काठमाडौं– कोसोभोका पूर्वराष्ट्रपति हाशिम थाचीलाई विशेष अदालतले २५ वर्षको जेल सजाय सुनाएको छ।
५८ वर्षीय थाचीलाई युद्धका क्रममा भएका चारवटा अपराधमा दोषी ठहर गर्दै बुधबार उक्त सजाय सुनाइएको हो। सन् १९९० को दशकमा सर्बियाबाट कोसोभो अलग हुने क्रममा उनी जातीय अल्बानियाली विद्रोही संगठन कोसोभो लिबरेसन आर्मी (केएलए) का शीर्ष कमान्डर थिए।
सोही बेला हत्या, यातना र गैरकानुनी थुनालगायत अपराध गरेको अभियोगमा उनलाई दोषी ठहर गरिएको हो। नेदरल्यान्ड्सको हेगस्थित कोसोभो स्पेसलिस्ट चेम्बर्स (केएससी) ले द्वन्द्वका क्रममा केएलएले राजनीतिक विपक्षी तथा सर्बियाली सुरक्षा निकायसँग सहकार्य गरेको आरोप लागेका ९६ जनाको हत्या गरेकोमा थाची दोषी रहेको ठहर गरेको जनाएको छ।
थाचीले भने आफूमाथिका सबै आरोप अस्वीकार गर्दै आएका छन्। बुधबार अध्यक्षीय न्यायाधीश चार्ल्स स्मिथले सजाय पढेर सुनाउँदासम्म उनी मौन रहे।
थाचीसँगै केएलएका अन्य तीन पूर्ववरिष्ठ कमान्डरलाई पनि विभिन्न अभियोगमा सजाय सुनाइएको छ। जाकुप क्रास्निकीलाई २५ वर्ष, काद्री भेसेलीलाई हिरासतमा बिताएको समयसमेत गणना हुने गरी १८ वर्ष र रेक्सेप सेलिमीलाई हिरासतमा बिताएको समयसमेत समेटेर १३ वर्षको जेल सजाय सुनाइएको छ।
फैसलाविरुद्ध उनीहरूलाई पुनरावेदन गर्ने अधिकार रहेको अदालतले जनाएको छ।
यद्यपि, चारै जनालाई मानवताविरुद्धका अपराधसम्बन्धी ६ अभियोगमा भने सफाइ दिइएको छ। न्यायाधीशहरूले ती अपराध सर्वसाधारणविरुद्धको व्यापक र योजनाबद्ध आक्रमणको हिस्साका रूपमा भएका थिए भन्ने अभियोजन पक्षले प्रमाणित गर्न नसकेको बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821303.jpg)
-1787798469.jpg)
-1786602170.png)
