कृषि

नेपालबाट सर्वाधिक निर्यात हुने २० वस्तुः पाम तेल ६९ प्रतिशतले घट्यो, अदुवा ५० प्रतिशतले बढ्यो

कल्पना घिमिरे मंगलबार, चैत २७, २०८० २०:०६

काठमाडौं– चालू आर्थिक वर्ष (२०८०/०८१) को फागुन मसान्तसम्म (८ महिना) ११ खर्ब ३० अर्ब ८४ करोड रुपैयाँको कूल वैदेशिक व्यापार भएको केन्द्रीय भन्सार कार्यालयले जनाएको छ। जसमध्ये १० खर्ब ३० अर्ब २२ करोड रुपैयाँ बराबरको वस्तु आयात भएको छ भने १ खर्ब ६१ करोड रुपैयाँ बराबरको वस्तु निर्यात भएको छ।

जसअनुसार ९१ प्रतिशतको आयात हुँदा ९ प्रतिशत मात्रै निर्यात भएको विभागको तथ्यांकले देखाउँछ। जसले गर्दा देशको व्यापार घाटा ९ खर्ब २९ अर्ब रुपैयाँ बराबर रहेको छ।

निर्यात भएको ९ प्रतिशत हिस्सामा कस्ता कस्ता वस्तु विदेशी मूलुकमा निर्यात हुने गर्दछन् त? जसमध्ये सर्वाधिक निर्यात हुने २० वस्तुको तथ्यांक राष्ट्र बैंकले सार्वजनिक गरेको छ। नेपालबाट बाहिरी मुलुकमा धेरै निर्यात हुने वस्तुमा जस्तापाता, पोलिस्टार धागो, उलन कार्पेट, अलैँची लगायतका वस्तु रहेका नेपाल राष्ट्र बैंकले जनाएको छ।

यी हुन् विदेशमा सर्वाधिक निर्यात हुने २० वस्तु

वस्तु	निर्यात रकम (रुपैयाँमा)
जस्ता पाता	७ अर्ब ९७ करोड ४९ लाख
पोलिस्टर धागो	७ अर्ब १४ करोड ८० लाख
उलन कार्पेट	६ अर्ब ९२ करोड ८० लाख
जुस	५ अर्ब २८ करोड ६५ लाख
अलैची	५ अर्ब १७ करोड ४६ लाख
प्लास्टिक बोर्ड	४ अर्ब ९३ करोड ९८ लाख
जुट	४ अर्ब ७६ करोड ७४ लाख
पाम तेल	४ अर्ब ६३ करोड ३० लाख
रेडिमेड कपडा	४ अर्ब २४ करोड ६८ लाख
चिया	२ अर्ब ४५ करोड २९ लाख
पस्मिना	२ अर्ब २ करोड २९ लाख
पिना	१ अर्ब ९२ करोड १४ लाख
बुनेका कपडा	१ अर्ब ६७ करोड ९४ लाख
जडिबुटि	१ अर्ब ३५ करोड २६ लाख
चाउचाउ	१ अर्ब ३३ करोड १३ लाख
आयुर्वेदिक औषधी	१ अर्ब १७ करोड २४ लाख
अदुवा	९८ करोड ३५ लाख
जुत्ता ÷ चप्पल	८४ करोड ६७ लाख

स्रोतः नेपाल राष्ट्र बैंक
चालू वर्षको फागुन मसान्तसम्ममा ७ अर्ब ९७ करोड ४९ लाख रुपैयाँको जस्तापाता निर्यात भएको राष्ट्र बैंकले जनाएको छ। यो गत वर्षको तुलनामा ७४.८ प्रतिशतले निर्यात बढेको छ। गत वर्ष (२०७९/०८०)को सोहि अवधिमा ४ खर्ब ५६ करोड २८ लाख रुपैयाँको जस्तापाता निर्यात भएको थियो।

यस्तै अदुवा निर्यात ५०.४ प्रतिशतले वृद्धि भएको छ। चालू वर्षको फागुन मसान्तसम्ममा ९८ करोड ३५ लाख रुपैयाँको अदुवा निर्यात भएको छ। गत वर्षको यसै अवधिमा ६५ करोड ३७ लाख रुपैयाँको मात्रै अदुवा निर्यात भएको थियो।

