बैतडी– सुदूरपश्चिम प्रदेशका मुख्यमन्त्रकी कमलबहादुर शाहले बिहीबार लिन लागेको विश्वासको मतलाई लिएर नागरिक उन्मुक्ति पार्टी थप विवादमा फसेको छ। जसकारण, सो पार्टीका दुई फरक पदाधिकारीबाट दुईथरी ह्विप जारी भएका छन्।
केन्द्रीय अध्यक्ष रञ्जिता श्रेष्ठले बुधबार प्रदेश सभा सदस्यहरूलाई पत्र पठाउँदै विश्वासको मत नदिन भनेकी थिइन्। उनले पार्टीको 'सुदूरपश्चिम प्रदेश संसदीय दलको विधान केन्द्रीय कमिटीबाट पास नभएको हुँदा दैनिक सभा सञ्चालन लगायतका कार्यक्रमहरूका लागि माननीय श्री घनश्याम चौधरीले संसदीय दलको नेताको रुपमा कामकाज गरे पनि प्रदेश सभाको महत्त्वपूर्ण निर्णयमा ह्विप लगाउने अधिकार पार्टीको केन्द्रीय अध्यक्षलाई नै भएकोले' आफूले ह्विप लगाएको बताएकी छिन्।
उनको पत्रमा भनिएको छ, ‘… मिति २०८०/१२/२२ गते माननीय कमलबहादुर शाहज्यूले लिन गइरहेको विश्वासको मतको विपक्षमा मतदान गर्नुहुन निर्देशन सहितको ह्विप जारी गरिएको व्यहोरा अनुरोध गर्दछु।’
बुधबार नै प्रदेश संसदीय दलका प्रमुख सचेतक खुसीराम डगौरा थारुले पनि ह्विप जारी गरेका छन्। उनले ‘मुख्यमन्त्री कमलबहादुर शाहज्यूले आपूमाथि प्रदेश सभाको विश्वास छ भन्ने प्रस्तावको पक्षमा मतदानका लागि अनिवार्य उपस्थित हुन अनिवार्य मतदान गर्न र तटस्थ नरहन राजनीतिक दल सम्बन्धी ऐन, २०७३ को दफा २८ बमोजिम निर्देशन (ह्विप) जारी’ गरिएको बताएका छन्।
बुधबार नै अध्यक्ष श्रेष्ठले आफ्नै पार्टीबाट समानुपातिक सांसद भएकी इन्दिरा गिरीलाई कारबाही गरेकी छन्। पार्टीको निर्णय विपरीत सरकारमा किन गएको भनेर स्पष्टीकरण सोध्दा पनि जवाफ नदिएकाले हटाउने निर्णय लिएको श्रेष्ठले जानकारी दिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766928868.png)
-1764146706.png)
-1766648928.png)
