काठमाडौं- गत शुक्रबार बसेको मन्त्रिपरिषद् बैठकले यसअघि नै महाप्रबन्धक भइसकेका मदन खरेललाई वायुसेवा सञ्चालक समिति सदस्यमा नियुक्त गर्यो। त्यसको ठीक दुई दिनपछि आइतबार उनलाई निगमको कार्यकारी अध्यक्षमा नियुक्त गरिएको छ।
दुई दिनकै अवधिमा एकै व्यक्तिलाई सञ्चालक समिति सदस्यबाट अध्यक्षमा नियुक्त गरिएको यो पहिलो पटक हो। यसअघि संस्कृति पर्यटन तथा नागरिक उड्डयन सचिव अध्यक्ष हुने सञ्चालक समितिमा एकाएक खरेललाई कार्यकारी भूमिकासहितको अध्यक्ष नियुक्त गरिएको छ। अब निगमको लगभग ‘फुल पावर’ खरेलमा गएको छ।
यो सँगै निगममा फरक प्रकृतिको द्वन्द्व उत्पन्न भएको छ। आइतबार मध्यरातमा निगमका महाप्रबन्धक सुगतरत्न कंसाकारले निगम व्यवस्थापनमा नयाँ ‘ट्विस्ट्’ आएको ट्विटमार्फत उल्लेख गरेका छन्। सरकारले खरेललाई सञ्चालक समितिको कार्यकारी अध्यक्ष नियुक्त गरेसँगै कंसाकारले उक्त ट्विट् गरेका हुन्। ‘मैले पदबाट राजीनामा दिने निर्णय गरेको छैन’ उनको ट्विटमा उल्लेख छ। आफू कार्यकारी भूमिका बिनाको प्रमुख कार्यकारी अधिकृत (सिइओ)मा कायम रहने उनले उल्लेख गरेका छन्।
नेपाल लाइभसँगको कुराकानीमा महाप्रबन्धक कंसाकारले महाप्रबन्धकका रुपमा आफ्नो भूमिका लगभग शून्यमा पुगेको प्रतिक्रिया दिएका छन्। आफू सञ्चालक समिति सदस्यको भूमिकामा रहने र बाँकी विषयमा केही नबोल्ने प्रतिक्रिया दिए। ‘विगतमा केही लफडा भएको हो,’ उनले भने, ‘अब आफ्नो भूमिका अनुसार अघि बढ्छु।’
कंसाकारको कार्यकाल आगामी चैतमा सकिँदैछ। ०७१ सालमा चार वर्षका लागि निगमको महाप्रबन्धकमा उनी नियुक्त भएका थिए। नौ वर्षअघि कार्यकारी प्रमुखका रुपमा निगम प्रवेश गरेका कंसाकार सुरुवाती नियुक्तीको दुई वर्षपछि राजीनामा दिएर बाहिरिएका थिए।
पर्यटन सचिव अध्यक्ष हुने साविकको अभ्यास मिचेर सञ्चालक समिति सदस्यमा खरेललाई ल्याइएको थियो।
खरेल नै किन?
आइतबारको निर्णयसँगै सोमबार बिहान नेकपाका केन्द्रीय सदस्य विष्णु रिजालले व्यंग्यात्मक ट्विट् गरेका छन्। ‘काम गर्न नसकेर निगमबाट बाहिरिएका मदन खरेलमा के जादु रहेछ कुन्नि?’ उनले ट्विटमा उल्लेख गरेका छन्।
खरेललाई ०७० जेठमा चार वर्षका लागि निगमको महाप्रबन्धक नियुक्त गरिएको थियो। तर, काम गर्ने वातावरण नभएको भन्दै उनले एक वर्ष नपुग्दै पदबाट राजीनामा दिएका थिए। यसलाई रिमालले ट्विट्मार्फत भनेका छन्, ‘सत्तामा बस्नेहरूलाई सायद पुराना कुरा सम्झिने फुर्सद हुँदैन।’
पछिल्लो समय सरकारले खरेललाई कार्यकारी अध्यक्ष बनाउने प्रयास गर्दै आएको थियो। सिधै अध्यक्ष बनाउन नमिल्ने भएपछि सञ्चालक समितिमा प्रवेश गराएर नियुक्त गरिएको हो।
निगमको वाइडवडी जहाज खरीद प्रक्रियामा कंसाकारको भूमिकामाथि प्रश्न उठाइँदै आएको छ। पर्यटनमन्त्रीमा नियुक्त भए लगत्तै रवीन्द्र अधिकारीले उनलाई हटाउने प्रयास गर्दै आएका थिए।
झापाका खरेल प्रधानमन्त्री केपी शर्मा ओलीको आफन्त हुन् भने महान्यायाधिवक्ता अग्निप्रसाद खरेलसँग पनि उनको पारिवारिक सम्बन्ध छ।
पछिल्लो समय वाइडबडी जहाज खरीद प्रक्रियाका सम्बन्धमा निगमका महाप्रबन्धक कंसाकारले खतरा भएपनि साहस गर्नैपर्ने निर्णय आफूले गरेको ट्विट्मा उल्लेख गरेका छन्। ‘नेतृत्व तहमा बस्नेहरूका लागि बारम्बार कुनै जोखिमको सामना गर्नु नपर्ने विकल्प र खतरा भएपनि साहस गरी निर्णय गर्नैपर्ने मध्ये एउटा रोज्नुपर्ने परिस्थिति उत्पन्न भइरहेको हुन्छ’, ट्विटमा उनले भनेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
