थाइल्यान्डमा करिब १ करोड ५० लाख टन लिथियम भेटिएको दाबी

विश्व

नेपाल लाइभ शुक्रबार, माघ ५, २०८० २०:३०

बैंकक– थाइल्यान्डले करिब १ करोड ५० लाख टन लिथियम भण्डार पत्ता लगाएको एक सरकारी प्रवक्ताले बताएका छन्। उक्त खोजले विद्युतीय सवारी उत्पादनका लागि क्षेत्रीय ‘हब’ बन्ने मुलुकको लक्ष्यलाई प्रवर्द्धन गर्नेछ।

यस खोजले बोलिभिया र अर्जेन्टिनापछि थाइल्यान्डसँग तेस्रो सबैभन्दा ठूलो लिथियम स्रोत रहेको देखाएको छ, तर यसलाई व्यावसायिकरूपमा कति दोहन गर्न सकिन्छ भन्ने अहिलेसम्म स्पष्ट भएको छैन।

सरकारका उपप्रवक्ता रुडक्लाओ इन्टावोङ सुवानकिरीले दि नेसन टेलिभिजनसँगको कुराकानीमा दक्षिणी प्रान्त फाङ नगामा दुई अलग अलग साइटको बीचमा १ करोड ४८ लाख टन लिथियम फैलिएको जानकारी दिए। ‘हामीले फेला पारेका स्रोतहरूबाट कति प्रयोग गर्न सक्छौँ भनेर पत्ता लगाउन प्रयास गरिरहेका छौँ, यसमा समय लाग्छ’, उनले भने।

लिथियम विद्युतीय कारका साथै स्मार्टफोन र अन्य विद्युतीय सामग्रीमा प्रयोग गरिने बेट्रीहरूको निर्माणमा प्रमुख घटक हो।

अगस्टमा सत्ता सम्हालेपछि प्रधानमन्त्री श्रेथा थाभिसिनको सरकारले मुलुकको परम्परागत कारहरू एसेम्बल गर्ने इतिहासलाई अगाडि बढाउँदै थाइल्यान्डलाई विद्युतीय सवारीका लागि क्षेत्रीय उत्पादन केन्द्रका रूपमा बढाउने प्रयासलाई प्राथमिकता दिएको छ।

डाभोसमा विश्व आर्थिक मञ्चको बैठकका क्रममा श्रेथाले बोशका उपाध्यक्षसहित उद्योग जगत्‌का नेताहरूसँग भेट गर्दै थाइल्यान्डमा विद्युतीय सवारी उत्पादनमा लगानी गर्न आग्रह समेत गरेका छन्।

रुडक्लाओले लिथियम खोजका बारेमा भने, ‘यो राम्रो समाचार हो, यो थाइल्यान्डका लागि विद्युतीय सवारी बेट्रीको उत्पादनमा आत्मनिर्भर बन्ने एउटा अवसर हो।’

सन् २०२३ डिसेम्बरमा २ चिनियाँ दिग्गजले थाइल्यान्डलाई उत्पादन केन्द्रका रूपमा विकास गर्न २ अर्ब ३० करोड भाट (६ करोड ४० लाख अमेरिकी डलर) लगानी गर्ने बताएका थिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

नेपाल कम्युनिष्ट पार्टी (एकीकृत समाजवादी): उम्मेदवारको नाम सिफारिस गर्न प्रदेश कमिटीलाई निर्देशन

नारायणगढ-मुग्लिन सडकखण्डमा बस र माइक्रोबस ठोक्किँदा चार जनाको मृत्यु

स्वास्थ्यखबरकर्मी खड्कालाई ग्लोबल एएमआर मिडिया अवार्ड २०२४