काठमाडौं– प्रधानमन्त्री केपी शर्मा ओलीले उद्घाटन गरेको विराटनगरस्थित गोबरग्यास प्लान्ट सञ्चालनमा आएको तीन सातामै बिग्रिएको छ।
पानी परेपछि ग्यास उत्पादन गर्ने स्थानमा क्षति पुग्दा उत्पादन बन्द भएको हो।
विराटनगर महानगरपालिका १४ जतुवास्थित श्रीकृष्ण गौसेवा सदनमा रहेको गोबर ग्यास प्लान्टको ‘मेम्ब्रेन’मा समस्या आएपछि उत्पादन रोकिएको हो। ‘कमजोर खालको ‘मेम्ब्रन’मा परेको पानीको प्रेसर थेग्न नसकेपछि भत्कियो,’ उक्त फार्मका एक कर्मचारीले भने, ‘अहिले भारतीय प्राविधिक ल्याएर मर्मत गर्ने काम भइरहेको छ।’
प्रधानमन्त्री ओलीसहित तीन मन्त्रीले भदौ ५ गते विराटनगर पुगेर सो गोबरग्यास प्लान्टको उद्घाटन गरेका थिए।
प्लान्ट उद्घाटन गर्ने क्रममा प्रधानमन्त्री ओलीले सिलिन्डर ग्यास प्रयोग गर्ने युग समाप्त भएको घोषणा गर्दै यो प्लान्ट सानो भए पनि महत्वपूर्ण उपलब्धि भएको दाबी गरेका थिए। तर उनी फर्केको केही सातामै समस्या आएको हो।
ऊर्जामन्त्री वर्षमान पुन, कानुन न्याय तथा संसदीय व्यवस्थ मन्त्री भानुभक्त ढकाल, संघीय मामिला तथा सामान्य प्रशासनमन्त्री लालबाबु पण्डितसमेत उद्घाटन कार्यक्रममा सहभागी थिए।
२ सय ६४ घनमिटरको गोबरग्यास प्लान्ट निर्माण गरिएको थियो। सो प्लान्टबाट उत्पादित ग्यास ३२ घरमा पाइपका माध्यमबाट वितरण गरिँदै आएको छ। गौसेवा र वैकल्पिक ऊर्जा प्रवर्द्धन केन्द्रले संयुक्त रुपमा गोरबग्यास प्लान्टको निर्माण गरेका थिए।
गौसेवासँग सम्बद्ध शंकर अग्रवालले भने वरिपरिका थप घरमा समेत ग्यास विस्तार गर्ने क्रममा रहेकाले ग्यास उत्पादन बन्द गरिएको दाबी गरेका छन्। १ करोड ५० लाख रुपैयाँमा सो प्लान्ट निर्माण गरिएको थियो, जसमा वैकल्पिक ऊर्जा केन्द्रको ८० र गौसेवाको २० प्रतिशत लगानी छ।
विराटनगरका मेयर भीम पराजुलील भने प्लान्ट बिग्रेको कुरा घुमाउरो रुपमा स्विकार गर्दै पुन: सञ्चालनमा आउने बताए । ‘कहीँकहीँ बिग्रेको होला त्यो बन्छ। छिटै सञ्चालनमा आउँछ,’ मेयर पराजुलीले भने, ‘ठूलो समस्या हैन। कहिलेकाहीँ समस्या आउँछ।’
मेयर पराजुलीले नगरको महत्वको योजना भएकाले यो बन्द हुने विषयमा कुनै सोच र सम्भावना नरहेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
