रुपमा गरेर यहाँ आइपुगेको हो', प्रचण्डले भने, 'कताकता आज त्यो प्रवृत्ति भुत्ते भएको हो कि! हामी अभियानमा जान छोडेको हो कि!'
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।