रुपन्देही– नेपालको संविधानमा जनताले सहज र सर्वुलभ रुपमा स्वास्थ्य सेवा पाउने अधिकार हुनेछ भन्ने उल्लेख छ। पछिल्लो केही वर्षयता स्वास्थ्य सेवा र शिक्षालाई लिएर लामो समयदेखि बहस र रस्साकसी पनि नचलेको होइन। उक्त अवस्था हालसम्म पनि यथावतै छ। तर माग गरिएजसरी र संविधानमा उल्लेख भए बमोजिम स्वास्थ्य सेवा पाउन नसकेको गुनासो सुन्न धेरै टाढा गइराख्नु पर्दैन।
अधिकांश ग्रामिण क्षेत्रमा सामान्य स्वास्थ्य उपचार पाउन समेत कठिन यस्तो अवस्थामा सहरबासी समेत अछुतो भने छैनन्। त्यसमाथि महँगो बनिरहेको स्वास्थ्य सेवाका कारण कमजोर आर्थिक अवस्था भएकाहरुका लागि त उपचारभन्दा पीडा खेप्नु नै अन्तिम विकल्प बन्ने गरेको छ।
‘समृद्ध नेपाल सुखी नेपाली’को लक्ष्य बोकेर हिँडिरहेको सरकारको गतिलाई बुटवलको एक घटनाले गिज्याइरहेको प्रतित हुन्छ। उपचारबापतको रकम तिर्न नसक्दा नवलपरासी प्रतापपुरका सुरज विक अस्पताल भर्ना भएको १५ महिनापछि डिस्चार्ज भएको घटनाले स्वास्थ्य सेवाका क्षेत्रमा हाम्रो अवस्थालाई उदांगो पारिदिएको छ।
मोटरसाइकल दुर्घटनामा खुट्टा भाँचिएर बुटवलस्थित जेनस अस्पताल एन्ड रिर्सच सेन्टरमा भर्ना भएका विकलाई इलाका प्रशासन कार्यालय, इलाका प्रहरी कार्यालय, स्थानीय तह तथा अन्य सामाजिक संघसंस्था र व्यक्तिको पहलमा भर्ना भएको १५ महिनापछि शुक्रबार मात्रै डिस्चार्ज गरिएको छ।
दुर्घटनापश्चात् उनी २०७४ जेठ १४ गते अस्पताल भर्ना भएका थिए। चार ठाउँबाट खुट्टा भाचिँएका सुरजको उपचारको लागि झन्डै ६ महिना लागेको अस्पताल बताउँछ। तर, उपचारका क्रममा खर्च भएको करिब १२ लाख रुपैयाँ तिर्न नसकेपछि पछिल्लो ९ महिनादेखि सुरजलाई अस्पतालले डिस्चार्ज गर्न मानेन। त्यसकारण उनी अस्पतालमै बन्धक जस्तो जिन्दगी बाँच्न बाध्य भएका थिए।
अस्पतालबाट डिस्चार्ज हुनेबेला केही उज्यालो देखिएका सुरजले भने, ‘सध्य हुँदा पनि बिरामीको जीवन बाँच्नुपर्यो। अहिले बन्धकमुक्त भएझैँ लागेको छ।’
आफ्नो उद्धार गर्ने व्यक्ति तथा संस्थालाई धन्यवाद प्रकट गर्दै उनले उपचारका लागि आर्थिक अवस्था कमजोर भएर आफूले जस्तो पिडा भोग्न नपरोस् भन्ने कामना गरे। उनले भने, ‘गरिबले उपचार गर्नसक्ने अवस्था छैन। कि त पिडा खेप्दै मर्नुपर्यो कि त मैले जस्तै समस्या बेहोर्नुपर्यो। त्यसैले मेरोजस्तै अवस्था कसैको नआओस्।’
अस्पताल भर्ना भएको केही समय पारिवारिक सरसापट र केही मनकारीको सहयोगमा उपचार गराएपनि अन्ततः केही महिनापछि नै सुरजका अभिभावक अस्पतालको सम्पर्कमा आउन छोडेका थिए। ‘आफ्ना सन्तानको माया कसलाई नलाग्दो हो र हजुर?’, सुरजका बुवा भगवती विक भन्छन्, ‘पैसा छउन्जेल तिरियो, आफ्नो जायजेथा सबै सकिएपछि के लाग्दो रहेछ र?’ सुरजलाई बुवा र दाजु दिपकको जिम्मा लगाइएको छ।
सुरजको परिवारको आर्थिक अवस्थाका बारेमा विभिन्न सञ्चारमाध्यमबाट समाचार प्रकाशित भएसँगै अस्पतालले २५ प्रतिशत छुट दिने सहमति गरेको छ। इलाका प्रशासन कार्यालय बुटवल, इलाका प्रहरी कार्यालय बुटवल, बुटवल उपमहानगरपालिका–८ का प्रतिनिधिहरु, विभिन्न मिडियाका पत्रकार तथा अस्पताल प्रशासनबीच उपचार खर्चमा सहुलियत छुटबाहेक बाँकी रकम पुस मसान्तभित्र बुझाउने ७ बुँदे सहमति भएको छ।
सहमति पत्र:
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
