काठमाडौं– राष्ट्रिय ध्वजाबाहक नेपाल एयरलाइन्सले वाइडबडी जहाजमार्फत उडान थालेसँगै बजार हिस्सा बढाउन सफल भएको छ।
वाइबडी उडान थालेको केही महिनामै त्रिभुवन अन्तर्राष्ट्रिय विमानस्थल हुँदै अन्तर्राष्ट्रिय हवाइ सेवा दिने एयरलाइन्स कम्पनीमध्ये नेपाल एयरलाइन्स बढी यात्रु बोक्न समेत सफल भएको छ। अहिले त्रिभुवन अन्तर्राष्ट्रिय विमानस्थल हुँदै ३१ वटा विमान कम्पनीले अन्तर्राष्ट्रिय सेवा दिँदै आएका छन्।
सन् २०१७ को अगस्ट, सेप्टेम्बर र अक्टोबरमा नेपाल एयरलाइन्सको बजार हिस्सा सरदर ९ प्रतिशत मात्रै थियो। तर, यो बजार हिस्सा अहिले बढेर १३ प्रतिशतभन्दा माथि पुगेको छ।
नेपाल एयरलाइन्सले ९ प्रतिशत रहेको बजार हिस्सा दुई वटा वाइडबडी जहाज फुल फेजमा सञ्चालन गर्दै १७ प्रतिशत पुर्याउने लक्ष्य लिएको छ।
‘वाइडबडी जहाजमार्फत उडान थालेसँगै सन् २०१८ को अगष्ट, सेप्टेम्बर र अक्टोबर महिनामा सबैभन्दा बढी यात्रु बोक्न सफल भएका छौं’, निगमका प्रवक्ता अशोक सिग्देलले भने, ‘तीन महिनामै हामीले एक लाख ४२ हजार ४ सय ६ यात्रुलाई अन्तर्राष्ट्रिय हवाइ सेवा प्रदान गर्न सफल भएका छौं।’
यसै अवधिमा हामी सबैभन्दा बढी यात्रु बोक्न सफल हुनुको प्रमुख कारण भने निगमले भखरै मात्रै किनेको दुई वटा वाइडबडी जहाज हो। तर, वाइडबडी जहाजलाई फुल फेजमा सञ्चालन ल्याउन नसकेको सिग्देल स्वीकार्छन्।
‘दुई वटा वाइडबडी (ए ३३०–२००) जहाजको उडान क्षमता दैनिक १३/१४ घन्टा हो’, उनले भने, ‘लामो दूरीका गन्तव्यमा उडान गर्न नसक्दा दैनिक ७÷८ घन्टामा मात्रै विमान उडिरहेका छन्।’
सन् २०१७ को अगस्ट, सेप्टेम्बर र अक्टोबर महिनामा नेपाल एयरलाइन्सले जम्मा ८९ हजार ८ सय ५८ हवाइ यात्रुलाई सेवा दिएको थियो। तर, यो संख्या अहिले बढेर यसै अवधिमा एक लाख ४२ हजारभन्दा बढी भएको सिग्देल बताउँछन्। ‘नेपाल एयरलाइन्सको मात्रै अन्तर्राष्ट्रिय हवाइ यात्रु संख्या बढेको हैन’, सिग्देलले भने, ‘समग्र सेवा प्रदायक कम्पनीका हवाइ यात्रु नै बढेको हो।’
सन् २०१७ को यसै अवधिमा कूल ९ लाख ९९ हजार १ सय ९० जना यात्रुले विभिन्न विमान कम्पनीको जहाजमार्फत त्रिभुवन अन्तर्राष्ट्रिय विमानस्थल हुँदै हवाइ यात्रा गरेका थिए। तर, यो संख्या सन् २०१८ को यसै अवधिमा ८.०४ प्रतिशतले बढेर १० लाख ८६ हजार ५ सय ९० पुगेको छ।
सन् २०१७ को यसै अवधिको तुलनामा सन् २०१८ मा कूल ८७ हजार ४ सय जना अन्तर्राष्ट्रिय हवाइ यात्रु बढेका छन्। यसरी बढेको अन्तर्राष्ट्रिय हवाइ यात्रुमा नेपाल एयरलाइन्सले मात्रै ५२ हजार ५ सय ४८ बढी बोक्न सफल भएको हो। नेपाल एयरलाइन्सले सन् २०१७ को अगस्ट, सेप्टेम्बर अक्टोबरमा जम्मा ८९ हजार ८ सय ५८ जना यात्रुलाई हवाइ सेवा दिएको थियो।
सन् २०१७ को यसै अवधिमा नेपाल एयरलाइन्ससँग अन्तर्राष्ट्रिय उडानमा दुई वटा न्यारोबडी र एउटा बोइङ मात्रै थियो। दुई वटा २ सय ७४ सिटका जहाज थपेपछि यात्रु संख्यामा पनि सुधार आएको उनको भनाइ छ।
कुन महिना कति यात्रु?
नेपाल एयरलाइन्सले सन् २०१८ को अगस्टमा कूल अन्तर्राष्ट्रिय हवाइ यात्रुमध्ये १४.०५ प्रतिशत यात्रुलाई सेवा प्रदान गर्न सफल भएको छ। तर, सन् २०१७ को अगस्टमा निगमको बजार हिस्सा ८.३४ प्रतिशत मात्रै थियो। यसैगरी निगमले सन् २०१८ को सेप्टेम्बरमा आफ्नो बजार हिस्सा १३.५९ प्रतिशत पुर्याएको छ भने सन् २०१७ कै सेप्टेम्बरमा निगमको बजार हिस्सा ८.४१ प्रतिशत मात्रै थियो।
साथै निगमले सन् २०१८ को अक्टोबरमा अन्तर्राष्ट्रिय हवाई यात्रातर्फको बजार हिस्सा १२ प्रतिशत पुर्याएको सिग्देल बताउँछन्। सन् २०१७ को अक्टोबरमा निगमको बजार हिस्सा ९.९८ प्रतिशत मात्रै थियो।
निगम फेरि एक नम्बरमा
राष्ट्रिय ध्वजाबाहक नेपाल एयरलाइन्स फेरि अन्तर्राष्ट्रिय उडानतर्फ बढी यात्रु बोक्ने कम्पनीको रुपमा देखा परेको छ। पहिलो पटक निगम २०१६ को सबैभन्दा बढी हवाइ यात्रु बोक्ने कम्पनी बनको थियो। तर, सन् २०१७ मा भने नेपाल एयरलाइन्सले बढी यात्रुको बोक्ने एयरलाइन्स कम्पनीको लिस्टमा ३ नम्बरमा पुगेको थियो।
सन् २०१७ मा नेपाल एयरलाइन्ससँग रहेको एउटा बोइङ दुई महिनाभन्दा बढी दिल्लीमा ग्राउन्डेड हुँदा नेपाल एयरलाइन्स तेस्रो नम्बरमा झरेको थियो। निगम फेरि दुई वटा वाइडबडी जहाजमार्फत उडान थालेसँगै सन् २०१८ को अगस्टदेखि एक नम्बरमा उक्लेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
