समाचार

काठमाडौंमा अव्यवस्थित तारको व्यवस्थापन सुरु

निमेषजंग राई सोमबार, वैशाख २५, २०८० १०:१९

काठमाडौं– काठमाडौं महानगरपालिका क्षेत्रभित्रका अव्यवस्थित तारहरु व्यवस्थित बनाउन तथा हटाउन थालिएको छ। काठमाडौं महानगरपालिका, दूरसञ्चार प्राधिकरण तथा इन्टरनेट सेवा प्रदायक कम्पनीका प्रतिनिधिहरुबीच भएको छलफलपछि सोमबारदेखि अव्यवस्थित तारहरु हटाउन थालिएको हो।

सोमबार बिहानदेखि काठमाडौंको माइतीघर र न्युरोड क्षेत्रका अव्यवस्थित तथा गुजुल्टो परेका र चुँडिएका तारहरुलाई व्यवस्थित बनाउने र हटाउने काम सुरु भएको छ।

यसअघि महानगरपालिकाले अव्यवस्थित तारहरु हटाउन भन्दै १५ दिने म्यादसहितको सूचना जारी गरेको थियो। इन्टरनेट सेवा प्रदायक कम्पनीहरुलाई वैशाख २७ गतेभित्र अव्यवस्थित तार हटाउन भनिएको थियो।

तार व्यवस्थित बनाउनका लागि रुट प्लान समेत तयार गरिएको दूरसञ्चार प्राधिकरणले जनाएको छ। प्राधिकरणका अनुसार माइतीघरदेखि एयरपोर्ट, त्रिपुरेश्वर देखि महाराजगञ्ज, न्युरोड–वसन्तपुर हुँदै असन, माइतीघर–पुतलीसडक हुँदै नारायणहिटी, भद्रकाली– नारायणहिटी– कमलादी हुँदै रानीपोखरीको रुट तय भएको छ।

यस्तै, डिल्लीबजार–अनामनगर हुँदै अन्तर्राष्ट्रिय सम्मेलन केन्द्र (संसद्‌ भवन), नक्साल–बालुवाटार हुँदै शीतलनिवास, माइतीघर–त्रिपुरेश्वर हुँदै कलंकी, लैनचौर–अस्कल–रानिबारी हुँदै सामाखुसी, सोह्रखुट्टे– ढल्को– ताहाचल हुँदै स्वयम्भू, सिनामंगल–पुरानो बानेश्वर हुँदै गौशाला, गौशाला–बौद्वनाथ तथा कालिमाटी–कुलेश्वर हुँदै बल्खुसम्मको रुट तय भएको छ।