काठमाडौं– ठमेल क्षेत्रका टोले गुण्डा भनेर चिनिएका सानुभाइ भनिने युवराज गुरुङको गुण्डागर्दी पछिल्लो समय फेरि देखिन थालेको छ।
शनिबार मात्रै सानुभाइ समूहले ठमेल क्षेत्रमा एक व्यक्तिमाथि कुटपिट गरेको सीसीटीभी फुटेज बाहिरिएको छ। ठमेलको छाया सेन्टरको प्लेब्वाई क्लबको पार्किङमा सानुभाइ समूहले व्यक्तिमाथि आक्रमण गरेको थियो।
सानुभाइ उनकै समूहका शेरलाल पौडेल र कमल तामाङको समूहले एक युवालाई कुटपिट गरेको थियो। हेल्मेटले समेत ती व्यक्तिमाथि सानुभाइ समूहले हिर्काएको थियो। सानुभाइ समूहले आक्रमण गरेको भन्दै ७ जनाविरुद्ध ज्यान मार्ने उद्योगको कसुरमा जाहेरी समेत परेको जिल्ला प्रहरी परिसर काठमाडौंका एसपी कुमोध ढुंगेलले जानकारी दिए।
सानुभाइ समूहकै एक जना विश्व लामा भनेर चिनिने व्यक्ति भने पक्राउ परेका छन्। बाँकीको खोजी भइरहेको प्रहरीले जनाएको छ। यसअघि ठमेलकै क्लब ओम्नियाका सञ्चालकलाई असार १५ गते सानुभाइ सहितको समूहले आक्रमण गरेको थियो।
उनीहरु साउन १० गते १० हजार धरौटीमा छुटेका थिए। त्यतिबेलाको कुटपिट घटनामा पक्राउ परेका उनीहरुलाई प्रहरीले हत्कडी सहित ठमेल क्षेत्र समेत घुमाएको थियो। तर प्रहरीबाट पक्राउ परेर छुटेको ६ महिना पनि नपुग्दै यो समूह फेरि गुण्डागर्दीमा लाग्दै व्यक्ति आक्रमणमा उत्रिएको छ।
कुनै समय सानुभाइ भनेर चिनिने गुण्डा प्रहरी इन्काउन्टरको डरले बुलेट प्रुफ ज्याकेट लगाएर छद्म भेषमा हिँड्थे। तर अहिले उनको समूहले सीसी क्यामेराकै अगाडि व्यवसायीलाई धम्क्याउँदै मुक्का प्रहार गरेका फुटेजहरु बाहिरिएका छन्।
सानुभाइ इन्काउन्टरमा मारिएका गुण्डा नाइके कुमार घैंटे समूहका व्यक्ति हन्। उनी घैंटेको मुख्य सहयोगी भएर काम गर्थे। गुरु घैंटेको इन्काउन्टर भएपछि असुरक्षित मान्दै सानुभाइ बुलेट प्रुफ ज्याकेट लगाएर हिँड्थे। बुलेट प्रुफ ज्याकेट लगाएर हिँड्दै गरेको बेला २०७२ सालमा प्रहरीले उनलाई पक्राउ गरेको थियो। त्यतिबेला उनको साथबाट पेस्तोल र गोली समेत बरामद भएको थियो। तर कुनै समय प्रहरीको डरले बुलेट प्रुफ ज्याकेट लगाएर हिँड्ने उनै सानुभाइ अहिले खुल्लमखुला गुण्डागर्दी गर्दै हिँड्न थालेका छन्।
सानुभाइले २०६७ सालमा नुवाकोटका निर्माण व्यवसायी अनिल श्रेष्ठलाई हप्ता असुली नदिएको भन्दै गोली प्रहार गरेका थिए। नुवाकोटकै होटल व्यवसायी सुरेश डंगोललाई पनि उनले गत वर्ष आक्रमण गरेका थिए। तर राजनीतिक दबाबका बीच सानुभाइमाथि त्यतिबेला कुनै कारबाही भएन। उनी नेपाली कांग्रेस निकट मानिन्छन्।
उनको समूहले २०७८ सालमा नुवाकोट निवासी निर्माण व्यवसायी जीतबहादुर कार्कीलाई अंगभंग हुने गरी आक्रमण गरेको थियो भने २०७९ को माघमा गोर्खास्थित एक सांस्कृतिक कार्यक्रममा सहभागी हुन गएका उनले एक महिलामाथि बलात्कारको प्रयास समेत गरेका थिए। उनलाई त्यहाँका स्थानीयहरुले समाते पनि उनी पेपर स्प्रे छर्किएर भाग्न सफल भएका थिए।
पछिल्लो केही समययता उपत्यकाका विशेष गरी ठमेल, दरबारमार्ग, गोंगबु लगायत क्षेत्रमा गुण्डागर्दी हुने गरेको देखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_c6lM0N9Yaf-1778498841.jpg)
-1778498478.png)
-1764146706.png)
