काठमाडौं- उपप्रधान तथा रक्षामन्त्री पूर्णबहादुर खड्काले शक्तिको दुरुपयोग गर्दा सशस्त्र प्रहरीका एक हवल्दारको मृत्यु भएको छ। रक्षामन्त्री खड्काले शक्तिको दुरुपयोग गर्दै काममा लगाएका हवल्दारको मंगलबार राति दुर्घटनामा परेर मृत्यु भएको हो।
घटना गत मंगलबार रातिको हो। बाँकेको राप्ती सोनारी गाउँपालिका–८ मुगुवा खोला नजिकै कार र बस आपसमा ठोक्किएका थिए। नेपालगञ्जबाट झापाको काँकडभिट्टाका लागि छुटेको भे१ख ३३३५ नम्बरको बस र विपरीत दिशाबाट आइरहेको बा१३च ८२५३ नम्बरको कार ठोक्किएका थिए।
बस र कार ठोक्किँदा कारमा सवार डा सञ्जु खाती खड्का र कारका चालक सुवास अधिकारीको मृत्यु भयो। डा सञ्जु कर्णाली प्रदेश अस्पताल सुर्खेतमा कार्यरत रहेको पाइयो भने चालक अधिकारी सशस्त्रका हवल्दार रहेको खुल्यो।
यी दुईको मृत्यु भएपछि डा सञ्जुको निजी चालकमा सशस्त्रका हवल्दार कसरी प्रयोग भए भन्ने प्रश्न उठेको छ। अनुसन्धानको क्रममा ती हवल्दार डा सञ्जुको निजी चालक बन्नुमा उपप्रधान तथा रक्षामन्त्री खड्को भूमिका रहेको देखिएको छ। सशस्त्र प्रहरी हेडक्वाटरले डा सञ्जुको निजी चालक हवल्दार कसरी भए भन्नेबारे गरेको आन्तरिक छानबिनको क्रममा रक्षामन्त्री पूर्णबहादुर खड्काको भूमिका रहेको औंल्याएको छ।
जस कारण सशस्त्र हवल्दारको मृत्यु हुने यो दुर्घटनाको साइनो रक्षामन्त्री खड्कासँग जोडिएको छ। दुर्घटनामा मृत्यु भएकी डा सञ्जु कांग्रेसका उपसभापति समेत रहेका उपप्रधान तथा रक्षामन्त्री पूर्णबहादुर खड्काकी बुहारी रहेको खुलेको छ।
रक्षामन्त्री खड्काका सहोदर भाइ डा डम्बरबहादुर खड्का कर्णाली प्रदेश अस्पतालका निर्देशक हुन्। दुर्घटनामा मृत्यु भएकी डा सञ्जु डम्बरबहादुरकी श्रीमती हुन्। जसकारण डा सञ्जु रक्षामन्त्री पूर्णबहादुरकी आफ्नै भाइबुहारी पर्छिन्। पूर्णबहादुरकै पहुँचका कारण निजी चालकको रुपमा अधिकारी खटिएको खुल्यो।
घटनाबारे आन्तरिक अनुसन्धान गरिरहेको सशस्त्र प्रहरी बलका प्रवक्ता तथा एसएसपी राजेन्द्र खड्काले बताए। कसैको निजी गाडी चालकमा कसरी प्रहरीका कर्मचारी प्रयोग भए? भनेर सोधिएको प्रश्नमा एसएसपी खड्का भन्छन्, ‘यो विषयमा हामी पनि अनुसन्धान गरिरहेका छौं। कसैको निजी गाडी चालक बनाएर हामीले पठाउने कुरा हुँदैन।’
बहालवाल मन्त्री पूर्णबहादुरले चालक तथा सुरक्षाका लागि सुरक्षाकर्मी माग गरिएकोमा उहाँलाई पठाइएको र तिनै चालकलाई पूर्णबहादुरले भाइबुहारीको चालक बनाएर पठाइएको हुनसक्ने सशस्त्र हेडक्वाटरले जनाएको छ। चालक हवल्दार कामाडौंबाट नै कार लिएर डा सन्ञुलाई सुर्खेत पुर्याउन हिँडेको पाइएको छ। सोही क्रममा उनको मृत्यु भएको हो। गोरखाको आँपपिपल घर भएका ३७ वर्षीय चालक अधिकारीका श्रीमती र दुई छोरी छन्।
डा सञ्जुको निजी चालक बनेर जाँदा दुर्घटनामा परी ज्यान गुमाएका हवल्दार चालकको दरबन्दी तथा कार्यरत कहाँ थिए भन्ने समेत सशस्त्र प्रहरीले खुलाएको छैन। भीआईपी/भीभीआईपीहरुका लागि चालक तथा सुरक्षाकर्मीहरु राज्यले उपलब्ध गराउँदै आएको छ।
तर, यसरी उपलब्ध हुने सुविधामा चरम दुरुपयोग हुँदै आएको छ। शक्तिको आडमा आवश्यकता तथा भीआईपी सुरक्षा कार्यविधिबेगर सुरक्षाकर्मी परिचालन हुने गरेका छन्। केही समयअघि मात्रै राष्ट्रिय स्वतन्त्र पार्टीका सभापति रवि लामिछाने गृहमन्त्री बनेपछि विशिष्ट व्यक्तिको सुरक्षा व्यवस्थापन कार्यविधि २०७७ विपरित भीआईपी सुरक्षामा खटिएका सुरक्षाकर्मीहरुको दुरुपयोग भएको भन्दै फिर्ता गराएका थिए।
अर्कोतर्फ भने शक्तिकेन्द्रको निकट बन्न तथा चाकडी बन्ने होडमा समेत उनीहरुलाई रिझाउनका लागि प्रहरी संगठन आफैंले समेत आवश्कताभन्दा बढी सुरक्षाकर्मी उपलब्ध गराउने गरेका छन्। जसकारण संगठनभित्रकै कर्मचारीको कारण पनि सुरक्षाकर्मीहरुको दुरुपयोग हुँदै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
