पर्वतीय प्रशिक्षण प्रतिष्ठानलाई न्याथममा गाभ्न लागिएको भन्दै सरोकारवालाको विरोध

पर्यटन-उड्डयन

नेपाल लाइभ शनिबार, पुस २१, २०८० २१:४६

काठमाडौं– सरकारले नेपाल पर्वतीय प्रशिक्षण प्रतिष्ठानलाई नेपाल पर्यटन तथा होटेल व्यवस्थापन प्रतिष्ठान (न्याथम)मा गाभ्न लागेको भन्दै सरोकारवालाहरुले विरोध जनाएका छन्।

प्रतिष्ठानका पूर्वपदाधिकारीहरुले शनिबार पत्रकार सम्मेलन गर्दै नेपाल पर्वतीय प्रशिक्षण प्रतिष्ठानलाई न्याथनमा गाभ्नेसम्बन्धी सबै कार्यहरु तत्काल रोक्न माग गरेका छन्।

सरकारले चालु आर्थिक वर्ष २०८०/०८१ को बजेटमा शिक्षण प्रतिष्ठानलाई न्याथममा गाभ्ने व्यवस्था गरेको थियो। उक्त व्यवस्थालाई कार्यान्वयन गर्न संकृति, पर्यटन तथा नागरिक उड्डयन मन्त्रालयले मन्त्रिपरिषद्‌मा प्रस्ताव पठाएकोप्रति पूर्व पदाधिकारीहरुले आपत्ति जनाएका हुन्। उनीहरुले २ निकायलाई समायोजनको विषयमा सम्बन्धित सरकारवालाहरुसँग छलफल नै नगरी मन्त्रालयले प्रक्रिया अगाडि बढाएको भन्दै आपत्ति जनाएका हुन्।

पत्रकार सम्मेलनमा बोल्दै प्रतिष्ठानका पूर्वअध्यक्ष लाक्पाफुटी शेर्पाले ट्रेकिङ गाइड, हिमालसम्बन्धी प्रशिक्षण र अनुसन्धानकर्ता उत्पादनमा नेपाल पर्वतीय प्रशिक्षण प्रतिष्ठानको महत्त्वपूर्ण भूमिका रहेको बताइन्। प्रतिष्ठानलाई सरकारले अभिभावकीय जिम्मेवारी लिएर थप लगानी गुर्नपर्नेमा ठाँउमा खारेज गर्न खोजेर गैरजिम्मेवारपन देखाएको उनको भनाइ छ।

पर्वतीय प्रशिक्षण प्रतिष्ठानको पाठ्यक्रमलाई समयसापक्ष बनाउँदै लैजानु पर्नेमा न्याथमसँग समायोजन गरेर प्रतिष्ठानको औचित्य र हालसम्मका उपलब्धि समाप्त पार्न खोजेको शेर्पाले दाबी गरिन्। उनले न्याथमले हस्टिालिटी र प्रतिष्ठानले पर्वतीय शिक्षा, प्रशिक्षण र अनुसन्धानमा जोड दिँदै आएको भन्दै दुबै निकायको भुमिका फरक रहेको स्पष्ट पारिन्। जस कारण २ निकायलाई एकआपसमा गाभ्न नहुने शेर्पाको तर्क छ।

नेपाल पर्वत आरोहण प्रशिक्षक संघका प्रतिनिधि छिरिङ पान्दे भोटेले २ प्रतिष्ठानलाई समायोजन गरेर सरकारले पर्वतीय शिक्षालाई समाप्त पार्न खोजेको आरोप लगाए।

पर्वतीय शिक्षण प्रतिष्ठानले दक्ष जनशक्ति उत्पादन गरेर नेपालका हिमालहरुलाई विश्वमा चिनाउँदै आएको बताउँदै भोटेले थप सशक्त बनाउन सरकारलाई आग्रह गरे।

यस्तै, छिरिङ जाङबु शेर्पाले पर्वतीय क्षेत्रमा दक्ष कामदार र आरोहीहरु पलायन भइरहेको समयमा राज्यले यस्ता निकायलाई थप जिम्मेवार बनाउनु पर्नेमा राज्यले नै निष्क्रिय पार्न लागि परेको भन्दै आपत्ति जनाए।

उनले नेपालको हिमालका बारेमा विदेशमा गएर शिक्षा लिनुपर्ने अवस्था आउन नदिन शिक्षण प्रतिष्ठानलाई विश्वविद्यलयको रुपमा अगाडि बनाउन समेत सरकालाई आग्रह गरे।

प्रतिष्ठानका पुर्वअध्यक्ष सन्तोष थापा मगरले दक्ष जनशक्ति उत्पादन गर्ने थलोलाई सरकारले बेवास्ता गरेको बताए।

साथै, प्रतिष्ठानका गुडविल एम्बेस्डर सञ्जय खतिवडाले सरकारले समायोजन तयारी फिर्ता नलिए हिमाली पर्यटनमा आधारित व्यवसायी, मजदुर र विध्यार्थीहरु आन्दोलनमा उत्रिने चेतावनी दिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

ऊर्जा क्षेत्रको विकासमा सरकार कटिबद्ध छः मन्त्री खड्का

सन्तान बढी जन्माउन टोकियो सरकारले कर्मचारीलाई हप्तामा ३ दिन बिदा दिने

कांग्रेस महामन्त्री विश्वप्रकाश शर्मासहित पाँच युवाले गरे लोबुचे हिमालकाे सफल आरोहण