च्याङ्ग्रा व्यापारमा व्यस्त छन् गाउँपालिकाका पूर्व अध्यक्ष

कृषि

नेपाल लाइभ सोमबार, असोज २९, २०८० १०:२६

अन्नपूर्ण– बझाङको साइपाल गाउँपालिका–१ का राजेन्द्रबहादुर धामीले २०६८ सालदेखि पोखरामा च्याङ्ग्रा झार्न थालेका हुन्। उनले गाउँमा च्याङ्ग्रा पालन गरी बर्सेनि दशैंको समयमा बेच्न पोखरा ल्याउने गर्थे। विसं २०७४ को स्थानीय तहको निर्वाचनमा उनी बझाङको साविकको काँडा गाउँपालिका अध्यक्ष पदमा विजयी भए।

यसलगत्तै उनी सबै काम छाडेर गाउँलेको सेवामा लागे। गाउँलेकै आग्रहमा काँडा गाउँपालिकाको नाम साइपाल गाउँपालिकामा परिवर्तन गरे। जनप्रतिनिधि भएर काम गर्दा उनले च्याङ्ग्रा व्यापार धेरै सम्झिए।

गाउँको सेवामा लागिरहँदा यसमै लत बसिसकेको थियो। जनताको सुख दुःखमा साथ दिँदादिँदै ५ वर्ष बित्यो। २०७९ सालमा पुनः स्थानीय तहको निर्वाचन हुने भयो। उनलाई फेरी जनप्रतिनिधि भएर काम गर्ने मन थियो। तर, पार्टीले टिकट दिएन। ‘पाँच वर्ष सेवा गरे अझै काम गर्ने मन थियो,’ उनले भने, ‘पार्टीले टिकट दिएन, अनि फेरि परिवारले सम्हालेको च्याङ्ग्रा पालन तिर लागे।’

उनलाई गाउँपालिकाको अध्यक्ष हुँ भन्ने दम्भ कहिल्यै भएन। काम भनेको सानो ठूलो हुँदैन भन्ने उनको सिद्धान्त छ। ‘म त पूर्वजनप्रतिनिधि हुँ भन्ने कहिल्यै लागेन। अहिले पनि गाउँलेको सेवामा हाजिर हुन्छु,’ उनले भने, ‘काम सानो ठूलो लाग्दैन। मैले च्याङ्ग्रा पालनसँगै जडीबुटी खोज्ने र व्यापार पनि गर्छु।’

धामी अहिले पोखरामा च्याङ्ग्रा धपाइरहेको अवस्थामा भेटिन्छन्। उनी दशैंका लागि १२७ च्याङ्ग्रा लिएर शुक्रबार पोखरा आएका हुन्। ‘दशैंमा पोखरामा च्याङ्ग्रा धेरै बिक्री हुन्छ। यसैले बझाङदेखि ३ दिन ३ रात काटेर च्याङ्ग्रा लिएर आएको हुँ,’ उनले भने, ‘मैले ल्याएको १२७ च्याङ्ग्रामध्ये आफैँले पालेको ८० वटा छ। अरु गाउँलेसँग किनेर ल्याएको छु।’

ल्याएको च्याङ्ग्रा सप्तमीसम्म सबै बिक्री हुनेमा उनी विश्वस्त छन्। यहाँको व्यापारबाट भएको आम्दानीले बझाङ फर्किएर धुमधामसँग दशैं मनाउँने उनको योजना छ। ‘सप्तमीसम्म सबै बिक्छ। यसबाट २ लाख जति नाफा होला कि भन्ने सोचेको छु। के थाहा घाटा पनि हुनसक्छ,’ धामीले भने, ‘अष्टमीतिर घर फर्कने अनि दशैं मनाउने भन्ने योजना छ।’ उनले पोखरा ल्याएको च्याङ्ग्राको मूल्य २५ हजारदेखि ५० हजार रुपैयाँसम्म तोकेका छन्।

अन्य समयमा भने उनी बझाङमै च्याङ्ग्रा बेच्ने गर्छन्। यो व्यापारबाट १ वर्षमा १० देखि १२ लाख आम्दानी गर्ने गरेको उनले बताए। ‘गाउँपालिका अध्यक्षमा जिताएर त्यहाँका जनताले अनुभव गर्ने अवसर दिनुभएको थियो। मैले उहाँहरुको सेवा पनि गरेँ,’ उहाँले भन्नुभयो, ‘अहिले यो व्यापार गरिरहेको छु। दुवैतिर दुख नै छ। मलाई जनप्रतिनिधि हुँदा र व्यापारी हुँदा उस्ताउस्तै लागेको छ।’

अवसर पाए पुनः जनताको सेवा गर्ने इच्छा रहेको बताउने उनी पार्टीले नपत्याए आफ्नै व्यापार व्यवसाय अघि बढाउने सोचमा छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

तीन उपकुलपति नियुक्त

दुई खर्ब भन्दा बढीले बढ्यो वैदेशिक सहायता

सम्पति शुद्धीकरण निवारणमा नेपालको अवस्था सुधार्न उच्चस्तरीय बैठक