काठमाडौं – एक महिनामै देशको व्यापार घाटा एक खर्ब नाघेको छ। चालु आर्थिक वर्ष २०८०/८१ को पहिलो महिना साउनमा १ खर्ब १५ अर्ब ७१ करोड ३ लाख रुपैयाँ बराबर व्यापार घाटा भएको छ। यस अवधिमा १ खर्ब २९ अर्ब २३ करोडको वस्तु आयात भएकोमा निर्यात १३ अर्ब ५२ करोड रुपैयाँ भएको केन्द्रीय भन्सार विभागले जनाएको छ।
नेपालको वैदेशिक व्यापारमा निर्यातको हिस्सा ९.४८ प्रतिशत छ भने आयातको हिस्सा ९०.५२ प्रतिशत रहेको छ। चालु आर्थिक वर्षको पहिलो महिनाको आयात गत आर्थिक वर्षको यसै महिनाको तुलनामा १.५६ प्रतिशत कम हो। गत वर्ष साउनमा १ खर्ब ३१ अर्ब रुपैयाँको वस्तु आयात भएको थियो।
निर्यातमा ८.६५ प्रतिशतको कमी आएको छ। अघिल्लो आर्थिक वर्षको पहिलो महिनामा १४ अर्ब ८० करोड रुपैयाँको निर्यात भएको थियो। आयात र निर्यात दुवैमा आएको गिरावटले चालु आर्थिक वर्षको पहिलो महिनामा वैदेशिक व्यापारमा गिरावट आएको देखिन्छ।
अघिल्लो वर्ष साउनमा कुल १ खर्ब ४२ अर्ब ७६ करोड रुपैयाँको वैदेशिक व्यापार घाटा भएको थियो। यो चालु आर्थिक वर्षको तुलनामा २.२८ प्रतिशत बढी हो। उक्त अवधिमा कुल १ खर्ब ४६ अर्ब रुपैयाँको वैदेशिक व्यापार भएको थियो।
एक महिनामै २२ अर्बको पेट्रोल आयात
चालु आर्थिक वर्षको साउन महिनामा झण्डै २२ अर्बको पेट्रोल आयात भएको छ। २१ अर्ब ९८ करोड ४४ लाख ९० हजार रुपैयाँको पेट्रोलीयम पदार्थको आयात भएको तथ्यांकले देखाएको छ। गत आर्थिक वर्षको भन्दा यो कम हो। अघिल्लो वर्ष साउनमा पेट्रोलियम पदार्थ २५ अर्ब रुपैयाँभन्दा बढीको आयात भएको थियो।
यसैगरी आइरन र स्टिलको १२ अर्ब ९५ करोड रुपैयाँ बराबरको आयात भएको छ। यस आर्थिक वर्षमा आइरन र स्टिलको आयात बढेको देखिन्छ। गत वर्षको साउनमा ११ अर्ब २३ करोड रुपैयाँ बराबरको आइरत र स्टिल आयात भएको थियो।
यस्तै साढे २ अर्ब रुपैयाँको तरकारीजन्य वस्तुको आयात भएको छ। गत वर्षको पहिलो महिनामा २ अर्ब ८१ करोडको औषधि आयात भएको छ। जसअनुसार तरकारीजन्यवस्तु आयातमा पनि गिरावट देखिएको छ। ४ अर्ब २९ करोड रुपैयाँको सवारी साधन र यसको पार्टपुर्जा आयात भएको छ। गत वर्षको पहिलो महिनामा यस्तो वस्तुको आयात ४ अर्ब ६४ करोड रुपैयाँ बराबरको भएको थियो।
साढे एक अर्बको चिया-कफी निर्यात
चालु आर्थिक वर्षको पहिलो महिनामा नेपालबाट १ अर्ब ६७ करोड ९५ लाख रुपैयाँ बराबरको चिया-कफी निर्यात भएको छ। त्यसपछि १ अर्ब १९ करोड ४४ लाख बराबरको फलाम-स्टिल निर्यात भएको छ। ७४ करोड ६७ लाख रुपैयाँ बराबरको पशुको आहारा निर्यात र ४८ करोड २० लाख रुपैयाँ बराबरको नेपाली धागो निर्यात भएको छ। ३८ करोड १५ लाख रुपैयाँ बराबरको तेलजन्य वस्तुको बीउ नेपालले निर्यात गरेको छ।
भारतसँग मात्रै
नेपालको सबैभन्दा ठूलो व्यापार भारतसँग हुँदै आएको छ। चालु आर्थिक वर्षको साउन महिनामा भारतबाट ८१ अर्ब २४ करोडको आयात भएको छ। ८ अर्ब ४ करोड रुपैयाँको निर्यात भएको छ। भारतसँग मात्र ७२ अर्ब ७६ करोड रुपैयाँको व्यापार घाटा रहेको छ।
चीनबाट २१ अर्ब ९४ करोडको वस्तु आयात हुँदा ३९ करोड रुपैयाँको मात्र निर्यात भएको छ। साउनमा १०९ मुलुक भन्दा बढीसँग वैदेशिक व्यापार भएको भन्सार विभागको तथ्यांक छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787224333.jpeg)
-1786783778.jpg)
-1786602170.png)
-1786513116.png)
