काठमाडौं– अमेरिकी राष्ट्रपति डोनाल्ड ट्रम्पको प्रशासनले इजरायललाई करिब २.८ अर्ब अमेरिकी डलर बराबरका हतियार उपलब्ध गराउने तयारी गरेको छ।
प्रस्तावित हतियार प्याकेजमा करिब ४० हजार भारी बमसमेत समावेश छन्। प्रत्येक बमको तौल २ हजार पाउन्ड अर्थात् करिब ९०० किलोग्राम छ। प्रस्तावित प्याकेजमा २० हजार एमके ८४ र २० हजार बीएलयू–११७ बम छन्।
अमेरिकी अधिकारीहरूका अनुसार सम्झौता अझै अन्तिम भइसकेको छैन। यसबारे अमेरिकी कंग्रेसलाई अनौपचारिक जानकारी भने दिइसकिएको छ।
सन् २०२४ मा तत्कालीन राष्ट्रपति जो बाइडेनको प्रशासनले इजरायललाई २ हजार पाउन्डका बमको एक खेप पठाउन रोक लगाएको थियो। घना बस्ती भएको गाजामा त्यस्ता बम प्रयोग गर्दा ठूलो संख्यामा सर्वसाधारणको मृत्यु हुन सक्ने चिन्ता त्यतिबेला व्यक्त गरिएको थियो।
ट्रम्प पुनः राष्ट्रपति बनेपछि उक्त रोक हटाइएको थियो। अहिले उनको प्रशासनले यही क्षमताका बम ठूलो संख्यामा समावेश भएको नयाँ हतियार सम्झौता अघि बढाउने तयारी गरेको हो।
यी ९०० किलोग्रामका बमका विभिन्न मोडल छन्। केही बम जमिनमुनि रहेका संरचना तथा स्थानलाई निशाना बनाउन डिजाइन गरिएका छन् भने केही जमिनमाथि विस्फोट भएर ठूलो क्षेत्रमा क्षति पुर्याउन सक्छन्।
गाजामा भएका आक्रमणका भिडियो तथा घटनास्थलबाट संकलित बमका अवशेषको विश्लेषण गरेका विज्ञहरूले त्यहाँ अमेरिकी निर्मित बम प्रयोग भएको बताएका छन्। तीमध्ये केही हमासको सुरुङ सञ्जाललाई निशाना बनाउन प्रयोग गरिएको बताइएको छ। तर, घना बस्ती भएका क्षेत्रमा समेत ठूलो जनधनको क्षति भएको छ।
ट्रम्प प्रशासनले गत वर्ष इजरायलका लागि करिब ३ अर्ब डलर बराबरको हतियार बिक्री स्वीकृत गरेको थियो। त्यस प्याकेजमा ३५ हजार ५०० भन्दा बढी भारी बम समावेश थिए।
त्यसपछि जनवरीमा इजरायलका लागि थप ६.६७ अर्ब डलर बराबरको हतियार बिक्रीलाई पनि स्वीकृति दिइएको थियो। सन् २०२३ अक्टोबर ७ मा हमासको नेतृत्वमा दक्षिणी इजरायलमा भएको हमलामा करिब १२ सयको मृत्यु भएको थियो भने २५१ जनालाई बन्धक बनाइएको थियो। त्यसपछि इजरायलले गाजामा सैन्य अभियान सुरु गरेको थियो।
गाजाको स्वास्थ्य मन्त्रालयका अनुसार इजरायली सैन्य अभियानमा हालसम्म ७३ हजार २६४ भन्दा बढी प्यालेस्टिनीको मृत्यु भएको छ। उक्त तथ्यांकमा युद्धविरामपछि मृत्यु भएका व्यक्तिहरू पनि समावेश छन्।
अमेरिकाको मध्यस्थतामा युद्धविराम भए पनि गाजामा हिंसा पूर्ण रूपमा रोकिएको छैन। इजरायलतर्फबाट आक्रमण जारी रहँदा हमाससँग सम्बन्धित लडाकु र इजरायली सैनिकबीच पनि हिंसाका घटना भइरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
