काठमाडौं– अख्तियार दुरुपयोग अनुसन्धान आयोगको प्रमुख आयुक्तमा प्रस्तावित नवीनकुमार घिमिरेविरूद्ध संसदीय सुनुवाइ समितिले उजुरी आह्वान गरेको छ।
घिमिरेका विगत र अख्तियारको आयुक्तको रुपमा सम्पादन गरेको कार्यका बारेमा १० दिनभित्र उजुरी दिने सार्वजनिक सूचना जारी गरेको हो। संवैधानिक परिषद्को भदौ २० को बैठकले कार्यबाहक प्रमुख आयुक्त घिमिरेलाई प्रमुख आयुक्तमा सिफारिस गरेको थियो। संसदीय समितिले असोज १ गतेभित्र समितिमा आफै आएर वा जिल्ला प्रशासन कार्यालयमार्फत् उजुरी पठाउन सूचनामा भनिएको छ।
समितिले उजुरीमा नाम थर, वतन र सम्पर्क माध्यम खुलाउनुपर्ने जनाएको छ। संसदीय समितिले उजुरीकर्ताले चाहेमा व्यक्तिगत विवरण गोप्य राख्नेछ। संवैधानिक परिषद्ले सिफारिस गरेको नामलाई संसदीय सुनुवाइ समितिले सुनुवाइ गरी अनुमोदन गर्ने संवैधानिक व्यवस्था रहेको छ।
प्रमुख आयुक्तमा सिफारिस भएका घिमिरे पूर्व गृहसचिवका रुपमा नेपाल सरकारको निजामती सेवाबाट अवकाश पाएका व्यक्ति हुन्। घिमिरेसँग रक्षा सचिवको जिम्मेवारीको समेत अनुभव छ।
संवैधानिक परिषदको २०७१ फागुन १५ को निर्णयबाट आयुक्त सिफारिस भएका घिमिरेलाई सोही वर्ष चैतमा आयुक्त नियुक्त गरिएको थियो।
२०१२ भदौ २९ मा जन्मिएका घिमिरे सार्वजनिक सुनवाइ समितिबाट अनुमोदन भएमा २०७७ चैतसम्म प्रमुख आयुक्त पदमा बहाल रहनेछन्। आयोग ऐन अनुसार ६५ वर्ष उमेर वा ६ वर्षे कार्यकाल जुन अगाडि आउँछ, सोही अनुसार अवकाश पाउने व्यवस्था छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