यस्तै चालू वर्ष ८ महिनामा पोलिस्टर याम, थ्रेड (पोलिस्टर धागो)को निर्यात ६.३ प्रतिशतले बढेको छ। ७ अर्ब १४ करोड ८० लाख रुपैयाँको निर्यात भएको छ। गत वर्ष पोलिस्टर धागो ६ अर्ब ७२ करोड ४६ लाख रुपैयाँको निर्यात भएको थियो।

यस्तै जुस निर्यात ३८.४ प्रतिशतले बढेको छ। ५ अर्ब २८ करोड ६५ लाख रुपैयाँको जुस निर्यात भएको छ। गत वर्षको सोही अवधिमा यस्तो जुस ३ अर्ब ८२ करोड रुपैयाँको निर्यात भएको थियो।

६९.५ प्रतिशतले पाम तेल निर्यातमा गिरावट
पाम तेल निर्यात पछिल्लो समय निरन्तर रुपमा खस्किँदै गएको छ। चालू वर्षको फागुन ६९.५ प्रतिशतले पाम तेल निर्यातमा गिरावट आएको छ। फागुन मसान्तसम्ममा उक्त तेल ४ अर्ब ६३ करोड रुपैयाँको निर्यात भएको छ। गत वर्षको सोहि अवधिमा पाम तेल १५ अर्ब १८ करोड रुपैयाँ बराबरको निर्यात भएको थियो।

उलन कार्पेट निर्यात भने यो वर्ष खस्किएको छ।

८ महिनामा उलन कार्पेट ६ अर्ब ९२ करोड ८० लाख रुपैयाँको निर्यात भएको छ। गत वर्षको सोहि अवधिमा ७ अर्ब ३८ करोड रुपैयाँ बराबरको उलन कार्पेट निर्यात भएको तथ्यांकमा उल्लेख छ।

चालू आर्थिक वर्षको ८ महिनामा ५ अर्ब १७ करोड ४६ लाख रुपैयाँको अलैँची निर्यात भएको छ। गत वर्षको सोहि अवधिमा ५ अर्ब ८४ करोड ४५ लाख रुपैयाँको अलैँची निर्यात भएको थियो। जसअनुसार गत वर्षको सोहि अवधिको तुलनामा यस वर्ष ११.५ प्रतिशतले निर्यातमा गिरावट आएको छ।

यी हुन् सर्वाधिक आयात हुने
चालू आर्थिक वर्षको ८ महिनाको अवधिमा नेपालमा १ खर्ब ९० अर्ब ६ करोड रुपैयाँको पेट्रोलियम पदार्थको आयात भएको छ। गत वर्षको यसै अवधिको तुलनामा ६.१ प्रतिशतले पेट्रोलिय पदार्थको आयात घटेको छ।

मेसिनरी पार्ट्सको आयातमा ४७ अर्ब ३४ करोड रुपैयाँ बाहिरिएको छ। यसबाहेक, सवारी साधनको पार्टपुर्जा आयात समेत ४७ अर्ब १५ करोड रुपैयाँको भएको छ। गत वर्ष तुलनामा सवारी साधनको आयात १७ प्रतिशतले बढेको देखिन्छ।

सोही अवधिमा नेपालमा २९ अर्ब ५८ करोड रुपैयाँको औषधी आयात भएको छ। गत आर्थिक वर्ष २०७९÷८० को तुलनामा ५.१ प्रतिशतले आयात खुम्चिएको छ। यसबाहेक, यो अवधिमा २५ अर्ब ९१ करोड रुपैयाँको फलामजन्य वस्तु (स्पन्ज आइरन) आयात भएको छ। जसमा गत वर्षको तुलनामा ३ प्रतिशतको गिरावट आएको छ।

नेपालमा सबैभन्दा धेरै आयात हुने वस्तुको ६ नम्बरमा दूरसञ्चार उपकरण पर्छ। दूरसञ्चार क्षेत्रका उपकरणको आयातमा २५ अर्ब १८ करोड रुपैयाँ बाहिरिएको छ। गत वर्षको आयातको तुलनामा २.८ प्रतिशतले बढेको बैंकको तथ्यांकले देखाएको छ। रेडिमेट कपडा २३ अर्ब रुपैयाँभन्दा बढीको रेडिमेट गार्मेन्ट आयात भएको छ। यी वस्तुको आयातमा अघिल्लो वर्षको तुलनामा ४५ प्रतिशतभन्दा धेरैको वृद्धि आएको छ। विद्युतीय सामाग्री २२ अर्ब ७६ करोड, रासायनिक मल २१ अर्ब र २० अर्बभन्दा बढीको टेक्सटायल आयात भएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।