पोखरा– ‘पोखराका बाटो बांगाटिंगा छन्। घर अनुसार ठूलासाना छन्,’ गण्डकी प्रदेशका मुख्यमन्त्री पृथ्वी सुब्बा गुरुङले भने, ‘बाटो बनाउँदा सडक विभाग र केन्द्र सरकारले ध्यान दिनुपर्थ्यो।’
पोखराका बाटालाई उदाहरण दिँदै उनले बाटोअनुसार घर नभई घरअनुसार बाटो बनाइएकामा पहिल्यै सरोकारवाला निकायले ध्यान दिनुपर्ने बताए।
नेपाल सरकार वन तथा वातावरण मन्त्रालय विभागले मंगलबार पोखरा महानगरपालिकामा गरेको उद्योग प्रतिष्ठानको वातावरण अनुक्रम सम्बन्धी कार्यशाला गोष्ठीमा मुख्यमन्त्री गुरुङले यस्तो भनाइ राखेका हुन्। उनले प्रदेशका धेरै सडकहरु भद्रगोल रहेको तर पनि ती सडक सुधार्न सकिने समय रहेको औंल्याए।
केन्द्रमा २÷४ जना नेता बसेर तयार पारेको कानुन पनि कार्यान्यवनमा नआउँदा झनै ठूलो समस्या आउने गरेको मुख्यमन्त्री गुरुङको आरोप थियो। उनले पोखरा महानगरपालिकालाई यथाशीघ्र सडक पोलका तार हटाउन समेत आदेश दिए। ‘बिजुली र केबल तार खाली गौंथली र कौवा रमाउन सजिलो भएको छ। चाँडै अन्डरग्राउन्ड बनाउनुपर्छ,’ उनले भने।
विकास निर्माणका काम गर्दा वातावरणलाई जसरी पनि आँच आउने भएकाले वातावरण विनाश हुन्छ भनेर पूर्वाधार निर्माणको काम रोक्न नहुने मुख्यमन्त्रीको तर्क थियो। उनले भने, ‘विकास गर्दा विनाश त हुन्छ नै। न्यून वातावरणीय क्षतिमा सन्तुलन कायम गर्नुपर्छ।’
प्रदेशलाई स्थानीय तहले विरोध गर्ने होइन : मन्त्री लम्साल
उद्योग, पर्यटन, वन तथा वातावरण मन्त्री विकास लम्सालले प्रदेशलाई स्थानीय तहले विरोध नगर्न आग्रह गरेका छन्। स्थानीय तहले काम नगर्ने तर प्रदेशलाई दोष दिने परिपाटी बसेको आरोप उनले लगाए। ‘संघको काम गर्न नै प्रदेशमा आएका हौं। तपाईं हाम्रो विरोध गर्ने होइन। समन्वय गरेर अघि बढ्ने हो,’ उनले भने।
मन्त्री लम्सालले अन्नपूर्ण संरक्षण क्षेत्र (एक्याप) प्रदेश मातहतमा ल्याउने तयारी भइरहको जानकारी दिए। ‘माघमा म्याद सकिँदै छ। त्यसपछि नयाँ कार्यसमिति चुनेर प्रदेश मातहतमा ल्याउने तयारी गरिरहेका छौं,’ उनले भने। एक्याप समुदायकै लागि स्थापना भएपनि उनीहरुको हित विपरीत काम गरिरहको भन्दै उनले त्यसको विरोधमा उत्रिनसमेत आग्रह गरे।
कार्यक्रममा वातावरण विभागका महानिर्देशक झलकराम अधिकारीले वातावरण तापक्रमको सबैभन्दा छिटो असर हिमाली भेगमा परेको बताए। तल्लो तटीय क्षेत्रका कारण माथिल्लो क्षेत्रमा असर पु¥याइरहेको बताएका थिए।
‘तापक्रम परिवर्तनको असर उच्च भेगमा परिरहेको छ। त्यसमा पनि हिमताल बढी जोखिममा छन््,’ अधिकारीले भने, ‘त्यसको अध्ययन गरेर हामी सरसफाइ अभियानमा लागेका छौं । अभियान बैशाखबाटै सुरु हुन्छ।’ उनले पर्वतारारोहणका बेला जहाँ बढी आरोहीको मृत्यु भएको छ, त्यहीं ठाउँबाट सरसफाई सुरु गरिने बताए।
कार्यक्रममा पोखरा महानगरका मेयर मानबहादुर जिसीले वातावरणसम्बन्धी गुरुयोजना तयार गर्न प्रदेश सरकारलाई आग्रह गरे। उनले वृक्षरोपणका नाममा गलत भइरहेको समेत आरोप लगाए।
‘वृक्षरोपण भन्ने जुन पायो त्यही रुख रोप्ने कार्य भइराखेको छ,’ मेयर जिसीले भने, ‘ठाउँ र भूगोलका आधारमा रुखबिरुवा रोप्यो भने मात्रै दीर्घकालीन रुपमा फाइदा पुग्छ।’ उनले महानगरबाट योजनाबद्ध तरिकाले वातावरण संरक्षणका अभियान सञ्चालन हुने समेत जानकारी दिए।
वातावरण संरक्षण गर्न सम्झौता
वातावरण विभागले मंगलबार नै पोखरा महानगरसँग वातावरण संरक्षण तथा व्यवस्थापन कार्यक्रम सञ्चालन गर्न सहमति गरेको छ। विभागका महानिर्देशक झलकराम अधिकारी र महानगरतर्फबाट प्रमुख प्रशासकीय अधिकृत शेषनारायण पौडेलले सम्झौता पत्रमा हस्ताक्षर गरे।
सम्झौता अनुसार कार्यक्रम सञ्चालन गर्न विभागले ६० प्रतिशत र महानगरले ४० प्रतिशत खर्च गर्नेछन्। हरित सहर निर्माणमा सहकार्य तथा सहयोगका लागि उक्त सम्झौता भएको महानगर अधिकृत पौडेलले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
