काठमाडौं– कृषि विकास कार्यालय हुम्लाका प्रमुखसहित तत्कालीन सव इन्जिनियर, वडाध्यक्ष र नर्सरी सञ्चालिकाविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ।
हुम्लाको अदानचुली गाउँपालिका–२ मा कर्णाली प्रदेश सरकारको अनुदानबाट हाइटेक नर्सरी स्थापना तथा सञ्चालनमा अनियमितता गरेको आरोपमा कृषि कार्यालय हुम्लाका कार्यालय प्रमुख भुषण झा र तत्कालीन सव इन्जिनियर भिमबहादुर रोकायविरुद्ध अख्तियारले मुद्दा दायर गरेको हो।
आर्थिक वर्ष २०७६/०७७ मा कृषि विकास कार्यालय हुम्लामार्फत् व्यवसायिक फलफुल नर्सरी प्रवर्द्धन कार्यक्रमअन्तर्गत दिइएको अनुदानबाट फलफूल प्रशोधन तथा भण्डार केन्द्र अदानचुली मकै हुम्लाले निर्माण गरेको नर्सरी तथा टनेल निर्माणमा फिल्डमा गरिएको कामभन्दा बढी देखाएर गलत नापी किताब, कार्यसम्पन्न प्रतिवेदन र अन्तिम बिल प्रमाणित गरी भुक्तानी गरिएको पाइएपछि अख्तियारले मुद्दा दायर गरेको हो।
अख्तियारका अनुसार फिल्डमा गर्दै नगरिएको कामकोसमेत भुक्तानी दिइ ४ लाख ३८ हजार ५५८ रुपैयाँ बराबरको हानीनोक्सानी पुर्यारएका थिए। उनीहरुविरुद्ध ४ लाख ३८ हजार ५५७ रुपैउँ बिगो कायम गरी विशेष अदालतमा मुद्दा दायर गरिएको हो।
यस्तै उक्त काममा सहयोग गरेको आरोपमा अदानचुली गाउँपालिका–२ का तत्कालीन दल बहादुर बुढाविरुद्ध पनि सोही रकम बिगो दाबी गर्दै मुद्दा दायर गरिएको छ। अख्तियारले उक्त फलफूल प्रशोधन तथा भण्डारण केन्द्रकी सञ्चालिका सुष्मा कार्की भण्डारीविद्ध पनि मुद्दा दायर गरेको छ।
कृषि विकास कार्यालयसँग गरिएको सम्झौता अनुसार टनेल तथा नर्सरीको पूर्ण काम सम्पन्न गरी नर्सरी सञ्चालनमा ल्याउनुपर्नेमा माटो काट्ने र ट्रस्टका कार्यहरुमात्र गरी कार्य पूरा भएको गलत नापी किताब, कार्य सम्पन्न प्रतिवेदन र झुट्टा बिल तयार गर्न लगाएर उक्त कागजातहरुमा हस्ताक्षर गरी फिल्डमा हुँदै नभएको कामकोसमेत भुक्तानी लिएको आरोपपत्रमा उल्लेख छ। उनीविरुद्ध पनि अख्तियारले ४ लाख ३८ हजार ५५७ रुपैयाँ बराबरको बिगो मागदाबी गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
