काठमाडौँ– भारतीय स्थल सेना प्रमुख बिपिन रावतले नेपाल र भुटानले भारतको साथ छोडेर चीनतर्फ जान नसक्ने बताएका छन्।
बिम्स्टेक सदस्य राष्ट्रहरुको संयुक्त सैन्य अभ्यास कार्यक्रमको समापन समारोहलाई सम्बोधन गर्दै सेनाप्रमुख रावतले सो दाबी गरेको भारतीय सञ्चार माध्यम प्रेस ट्रष्ट अफ इन्डियाले लेखेको छ।
‘नेपाल र भुटान जस्ता भूपरिवेष्टित राष्ट्रलाई भौगोलिक अवस्थितिका कारण भारततर्फ ढल्किनुको विकल्प छैन।’, रावतले भने, ‘हाल देखिएको नेपालको चीनतर्फको झुकाव क्षणिक अवधिका लागि मात्रै हो।’
भुटानको संसदीय निर्वाचनको पहिलो चरणबाटै भारत समर्थित मानिएका निर्वतमान प्रधानमन्त्री छिरिङ तोप्गेको दल जनता प्रजातन्त्र पार्टी (पिडिपी)का पराजित भएको दुई दिनपछि सेनाप्रमुख रावतको उक्त भनाइ सार्वजनिक भएको हो। यस्तै, भारतको पुनेमा आयोजना भएको पहिलो बिम्स्टेक सैन्य अभ्यास कार्यक्रममा नेपाल सहभागी हुने भनिए पनि अन्तिम समयमा आएर पर्यवेक्षकको रुपमा मात्रै सहभागी हुने निर्णय गरेको थियो।
यही भदौ २५ देखि ३१ सम्म सञ्चालन भएको अभ्यास कार्यक्रममा नेपाल सहभागी नभएको विषयलाई भारतीय सञ्चार माध्यमले नेपालमा चिनियाँ प्रभाव विस्तारको रुपमा व्याख्या गरेका थिए।
बिम्स्टेकको क्षेत्राधिकारको विषयभन्दा बाहिर रहेको सैन्य अभ्यास कार्यक्रममा सहभागी हुँदा नेपालको असंलग्न परराष्ट्र नीतिमा आघात पुग्ने भन्दै विभिन्न तप्काको दबावका कारण सरकारले सैन्य अभ्यासबाट नाम फिर्ता लिएको हो।
नेपालले संयुक्त राष्ट्रसंघ बाहेक अन्य मुलकसँग द्विपक्षिय सैन्य अभ्यास मात्रै गर्दै आएको छ। यसपटको बिम्स्टेक सैन्य अभ्यास बहुपक्षीय अभ्यास कार्यक्रम भएकाले नेपाल सहभागी हुन नहुने सरोकारवालाहरुको भनाइ थियो।
यस्तै, नेपाली सेनाले चिनियाँ सेनासँग दोस्रो ‘सगरमाथा फे्रन्डसिप’ सैन्य अभ्यास कार्यक्रम सोमबारदेखि सुरु भएको छ। अभ्यास कार्यक्रममा सहभागी हुन नेपाली सेना चीनको सिचुवान प्रान्तको छेन्दु सहर प्रस्थान गरिसकेको छ। कुल १२ दिनसम्म चल्ने अभ्यास कार्यक्रममा नेपालका १६ सैन्य अधिकारी सहभागी हुँदै छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1763140555.png)
