सुन तस्करीलाई नागरिकता बिक्री प्रकरण : दुई अधिकृतसहित ३ जनालाई पुर्पक्षका लागि थुनामा पठाउने, एक विरुद्व पक्राउ पुर्जी जारी

सुरक्षा/अपराध

नेपाल लाइभ शनिबार, चैत १७, २०८० १५:५०

काठमाडौं– सुन तस्करीमा संलग्न रहेका विदेशी नागरिकलाई नेपाली नागरिकता बिक्री गरेको अभियोगमा पक्राउ परेका तीन जनालाई अदालतले पुर्पक्षका लागि थुनामा पठाएको छ।

जिल्ला प्रशासन कार्यालय काभ्रेपलाञ्चोकबाट विदेशी नागरिकलाई नागरिकता बिक्री गरेको अभियोगमा हिरासतमा रहेका दुई अधिकृतसहित थप एक जनालाई जिल्ला अदालतले पुर्पक्षका लागि थुनामा पठाउने आदेश गरेको हो।

अदालतले सोही प्रकरणमा संलग्न अर्का एक जनालाई पक्राउ पुर्जी जारीको आदेश दिएको छ। जिल्ला अदालत धुलिखेलले शुक्रबार थुनछेक बहसपछि यस्तो आदेश गरेको हो। न्यायाधीश शिवकुमार पोखरेलको इजलासले नागरिकता बिक्री अभियोगमा पक्राउ परेका अधिकृतद्वय झपेन्द्रराज खरेल र रामचन्द्र अर्यालसहित नागरिकता खरिद गर्ने काठमाडौँ महानगरपालिका-४ का ४० वर्षीय राजु गुरुङलाई थुनामा पठाउने आदेश गरेको हो।

राजुका बाबु हरिभक्त गुरुङलाई पक्राउ पुर्जीको आदेश भएको हो। खरेल तत्कालीन समयमा जिल्ला प्रशासन कार्यालय काभ्रेपलाञ्चोकमा अधिकृत थिए भने अर्याल सुब्बा थिए। यसअघि गुरुङ बाबुछोरा हङकङ बस्दै आएका थिए।

राजु गुरुङले अमेरिका जाने प्रयोजनका लागि काठमाडौंबाट लिएको सक्कली नागरिकताका साथै काभ्रेपलाञ्चोकबाट नागरिकता र राहदानी खरिद गरेका अनुसन्धानको क्रममा खेलेको थियो। सुन तस्करीमा संलग्न बेल्जियमका नागरिक र चिनियाँलाई नागरिकता दिएको अनुसन्धानमा पाइएको थियो।

नागरिकता फाँटमा अनुसूची मिलाउने र भर्ने सुब्बा रामचन्द्र अर्याल थिए। सुन तस्करी प्रकरणमा पक्राउ परेका विदेशी नागरिकलाई नागरिकता दिएको अभियोगमा अधिकृतद्वय खरेल र अर्याल अनुसन्धानमा रहेका छन्। जिल्ला प्रहरी कार्यालयले गृह मन्त्रालयद्वारा गठित छानबिन समितिले दिएको निर्देशनअनुसार विदेशीलाई नागरिकता दिएको अभियोगमा अनुसन्धान गरिरहँदा गुरुङलाई नागरिकता बिक्री गरेको फेला परेपछि दुई अधिकृत पक्राउ गरी अनुसन्धान सुरु गरेको थियो।

प्रहरीका अनुसार अनुसार दुवै अधिकृतले स्वदेशी र विदेशीलाई नागरिकता बिक्री गरेको खुलेको थियो। प्रहरीले विदेशी नागरिक दावा छिरिङ भनिने निमा तामाङ भएको झुटो विवरण पेस गरी वि.सं.२०७४ पुस २० गते नागरिकता दिलाएको सहित नौ जनालाई नागरिकता बिक्री गरेको अभियोगमा अनुसन्धान जारी राखिएको उनले जानकारी दिए।

छिरिङ ठूलो परिमाणमा सुन तस्करीमा संलग्न रहेपछि प्रहरीले गत साउन १४ गते पक्राउ गरी केन्द्रीय कारागारमा राखेको छ। अधिकृत खरेललाई यही चैत ३ गते सिन्धुपाल्चोकको मेलम्ची नगरपालिकाबाट र अर्याललाई गत फागुन २४ गते बागमती प्रदेशसभा सचिवालयबाट प्रहरीले पक्राउ गरेको थियो।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

आगो बाल्दा वा विद्युतीय उपकरणको प्रयोग गर्दा सावधानी अपनाउनूस्ः स्वास्थ्य मन्त्रालय

मन्त्रिपरिषद् बैठक सुरु

अप्राकृतिक भएकै कारण अब ओली सरकार चल्दैन : अध्यक्ष प्रचण्ड