पोखरा– पोखरा महानगरपालिकाको १४औँ नगर सभा माघ १८ गते बस्ने भएको छ। पुस २९ गते महानगरको हिउँदे सभा बोलाइए पनि करको विषय सम्बोधन हुन नसक्दा स्थगित भएको हो।
पोखरा महानगरपालिकाका प्रवक्ता मोति तिमिल्सिनाले आर्थिक ऐनमा राजस्वसम्बन्धी विषयहरु समेटिने जानकारी गराउँदै त्यसमा केही संशोधन गर्नुपर्ने विषयवस्तुहरुको लागि समिति गठन गरिएको जानकारी दिए। पोखरा महानगरपालिका वडा न ४ का वडाध्यक्ष देवकृष्ण पराजुलीको संयोजकत्वमा १३ सदस्य समिति गठन भएको उनले जानकारी दिए। माघ १८ गते पुन: सञ्चालन हुनेगरी नगर सभा स्थगित भएको तिमिल्सिनाले जानकारी दिए।
पोखरा महानगरपालिकाकाले पोखराको घरजग्गा कर घटाउने अजेण्डा नराखेपछि पोखराको कार्यपालिका बैठक स्थगित भएको थियो। मंगलबार बस्ने भनिएको कार्यपालिका बैठकमा कर घटाउने अजेण्डा नराखिएपछि नेपाली कांग्रेसबाट जितेका वडाध्यक्षहरुले बैठकमा सहभागी नहुने भनेसँगै बैठक स्थगित भएको थियो।
पोखरा महानगरपालिका वडा नम्बर २ का वडाध्यक्ष तथा नेपाली कांग्रेस दलका नेता दिवसमान प्रधानांगले पोखरेली जनताको चाहना र भावनाअनुसार काम गर्नुपर्ने कर्तव्य भएकोले विविध कारणले गर्दा रोकिएको बिशेष प्रस्ताव सम्बोधन गरेर राजस्वलाई घटाउनको लागि कार्यदललाई २ हप्ताको समय दिएको बताए।
पोखरा महानगरपालिकामा कांग्रेसका वडाध्यक्षहरूको बहुमत छ। २२ जना वडाध्यक्ष रहेको कांग्रेसले मंगलबार बस्ने भनेको कार्यपालिका बैठकमा कर घटाउने अजेण्डा राख्न सुझाव दिएको थियो। तर महानगरले कर घटाउने बारेको अजेण्डा बैठकमा राखेको थिएन। एजेण्डा नै समावेश नभएपछि कांग्रेसका वडाध्यक्षहरूले बैठकमा सहभागी नहुने जानकारी मेयर धनराज आचार्यलाई गराएका थिए।
त्यसअघि सभामा प्रस्तुत हुने कार्यसूची पास गर्न कार्यपालिका बैठक डाकिएको थियो। त्यस्तै पोखरा महानगपालिका वडा नम्बर १७ का वडाध्यक्ष राधिकाकुमारी शाहीले कार्यपालिकाको बैठक नेकपा एमालेले बहिष्कार नगरेको बताइन्। नेपाली कांग्रेसबाट प्रतिनिधित्व गर्ने कार्यपालिका सदस्यहरु नआउँदा बैठक स्थगित भएको शाहीको भनाइ छ।
पोखरा महानगरपालिकाका मेयर धनराज आचार्य भने १६ र १७ गते कार्यपालिकाको बैठक बस्दे र १८ गते नगर सभा बस्ने बताए। उहाँले नगरसभा समयमा नै सुरु गरेको बताए।
कांग्रेसको बिरोधपछि आर्थिक ऐनमा राजस्वसम्बन्धी विषयहरु समेटिने महानगरले बताएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
