काठमाडौं- बालुवाटारस्थित ललिता निवासको ११३ रोपनी सरकारी जग्गा कीर्ते गरेको आरोपमा भ्रष्टाचार मुद्दा लागेका अख्तियार दुरुपयोग अनुसन्धान आयोगका पूर्वप्रमुख आयुक्त दीप बस्न्यातले वारेसमार्फत मुद्दा लड्न पाउने भएका छन्।
विशेष अदालत काठमाडौंमा विचाराधीन रहेको मुद्दामा वारेस राख्न पाउनुपर्ने माग गर्दै बस्न्यातले निवेदन दिएका थिए। उनको निवेदनमाथि विशेषले अनुमति दिने आदेश गरेको हो।
विशेष अदालतका अध्यक्ष श्रीकान्त पौडेल, न्यायाधीशहरु रमेशकुमार पोखरेल र शालिकराम पोखरेलको इजलासले यस्तो अनुमति दिएको हो।
भ्रष्टाचार मुद्दामा सुरुमा विशेषले बस्न्यातलाई पुर्पक्षका लागि थुनामा पठाउने आदेश गरेको थियो। विशेषले उक्त प्रकरणमा तीन जना अभियुक्तलाई मात्र थुनामा पठाउने आदेश गरेको थियो। उक्त आदेशविरुद्ध बस्न्यात सर्वोच्च पुगेका थिए।
कोभिड- १९ का कारण स्वास्थ्यमा समस्या आएको र मुटुको गम्भीर समस्या भएको दावी गर्दै उनी धरौटीमा रिहा हुनुपर्ने माग गरेर सर्वोच्च पुगेका थिए। सर्वोच्चले उनलाई धरौटीमा रिहा गर्ने आदेश गरेको थियो। उक्त आदेशपछि उनी थुना बाहिर रहेर मुद्दा लडिरहेका छन्।
अख्तियारले बालुवाटारको ११३ रोपनी सरकारी जग्गा कीर्ते गरी व्यक्तिको नाममा दर्ता गरेको अभियोगमा ४ मन्त्री र तीन पूर्वसचिवसहित १ सय १० जनाविरुद्ध २०७६ माघ २२ गते भ्रष्टाचार मुद्दा दायर गरेको थियो। अख्तियारकै पूर्व प्रमुख आयुक्त, भूमिसुधार तथा मालपोतका कर्मचारी, जग्गा खरिद-बिक्री गर्नेहरूविरुद्ध पनि मुद्दा दायर भएको थियो।
मुद्दा दायर गरिएकामा नेपाली कांग्रेसका नेता विजय कुमार गच्छदार तथा भाटभटेनीका सञ्चालक मीनबहादुर गुरुङसमेत थिए। विशेष अदालतले उनीहरुलाई फागुनमै अदालत उपस्थित हुन म्याद जारी गरेको थियो।
लकडाउन खुकुलो भएसँगै अदालत खुल्न थालेपछि केही आरोपी अदालतमा उपस्थित भए पनि गच्छदारसहितका केही भिआइपी पछि उपस्थित भएका थिए। उक्त प्रकरणमा अहिले मुख्य बिचौलिया भनिएका शोभाकान्त ढकालमात्र थुनामा रहेका छन्। अन्य अभियुक्तहरु धरौटी र साधारण तारेखमा रिहा भएका छन्।
विशेषले उक्त मुद्दालाई अन्तिम सुनुवाइमा अघि बढाएको छ। विशेषले म्याद तामेल हुन नसकेका आरोपितहरुको हकमा सार्वजनिक सूचना प्रकाशित गर्दै मुद्दा अघि बढाएको हाे।
केही दिनअघि विशेषले अख्तियारकै पूर्वआयुक्त राजनाराण पाठकलाई भ्रष्टाचार मुद्दामा दोषी ठहर गर्दै ३ वर्ष ३ महिना कैद र ३९ लाख जरिवाना गर्ने फैसला गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1787821306.jpg)
-1786513116.png)
