काठमाडौं– वाणिज्य तथा उपभोक्ता संरक्षण विभागले मंगलबारदेखि चाडपर्वलक्षित अनुगमन सुरु गरेको छ। असोज १ गतेबाट अनुगमन सुरु भएको विभागका महानिर्देशक तीर्थ चिलुवालले जानकारी दिए।
‘म यहाँ हाजिर भएको दिनदेखि अनुगमन पनि सुरु गरिएको छ। यो अनुगमन विगतमा जस्तै गरी गरीनेछ। विशेषगरी बजार प्रणाली व्यवस्थित गर्ने गरी हुनेछ। विशेष गरी खाद्य, लत्ताकपडा, मिठाइ पसल, माछामासु पसललाई टार्गेट गरिएको छ,’ चिलुवालले भने।
बजारमा अखाद्यवस्तु तथा म्याद गुज्रेका वस्तु बिक्री गर्ने तथा कालोबजारी गर्ने व्यापारीलाई कारबाही गर्नुका साथै बजारको नीति नियममा रहेर व्यवसाय गर्नेलाई प्रोत्साहन तथा बजार प्रवर्द्धन गर्ने समेत चिलुवालको भनाइ छ।
बजार अनुगमनका लागि विभागले संघीय मामिला तथा सामान्य प्रशासन मन्त्रालयमा कर्मचारीसमेत माग गरेको चिलुवालले जानकारी दिए। नियामक निकाय खाद्य प्रविधि तथा गुण नियन्त्रण विभाग, गुणस्तर तथा नापतौल विभाग, राजस्व विभाग, आन्तरिक राजस्व विभाग, कृषि, पशुलगायत विभागलाई कर्मचारी मागिएको उनको भनाइ छ।
यी सबै कर्मचारीको समूह बनाएर कम्तीमा १० टोलीबाट संयुक्त अनुगमन गर्ने विभागको लक्ष्य रहेको उनले जानकारी दिए।
उक्त अनुगमनमा विभागले १० वटा टोली खटाउने लक्ष्य राखेको भएता पनि अहिले ५ वटा टोलीमात्रै पठाइएको विभागका निर्देशक आनन्दराज पोखरेलले जानकारी दिए।
‘विभागको १० वटा टोलीसम्म अनुगमनमा पठाउने लक्ष्य हो। तर स्थानीय निकाय, सिडियो कार्यालय लगायतलेसमेत अनुगनको तयारी गरिहेका छन्। यो वर्ष अघिल्ला वर्षमा भन्दा कढाइकासाथ अनुगमन हुन्छ,’ उनले भने।
विभागले विशेषगरी चाडपर्वलाई लक्षित गरी खाद्यान्न, माछामासु र तयारी कपडा पसलहरुमा अनुगमन गर्ने उनको भनाइ छ।
‘चाडपर्वमा विशेष गरी आवश्यक पर्ने खाद्य, मिठाई, मासु, दूध, लत्ताकपडा, ड्राइफुड हुन्। त्यतिबेला राजमार्गका होटललगायतमा बढी चहलपहल हुन्छ। बढी भीडभाड हुने क्षेत्रमा ठगी हुने सम्भावना पनि उत्तिकै रहन्छ। यी क्षेत्रलाई टार्गेट गरी अनुगमन गर्ने तयारी छ,’ उनले भने।
विभागले यसअघि नै चाडवाड लक्षित अनुगमन गर्ने भनिए पनि महानिर्देशकको सरुवासँगै संयुक्त अनुगमनको मिति सरेको पाइएको छ। भदौ २५ को मन्त्रीस्तरीय बैठकले विभागका महानिर्देशक गजेन्द्र ठाकुरलाई उद्योग वाणिज्य तथा आपूर्ति मन्त्रालयमा सरुवा गरेको छ। र विभागमा सहसचिव तीर्थ चिलुवाललाई पदस्थापन गर्ने निर्णय गरेको थियो।
अख्तियार दुरुपयोग अनुसन्धान आयोगअन्तर्गत रहेका चिलुवालले असोज १ बाट मात्रै विभागमा हाजिर भएपछि संयुक्त अनुगमन सुरु भएको छ।
गतवर्ष पनि असोज १ बाट चाडपर्व लक्षित अनुगमन भएको थियो। कात्तिक मसान्तसम्म १ हजार ७७ वटा व्यावसायिक फर्ममा अनुगमन गरिएको वाणिज्यले जनाएको छ।
अनुगमनका क्रममा २ सय २९ व्यावसायिक फर्म कारबाहीमा परेका थिए। तिनबाट २९ लाख ६५ हजार जरिवाना असुल भएको थियो। तर, अनुगमन राजस्व लक्षित मात्रै हुने गरेको आरोप विभागलाई लाग्दै आएको छ।
यस्तै अहिले बजारमा चिनीमा अचाक्ली बढेको मूल्य नियन्त्रणका लागि विभागले भन्सार र उद्योगसँग समन्वय गरी मूल्य बढ्नुको कारणबारे अध्ययन भइरहेको पोखरेलले जानकारी दिए।
‘मूल्य के कारणले वृद्धि भइरहेको छ भन्नेबारे पहिला त ब्यागराउन्डबाटै थाहा पाउनुपर्यो। हामी भन्सारसँग समन्वय गरेर तथ्यांक दिइरहेका छौँ। यसपछि मूल्य नियन्त्रणका काम अघि बढाउने छौं,’ पोखरेलले भने।
यस्तै उपभोक्ता हित संरक्षण मञ्च नेपालका उपमहासचिवले अनुगमन निकायका कर्मचारी सरुवा गर्दा चाडपर्व लक्षित अनुगमनमा ढिलाइ भएको बताए। तर यसअघि अनुगमन निकायले नीतिगत काम नगरेको उनको भनाइ छ। अब आउँदो दिनमा अनुगमन प्रभावकारी हुने उनको भनाइ छ।
‘अनुगमन प्रभावकारी नभएसम्म मूल्य नियन्त्रण हुँदैन। अनुगमन ढिलो भयो। तर यो वर्ष अलि नयाँ योजन छन्। अनुगमन निकायका जनशक्तिसमेत नयाँ आएका छन्। अब बजारमा व्यवस्थित होला कि,’ तिमिल्सिनाले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786801196.jpg)
-1786602170.png)
