काठमाडौं– देश–विदेशको श्रम बजार व्यवस्थित गर्दै लैजानका लागि सरकारले अनलाइन प्रणाली विकास गर्ने भएको छ।
श्रम, रोजगार तथा सामाजिक सुरक्षा मन्त्रालयले निर्माण गर्दै गरेको अनलाइन पोर्टल ‘फरेन जब सर्च’बाट देश–विदेशका रोजगारीका विषयमा थाहा पाउन सकिने र रोजगारीका लागि आवेदनसमेत दिन मिल्ने छ।
वैदेशिक रोजगारीमा जाने वा आन्तरिक श्रम बजारमै रोजगारीको खोजीमा रहेका कामदारलाई छिटो, छरितो तथा आवश्यक जानकारी अनलाइनबाटै दिने ‘फरेन जब सर्च’ पोर्टलको विकास गरिएको श्रम मन्त्रालयले जनाएको छ।
श्रम मन्त्रालयका अनुसार उक्त पोर्टलबाट विदेशका रोजगारदाता कम्पनीमा आवेदन दिएर रोजगारीका अवसरका बारेमा बुझ्न र काम गर्न इच्छुक व्यक्तिले पोर्टलमा आएका मागका विवरण हेरेर आवेदनसमेत दिन सक्नेछन्।
प्राविधिक निर्माणको प्रक्रिया अन्तिम चरणमा रहेको सो अनलाइन पोर्टल असोज महिनादेखि सञ्चालनमा ल्याउने वैदेशिक रोजगार विभागको तयारी छ।
मन्त्रालयका अनुसार विभिन्न मुलुकमा रहेका कूटनीतिक नियोगले रोजगारदाता कम्पनीबाट डिमाण्ड ल्याएर मागपत्र प्रमाणीकरण गरेपछि वैदेशिक रोजगार विभाग अन्र्तगतको श्रम कार्यालयले पुष्टि गरेसँगै उक्त पोर्टलमा अद्यावधिक गरिने छ। त्यसपछि सोझै उक्त पोर्टलमा गई रोजगारीका अवसर र प्रकारका विषयमा थाहा पाउन सकिन्छ।
कामको विवरण, मागपत्र ल्याउने म्यानपावरको विवरण र सञ्चालकका सम्पूर्ण जानकारी अनलाइन पोर्टलमै समावेस गरिने छ। जसले गर्दा कामदारले सोझै अनलाइन आवेदन तथा सम्बन्धित म्यानपावरसँग सम्पर्क गर्न सकिने र एजेन्टबाट ठगिने समस्याको अन्त्य हुने विभागका प्रवक्ता उद्धवप्रसाद रिजालले दाबी गरे।
हाल रोजगारीका लागि विदेश जाने कामदारले रोजगारदाता कम्पनीबाट आएका मागपत्रका विषयमा सोझै थाहा पाउने अवस्था छैन। म्यानपावर कम्पनीले वा एजेन्टले कामका विषयमा उनीहरुलाई जानकारी दिने गरेका छन्। पोर्टल सञ्चालनमा आएपछि कस्तो काम, कति तलब, काम गर्ने समय, बीमा र रोजगारदाता कम्पनीका विषयमा सजिलै थाहा पाउन सकिने विभागका प्रवक्ता रिजालले बताए्।
पोर्टल सञ्चालनमा आएपछि वैदेशिक रोजगारीमा जान चाहने नेपाली युवाले विदेशका रोजगारदाता कम्पनीमा सिधै आवदेन दिएर अनलाइन अन्तवार्ता दिन पनि सक्ने उनको भनाइ छ।
अनलाइन पोर्टल सञ्चालनमा आएपछि धेरै युवा लाभान्वित हुने विश्वास विभागले लिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
