एउटै सभाहलमा नेविसंघका दुईवटा कार्यक्रम, संस्थापन पक्षसँग इतर समूह आक्रामक

राजनीति

भूपेन्द्र शाह ठकुरी शुक्रबार, माघ २०, २०७९ २०:३८

काठमाडौं– प्रमुख प्रतिपक्ष दल नेपाली कांग्रेसको भ्रातृ संगठन नेपाल विद्यार्थी संघमा गुटगत राजनीति चुलिँदै गएको छ।

बिहीबार प्रदर्शनी मार्गस्थित नेपाल ल क्याम्पसको एउटै सभाहलमा नेविसंघका दुईवटा छुट्टाछुट्टै व्यानरमा कार्यक्रम भए। ‘राष्ट्रियता, लोकतन्त्र,समाजवाद र विद्यार्थी एकता’ दुईवटै ब्यानरमा लेखिएको एउटै नारा थियो।

नारा जे भए पनि उनीहरुको कार्यक्रमको उद्देश्य भने फरक थियो। कांग्रेसको संस्थापक पक्ष अर्थात सभापति शेरबहादुर देउवानिकट नेविसंघले खुला अन्तरक्रिया कार्यक्रम राखेको थियो।अर्कोतिर संस्थापन इतर अर्थात डा शेखर कोइराला पक्षले चाहिँ नेविसंघको वैधानिकतामाथि नै खबरदारी गरेको थियो।

संस्थापक पक्ष भन्छ– मेलमिलाप र एकताको सन्देश दिने हाम्रो उद्देश्य

कार्यक्रमको उद्देश्यमाथि प्रकाश पार्दै नेविसंघ ल क्याम्पसका अध्यक्ष सुरज सेजुवालले दुई उद्देश्य सुनाए। उनले भने, ‘आजको कार्यक्रम मुख्यगरी दुई उद्देश्यसहित गरेका हौं। पहिलो नेविसंघ भित्रको मेलमिलाप कायम गर्ने र दोस्रो एकताको सन्देश दिनका लागि हो।’

संस्थापक पक्षको कार्यक्रममा करिब १२ जना विद्यार्र्थीको उपस्थिति देखिन्थ्यो। तर, संस्थापन इतर पक्षमा भने काठमाडौं उपत्यका भित्रका सम्पूर्ण क्याम्पसका प्रतिनिधिसहित सभाहल भरिभराउ रहेको थियो।

इतरको आरोप– कार्यक्रम भाड्ने उद्देश्यले संस्थापक पक्षले कार्यक्रम गरेको हो

संस्थापक पक्षले आफ्नो पूर्वनिर्धारित कार्यक्रम भाँड्ने उद्देश्यले हतार–हतार कार्यक्रम गरेको संस्थापक इतर पक्षका विद्यार्थी नेता सिद्धराज जोशीले आरोप लगाए। उनले भने, ‘हामीले कार्यक्रम तय गरेसकेका थियौं। संस्थापन पक्षको कुनै कार्यक्रम नै थिएन। हाम्रो कार्यक्रमलाई भाँड्ने उद्देश्यले उनीहरुले हामीले नै तय गरेको स्थान र सभाहलमा कार्यक्रमको आयोजना गरे। यो प्रष्ट रुपमै भाँड्ने नियत देखिन्छ।’

इतरद्वारा स्ववियु समिति गठन

संस्थापन इतर समूहका विद्यार्थीको भेलाले आगामी चैत ५ मा हुने स्वतन्त्र विद्यार्थी युनियनको निर्वाचनलाई सफल बनाउनका लागि भन्दै निर्वाचन तयारी समिति गठन गरेको छ।

नेविसंघ वैधानिक पूर्णताको माग, स्ववियु निर्वाचनको तयारी र नेविसंघ भित्रको एकाधिकारवादका विरुद्ध खवरदारी भेला गर्दै इतर समूहका विद्यार्थी नेताहरुले भेलाबाट स्ववियु निर्वाचन तयारी समितिहरु गठन गरेको हो।

