बैतडी- बैतडीको पाटन नगरपालिका-१० को नवनिर्मित वडा कार्यालय भवन निर्माण सम्पन्न भएको १ वर्षसम्म वडाध्यक्षले बुझ्न मानेका छैनन्। भवन निर्माण सम्पन्न भएपछि निर्माण व्यवसायीले वडा पाटन नगरपालिकालाई हस्तान्तरण गरेको एक वर्ष भए पनि वडाध्यक्ष धनबहादुर कुँवरले उक्त भवनबाट सेवा सुचारु गरेका छैनन्।
निर्वतमान वडा पदाधिकारीहरुले आफ्नो कार्यकालमा भवन बनेको भन्दै शिलालेख राखेका कारण नवनिर्वाचित अध्यक्षले बुझ्न नमानेपछि आफूले नगरपालिकालाई भवनको चाबी बुझाएको निर्माण कम्पनी एसके निर्माण सेवाले जनाएको छ।
नयाँ भवनबाट सेवा प्रवाह नहुँदा पुरानो जीर्ण भवनबाट सेवा प्रवाहमा समस्या रहेको छ। ‘पुरानो भवनमा केही कामको लागि गए पनि बस्ने ठाउँ छैन। उभिएर काम गरेर फर्किनु पर्छ,’ स्थानीय सुरेश पन्तले भने, ‘छिटो र सुविधा सम्पन्न भवन सुरु हुनुपर्छ।’
निर्वतमान वडाध्यक्ष देवेन्द्र कुँवरले आफ्नो कार्यकालमै भवन निर्माण भएको भनेर शिलालेख लागाएको बताए । उलने भने, ‘भवन उद्घाटनको शिलालेख लगाएका छैनौँ। हामीले भवन बनाएका हौँ भन्न मिल्छ। हाम्रै पहलमा भवन बनेको हो। हामीले बजेट हाल्न पहल गरेका हौँ। त्यसैले वडा पदाधिकारी र कर्मचारीहरूको संयुक्त बैठकबाट निर्णय गरेर शिलालेख लगाएका हौँ। वर्तमान वडा पदाधिकारीहरूले उद्घाटनको शिलालेख लगाउन सक्नुहुन्छ।’
वडा भवन बुझ्न नमानेका नवनिर्वाचित वडाध्यक्ष धनबहादुर कुँवरले भने निर्माणाधीन भवनमा शिलालेख लगाउनु गलत भएको बताउँदै आएका छन्। वडा कार्यालय भवन ६४ लाख लागतमा निर्माण सम्पन्न भएको हो।
शिलालेख लगाउने निर्वतमान वडाअध्यक्ष देवेन्द्र कुँवर शिलालेखका कारण भवन बुझ्न नमान्ने वर्तमान वडाध्यक्ष धनबहादुर कुँवर ३० वैशाखमा सम्पन्न स्थानीय तह चुनावका प्रतिस्पर्धी थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
