काठमाडौं– काठमाडौंको शंखरापुर नगरपालिका–३ लप्सी फेदीका स्थानीयले सुरक्षाकर्मीमाथि आक्रमण गरेका छन्। नेपाल प्रहरी र सशस्त्र प्रहरी बलको सुरक्षा पोस्ट राख्ने निर्णयको विरोधमा उत्रिएका स्थानीयले सुरक्षाकर्मीमाथि आक्रमण गरेका हुन्।
सरकारले काठमाडौंको शंखरापुर–३ मा सशस्त्र प्रहरी बलको बेस क्याम्प र नेपाल प्रहरीको पोस्ट राख्ने निर्णय गरेको थियो। जिल्ला सुरक्षा समिति, काठमाडौं निर्णयपछि सुरक्षा क्याम्प राख्न पुगेका सुरक्षाकर्मीमाथि स्थानीयले आक्रमण गरेका हुन्।
स्थानीयको आक्रमणमा सशस्त्र प्रहरी बलका नायव उपरीक्षक (डीएसपी) देवराज राई घाइते भएका छन्। नेपाल विद्युत् प्राधिकरणले लप्सी फेदीमा सब–स्टेशन निर्माणको काम अगाडि बढाएको छ। स्थानीयहरुले भने विद्युत् सब–स्टेशन निर्माणको पनि विरोध गर्दै आएका छन्।
विद्युत् सब–स्टेशनसँग स्थानीय स्तरमा सुरक्षा व्यवस्था कायम राख्न जिल्ला सुरक्षा समितिले लप्सी फेदीमा सशस्त्र प्रहरीका डीएसपीको नेतृत्वमा बेस क्याम्प र प्रहरीको सुरक्षा पोस्ट राख्ने निर्णय गरेको थियो।
विद्युत् सब–स्टेशन निर्माणको विरोधमा रहेका स्थानीयबासी प्रहरीको सुरक्षा पोस्ट समेत बन्ने भएपछि झन् आक्रोशित बनेका हुन्। स्थानीयको आक्रमणमा सशस्त्र प्रहरी बलका डीएसपीसहित केही प्रहरी घाइते भएका छन्। प्रहरीले आक्रमणमा संलग्न ४ जनालाई नियन्त्रणमा लिएर कारबाही प्रक्रिया अघि बढाइएको बताएको छ।
तामाकोशी तथा सुनकोशी नदी र तिनीहरूका सहायक खोलाहरूमा निर्माण भएका तथा हुने जलविद्युत् आयोजनाको विद्युत् काठमाडौं उपत्यकामा ल्याउन र स्थानीय रूपमा आपूर्तिका लागि नेपाल विद्युत् प्राधिकरणले शंखरापुर नगरपालिका–३ स्थित बोझेनीमा ४००-२२०-१३२-११ केभी क्षमताको सब-स्टेसन निर्माण गर्न लागिरहेको छ।
सब-स्टेसन निर्माणका लागि आवश्यक पर्ने ५० जना जग्गाधनीहरूको करिब १७४ रोपनी जग्गा अधिग्रहण गरिएको छ। जग्गा धनीहरूले मुआब्जा तथा क्षतिपूर्ति रकम सहमतिले बुझिसकेका छन्। मुआब्जा तथा क्षतिपूर्ति बापत करिब ५० करोड रुपियाँ वितरण गरिएको छ।
तर, स्थानीयहरु भने मानव बस्तीमा सब-स्टेसन निर्माण गर्न नहुने र यसलाई अरू नै ठाउँमा सार्नुपर्ने माग राख्दै विरोध गरिरहेका छन्। त्यस क्षेत्रमा हुने विरोधको नेतृत्व राष्ट्रिय सीमान्तकरण विरुद्ध अभियान (समान) समान, नेपालले गरिरहेको छ।
विद्युत् प्राधिकरणका कार्यकारी निर्देशक कुलमान घिसिङले स्थानीयका जायज मागलाई पूरा गरिएको बताउँदै आएका छन्। तर केही गैरसरकारी संस्था र असम्बन्धित व्यक्तिहरूको उक्साहटका कारण सब-स्टेसन निर्माणमा अवरोध घिसिङको भनाइ छ।
लप्सी फेदीसम्म विद्युत् ल्याउन प्रसारण लाइन निर्माण अन्तिम चरणमा पुगेको र सब-स्टेसन निर्माण गर्न नसकिएमा उक्त विद्युत् प्रवाह गर्न नसकी काठमाडौं उपत्यकामा लोडसेडिङ गर्नु पर्ने अवस्था आउन सक्ने घिसिङले बताउँदै आएका छन्।
उक्त सब-स्टेसनमा रामेछापको नयाँ खिम्तीबाट सुरु भइ सिन्धुपाल्चोकको बाह्रबिसे हुँदै लप्सी फेदीसम्मको ४०० केभी प्रसारण लाइन जोडिने छ। नयाँ खिम्ती–बाह्रबिसे–लप्सी फेदी ४०० केभी प्रसारण लाइन निर्माणको काम अन्तिम चरणमा छ। लम्सीफेदी सब-स्टेसनबाट भक्तपुरको चाँगुनारायणसम्मको १३२ केभी प्रसारण लाइन र सब-स्टेसन निर्माणाधीन छन्। चाँगुनारायणमा १३२ केभी क्षमताको सब-स्टेसन सम्पन्न हुने चरणमा छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
