काठमाडौं– तनहुँ- १ मा राष्ट्रिय स्वतन्त्र पार्टीबाट उम्मेदवारी दिएका स्वर्णिम वाग्लेले बिहीबार एउटा चुनावी सभामा प्रधानमन्त्री पुष्पकमल दाहाल प्रचण्डप्रति कटाक्ष व्यक्त गरे। प्रधानमन्त्री प्रचण्डले आफू नेतृत्वको सरकारको मन्त्रिमण्डल पूरा गर्न नसकेको तर जनतासँग मत माग्दा भने जिताएर पठाए मन्त्री बनाउँछु भनेकोप्रति वाग्लेको असन्तुष्टि थियो।
बुधबार तनहुँमा आयोजित चुनावीमा सभामा सम्बोधन गर्दै प्रधानमन्त्री प्रचण्डले गोविन्द भट्टराईलाई जिताएर पठाए मन्त्री बनाउने आश्वासन दिएका थिए। उनले त्यस्तै अभिव्यक्ति चितवनमा पनि दोहोर्याएका थिए। आफ्नै प्रतिद्वन्द्वीलाई मन्त्री बनाउने भन्दै भोट अपिल गरेपछि वाग्लेले कटाक्ष व्यक्त गरेका हुन्।
‘स्वर्णिम वाग्लेलाई हराऊ, मेरा प्रतिद्वन्द्वीको नामै लिएर उनलाई पनि मन्त्री बनाउँछु भनेर उहाँहरु दाबी गर्दै हुनुहन्छ। मलाई त्यसप्रति त्यति आपत्ति पनि थिएन’, वाग्लेको भनाइ थियो, ‘अहिले भइरहेको मन्त्रिमण्डल पनि पूरा गर्न नसकिरहेको व्यक्तिले मन्त्री बाँड्दै हिँडेर यसरी लोकतान्त्रिक अभ्यासको खिल्ली उडाउनु त्यति राम्रो होइन।’
वाग्लेको अभिव्यक्ति तथ्यमै आधारित छ। किनकि, प्रचण्ड नेतृत्वमा सरकार गठन भएको ४ महिना बितिसकेको छ। पुरानो गठबन्धन भत्किए पनि कांग्रेस सहितको पछिल्लो गठबन्धनले पनि ६ हप्ता पूरा गरिसकेको छ। तर, मन्त्रिमण्डल भने पूर्ण भएको छैन। कहिले हुन्छ भन्ने पनि निश्चित छैन। यस्तो अवस्थामा उनी उपनिर्वाचनका उम्मेदवारलाई मन्त्री बनाउने आश्वासन बाँड्दै हिँडेका छन्। मानौँ, अहिले मन्त्री बनाउन सांसद उपलब्ध नभएको होस् र उपनिर्वाचनमा जित्ने बित्तिकै तात्तातै मन्त्री बनाउन पाइहालियोस्। जबकि, अहिले पनि मन्त्री बन्न कांग्रेसमै तँछाडमछाड चलिरहेको छ।
मन्त्रीहरु नहुँदा मन्त्रीस्तरबाट हुने महत्त्वपूर्ण कामहरुमा अवरोध भइरहेको छ। तैपनि, प्रधानमन्त्री प्रचण्ड ‘काम गरेर देखाउने’ संकथनमा छन्। केही हप्ताअघिसम्म १६ वटा मन्त्रालय एक्लै चलाएका प्रचण्डको काँधमा अहिले पनि स्वास्थ तथा जनसंख्या, युवा तथा खेलकुद, वन तथा वातावरण, खानेपानी र कानुन मन्त्रालयको जिम्मेवारी छ।
प्रधानमन्त्री बनेदेखि गठबन्धन फेर्ने, राष्ट्रपति कसलाई बनाउने, उपनिर्वाचनमा कसलाई जिताउने जस्ता काममा व्यस्त भएका प्रचण्डले जनतामा आशा सिर्जना गर्न सकेका छैनन्। मुख्यतः ‘मन्त्रिपरिषद्लाई नै पूर्णता दिन नसक्ने प्रधानमन्त्रीले अरु के गर्लान्?’ भन्ने आम बुझाइले उनीप्रति निराशा बढ्दै गएको छ। त्यसको सम्बोधन गर्न छाडेर उनी भने चुनावी सभामा मन्त्री पद बाँड्दै हिँडिरहेका छन्।
चुनावी सभामा प्रचण्डको सारथी बनिरहेका छन्, कांग्रेस सभापति शेरबहादुर देउवा। संयोग पनि कस्तो देखिन्छ भने देउवा मन्त्री बनाउँछु भन्छन्, प्रचण्ड त्यसलाई अनुमोदन गर्छन्। जबकि, भागबण्डा मिलिसकेको संघीय मन्त्रिमण्डलमा देउवाले कांग्रेसको तर्फबाट नाम दिन नसक्दा पनि मन्त्री नियुक्त हुन सकेको छैन।
देउवालाई कांग्रेसबाट मन्त्रीको नाम छिटो दिनुस् भन्न नसकेका प्रचण्ड तनहुँ र चितवन पुगेर मन्त्री खोजिरहेका छन्। खासमा चुनावी सभामा उनीहरुको ‘मन्त्री बनाउने’ भाषणको जुगलबन्दीले उनीहरुलाई नै गिज्याइरहेको जस्तो देखिन्छ।
देउवा-प्रचण्डले के भने?
