काठमाडौं– संस्कृति, पर्यटन तथा नागरिक उड्डयनमन्त्री सुदन किरातीले सोमबार राति काठमाडौंबाट दुबई उड्ने क्रममा आगोको झिल्का देखिएको फ्लाई दुबईको जहाजमा चरा ठोक्किएको कुरा प्रमाणित नभएको बताएका छन्।
फ्लाई दुबईको फ्लाइट नम्बर ‘एफजेड५७६‘ ७२७–८ केएन जहाजमा त्रिभुवन अन्तर्राष्ट्रिय विमानस्थलमा टेकअफ गरेको ३० सेकेन्डमै आगोको झिल्को देखिएको थियो।
संयुक्त अरब ईमिरेट्सको दुबई सरकारले फ्लाई दुबईका प्रवक्तालाई उद्धृत गर्दै काठमाडौं विमानस्थलबाट उडान भर्नेवित्तिकै चरा ठोक्किएका कारण जहाजको इन्जिनमा आगो लागेको बताएको थियो। तर, पर्यटनमन्त्री किरातीले भने चरा ठोक्किएको विषय अहिलेसम्म प्रमाणित नभएको बताए।
नेपाल नागरिक उड्डयन प्राधिकरणले पनि जहाजको इन्जनमा आगो लाग्नुको कारण चरा ठोक्किएर भएको हो भन्ने विषय अहिलेसम्म प्रमाणित हुन नसकेको बताएको छ।
पर्यटनमन्त्री किरातीले गाउँमा गाई–भैंसीको गोठालाे गरेर आएको मान्छे (आफू) अहिले शहरमा हवाई जहाजको गोठालो गरिरहेको भन्दै जहाजको गोठालो गर्नु धेरै कठिन रहेको भन्ने हिजो (सोमबार) रातिको घटनाबाट थाहा पाएको टिप्पणी गरेका छन्।
पर्यटनमन्त्रीले सामाजिक सञ्जालमा लेखेका छन्:
गाउँमा गाई–भैंसी गोठालो गरेर आएको मान्छे हुँ, आज शहरमा हवाईजहाजको गोठालो गर्दैछु। गाई–भैंसीभन्दा हवाईजहाजको गोठालो गर्न धेरै कठिन रहेछ। आज (सोमबार) राति मैले राम्ररी थाहा पाएँ।
र, जहाँसम्म जहाजमा चरा ठोक्किएको हल्ला अहिलेसम्म प्रमाणित नभएको कुरा पनि सबैमा स्पष्ट गर्दछु। कृपया मेरो सबैमा बिन्ती छ नकारात्मक हल्ला गर्ने बानी हामी सबैले छोडौं। ‘कागले कान लग्यो भनेर कागलाई खेद्नु भन्दा पहिला आफ्नो कान छाम्नु पर्छ नत्र लडिन्छ,’ मेरो आमाले भन्नुहुन्थ्यो।
त्रिभुवन अन्तर्राष्ट्रिय विमानस्थलबाट नेपाली समयानुसार राति ९:२१ बजे उडान भरेको विमानबाट ठूलो आवाज आउनुका साथै आगोको झिल्को समेत देखिएको थियो। त्यसपछि विमान चालकले जहाजको बायाँ इन्जिनमा आगो लागेको भन्दै काठमाडौं एटीसी (एयर ट्राफिक कन्ट्रोल) सँग इमरजेन्सी ल्याण्डिङका लागि अनुमति लिएका थिए।
त्यसपछि जहाजले धार्केको आकाशमाथि फन्को लगाएको थियो। धार्केमाथि जहाजले फन्को लगाइसकेपछि विमान चालकले काठमाडौं एटीसीलाई सबै अवस्था नर्मल रहेको र दोस्रो इन्जिनबाट उडान जारी राखेर दुबई नै अवतरण गर्ने जानकारी दिएका थिए।
जहाज दुबईको स्थानीय समयानुसार राति १२:११ बजे दुबई अन्तर्राष्ट्रिय विमानस्थलमा अवतरण भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