इतर पक्षको भेलाले स्ववियु निर्वाचन लक्षित १३ वटा समिति गठन गरेको ई.भुवन भट्टले जानकारी दिए। भट्टले भने, ‘चैत्र ५ गते स्ववियु निर्वाचन हुँदैछ। पछिल्लो समय नेविसंघभित्र एकाधिकारवाद हाबी भएको छ।

स्ववियु निर्वाचनमा नेविसंघले अपेक्षित परिणाम ल्याउनका लागि संगठनलाई विधिसम्मत तवरले आम सहमतिका आधारमा अगाडि बढाउन आवश्यक छ। तत्काल नेविसंघको पूर्ण वैधानिक समिति गठन गर्न अपरिहार्य छ।

त्यसकारण हामीले वैधानिक पूर्णताको माग गर्न र स्ववियु निर्वाचनको तयारीका लागि विधार्थी भेला बोलाएर १३ वटा समिति गठन गरेका छौं।’

भेलाले घोषणापत्र निर्माण समिति संयोजमा धर्मराज शाही, स्ववियु परिचालन समिति संयोजक ई सुवास पौडेल, स्ववियु प्रचार प्रसार समिति संयोजक ई भुवन भट्ट, स्ववियु समन्वय समिति संयोजक विक्रम आदित्य सिंह, स्ववियु जिल्ला समन्वय समिति संयोजक राजकुमार बस्नेत, सुझाव संकलन समिति संयोजक सुशान्त आचार्य, उपत्यका क्याम्पस इकाई समन्वय समिति संयोजक नवीन केडी र युवा विद्यार्थी परिचालन समिति संयोजक जयराम बडाललाई जिम्मेवारी दिएको छ।

त्यसैगरी, नेविसंंघ सम्पर्क समिति परिचालन समिति संयोजक तीर्थ मिश्र, स्ववियु निर्वाचन प्रशिक्षण समिति संयोजक ताराबहादुर थापा, अन्तर प्रदेश समन्वय समिति तपेन खड्का, अन्तर विश्वविद्यालय समन्वय समित संयोजक मुना कँडेल तथा प्राविधिक विद्यार्थी समन्वय समिति संयोजकमा सुजन सापकोटालाई चयन गरिएको छ।

संस्थापन इतरका विद्याार्थी नेताहरुले नेविसंघका अध्यक्ष डुजाङ शेर्पामाथि विधानविरीतका काम गरेको आरोप लगाए। उनले अवैधानिक तरिकाले नेविसंघको विधान सातौ संशोधन पार्टीकोे केन्द्रीय कार्यसम्पादन समितिको निर्णय नम्बर २ विपरीत गुटगट काम गरेको इतरको आरोप छ। शेर्पाले स्वार्थका आधारमा देशभर विभिन्न जिल्ला, क्याम्पसमा अवैधानिक निर्णय गरी बाँडेका चिट्ठीहरु आफ्नो समूहलाई मान्य नहुने भन्दै इतर पक्ष्ँका नेताहरुले तत्काल खारेज गर्न सामुहिक रुपमा माग गरेका छन्।

त्रिवि केन्द्रीय क्याम्पसका नेता गोपाल बमले कांग्रेसजस्तो लोकतान्त्रिक पार्टीमा नेता छान्ने पद्धति टिके हुनु र चिठ्ठीका आधारमा नेता तय गर्ने विषय इतिहासकै दुःखद र गलत रहेको टिप्पणी गरे। त्यसैगरी, नेविसंघकी नेतृ प्रेमिका रानामगरले नेविसंघ अध्यक्ष शेर्पाले गुटगत रुपमा चिट्ठीमार्फत जिम्मेवारी तोक्ने विषयको विरोध गरिन्। उनले इतर पक्षका विद्यार्थीहरुलाई हतोत्साहित नभएर स्ववियुको तयारीमा जुट्न निर्देशन दिँदै स्ववियुको टिकट दिलाउने आश्वस्त पारिन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।