चितवन- २ को सभामा देउवाः जितनारायणले जित्यो भने मैले मन्त्री बनाउन प्रधानमन्त्री प्रचण्डजीलाई सिफारिस गर्छु। त्यो भन्दा बढ्ता के गर्ने? त्यसकारण जित्ने र जिताउने काम तपाईंहरुको हो। अरु काम मेरो र प्रधानमन्त्री प्रचण्डजीको हो। जसरी पनि जिताउनुहोला बाँकी काम हामीलाई छोड्दिनु होला। हामी मन्त्री बनाएरै छोड्छौँ भनेर विश्वास दिलाउन चाहन्छु।
चितवन-२ को सभामा प्रचण्डः शेरबहादुरजीले छोटोमा, तर मनको कुरा गर्नुभयो। उहाँले जितनारायणलाई जिताउनुहोस्, म मन्त्रीमा सिफारिस गर्छु भन्नुभयो। उहाँले सिफारिस गरेपछि मैले मन्त्री बनाउँछु। मैले भन्ने त्यही हो। त्यसकारण तपाईंहरुको काम जिताउने भयो। हाम्रो काम उहाँलाई अधिकारसम्पन्न मन्त्री बनाएर विकास निर्माण र समृद्धिको यात्रामा अगाडि बढाउन सघाउने।
चितवन- २ मा उम्मेदवार बनेका जितनारायण श्रेष्ठ कांग्रेसका तर्फबाट सत्ता गठबन्धनका साझा उम्मेदवार हुन्।
त्यसअघि तनहुँको चुनावी सभालाई पनि सम्बोधन गर्दै देउवा र प्रचण्डले त्यहाँका उम्मेदवार भट्टराईलाई जिताए मन्त्री बनाउने घोषणा गरेका थिए। त्यहाँ भएको चुनावी सभामा शेरबहादुर देउवाले भनेका थिए, ‘गोविन्द भट्टराईलाई तपाईंहरुले जिताउनुहोस्। म मन्त्री बनाएर पठाउँछु।’
देउवाको भाषणलाई अनुमोदन गर्दै प्रधानमन्त्री प्रचण्डले भनेका थिए, ‘म प्रधानमन्त्री छु। मन्त्री बनाउने मैले हो अहिले। मलाई विश्वास छ तपाईंहरुले रामचन्द्रजीलाई जस्तै अत्यधिक मतले गोविन्द भट्टराईजीलाई विजयी गराउनुहोला। बाँकी काम शेरबहादुर देउवाजीले जिम्मा लिइसक्नु भयो। म शेरबहादुरजी सँगै छु।’
नेताद्वयको मंत्री बनाउने आश्वासनले निर्वाचन आचारसंहिताको उल्लङ्घन भएको भन्ने आरोप पनि लागेको छ, यद्यपि त्यसबारे कुनै औपचारिक उजुरी परेको छैन।
प्रचण्ड र देउवाको आश्वासनले सकारात्मक सन्देश प्रवाह गर्न नसकेको सामाजिक सञ्जालमा तत्कालै व्यक्त भएका धारणाले प्रतिबिम्बित गर्छन्। उनीहरुको अभिव्यक्तिलाई नजिकबाट नियालेका विवेकशील साझाका उपाध्यक्ष मिलन पाण्डेले जनमतको विश्वास लिन दलहरुले ‘फुच्चे ट्रिक’ लगाएको प्रतिक्रिया दिएका छन्।
‘अझै पनि ‘जिताएर पठाउनुहोस् मन्त्री बनाउँछु’ भन्दै रहेछन्। २०८० सालमा पनि त्यही ‘फुच्चे ट्रिक’ नै लगाउँदै रहेछन्’, फेसबुकमा पाण्डेले लेखेका छन्, ‘प्रधानमन्त्रीलाई त बाल नदिने पुस्तालाई लोभ्याउन ‘मन्त्री’ वाला फुच्चे ट्रिक। नयाँ पुस्तासँग तपाईंहरूको लेभल नै मिल्दैन।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781580295.jpg)
-1786602170.png)
-1789631269.jpg)
