काठमाडौं- संघीय संसदका दुवै सदनले मौलिक हक कार्यान्वयनसँग सम्बन्धित १५ वटै विधेयक पारित गरेका छ। आइतबार प्रतिनिधिसभाले दुई र राष्ट्रियसभाले १२ विधेयक पारित गरेको हो।
पारित विधेयक सोमबार राष्ट्रपति कार्यालयमा प्रमाणीकरणका लागि पठाइनेछ। प्रमाण्ीाकरण भएलगत्तै राजपत्रमा प्रकाशित भएपछि विधेयक कानूनकै रुपमा लागू हुनेछन्। ३१ वटा मौलिक हकमध्ये १५ वटा विधेयक मात्र सरकारले पेश गर्दै जारी गरेको हो।
असोज २ गते भित्र यी कानुन बनाउनै पर्ने बाध्यताका कारण हतारमा विधेयक पारित भई कानुन बन्ने भएका हुन्।
प्रतिनिधिसभाले शुक्रबार र शनिबार गरी १३ वटा विधेयक पारित गरेको थियो भने राष्ट्रियसभाले तीनवटा विधेयक स्वीकृत गरेको थियो। संविधान जारी भएको तीन वर्ष अर्थात् असोज २ गते भित्र मौलिक हकसँग सम्बन्धित विधेयक बनाई सक्नुपर्ने संवैधानिक बाध्यता भएकाले संघीय संसदले अन्तिम समयमा हतार–हतार विधेयक पारित गरेका हुन्।
३१ वटा मौलिक हकको कार्यान्वयनका लागि १५ वटा नयाँ कानुन बनाउनुपर्ने निक्र्योलसहित सरकारले विधेयक संसदमा पुर्याएको थियो। दुवै सदनले एक अर्काबाट उत्पति भएका विधेयकलाई स्वीकृत गरेका हुन्।
सरकारले राष्ट्रियसभामा चार वटा र प्रतिनिधिसभामा ११ वटा विधेयक दर्ता गराएको थियो। राष्ट्रियसभाका सचिव राजेन्द्र फुयाँलका अनुसार विधेयकमा आनुसंगिक रुपमा मिलाएर सोमबार बेलुकासम्म प्रमाणीकरणका लागि राष्ट्रपति कार्यालयमा पठाउने तयारी भइरहेको जानकारी दिए।
असोज २ गते राति १२ बजेभित्र विधेयक प्रमाणीकण भइसक्नुपर्छ। प्रमाणिकरणका लागि राष्ट्रियसभामा उत्पति भएका विधेयक अध्यक्ष र प्रतिनिधिसभामा उत्पति भएका विधेयक सभामुखले सिफारिस गर्नुपर्छ।
यी हुन् दुवै सदनले स्वीकृत विधेयकहरु
- वैयक्तिक गोपनीयता सम्बन्धी विधेयक
- अनिवार्य तथा निःशुल्क शिक्षा सम्बन्धी विधेयक
- जातीय भेदभाव तथा छुवाछुत कसूर र सजाय (पहिलो संशोधन) विधेयक
- सामाजिक सुरक्षा विधेयक
- अपाङ्गता भएका व्यक्तिको अधिकार सम्बन्धी (पहिलो संशोधन) विधेयक
- वातावरण संरक्षण (पहिलो संशोधन) विधेयक
- बालबालिका सम्बन्धी विधेयक
- अपराधपीडितको संरक्षण सम्बन्धमा व्यवस्था गर्न बनेको विधेयक
- सुुरक्षित मातृत्व तथा प्रजनन स्वास्थ्य अधिकार विधेयक
- रोजगारीको हक सम्बन्धी विधेयक
- उपभोक्ता संरक्षण विधेयक
- खाद्य अधिकार सम्बन्धी विधेयक
- आवासको अधिकार सम्बन्धी विधेयक
- भूमि सम्बन्धी विधेयक (सातौँं संशोधन)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1763140555.png)
