समाचार

‘नाट्यमणि’मा बालबालिकाको ‘???’

मनिष अर्याल बिहीबार, पुस २१, २०७९ १६:४०

काठमाडौं– घरमा हुँदा बालबालिका र अभिभावकबीचको द्वन्द्व र प्रविधिको विकाससँगै बढ्दै गएको दूरी र सो वातावरणमा हुर्किएका बालबालिकाको शैक्षिक अवस्थामा पर्ने असरबारे नेपाल प्रज्ञा प्रतिष्ठानमा नाटक मञ्चन गरिएको छ।

वृहस्पति विद्या सदनले आयोजना गरेको ‘नाट्यमणि’ वार्षिक नाटक प्रदर्शनीमा करिब १५० विद्यार्थीले ‘???’ शीर्षकको नाटक प्रदर्शन गरेका हुन्। करिब एक महिनाको तयारी गरेर उनीहरुले आफ्नो नाटक देखाए।

‘पुस्तकमा भएका नाटक मात्रै पढ्दा विद्यार्थीले रंगमञ्चमा कसरी नाटक प्रस्तुत गरिन्छ भन्ने थाहा पाउन सक्दैनन्, त्यसकारणले उनीहरुलाई यसको प्रयोगात्मक पक्षका बारेमा जानकारी दिनका लागि पनि यो आयोजना गर्ने गरिएको छ’, विद्यालयकी सञ्चार संयोजक डोल्मा लामाले भनिन्।

करिब २ घण्टा लामो नाटक समारोहमा घरमा अभिभावकहरुले आफ्ना बालबालिकालाई समय दिन नसक्दा उनीहरुको पढाइ र व्यक्तित्व विकासमा पार्ने असरलाई देखाइयो। यस क्रममा सहरीका साथै ग्रामिण परिवेशलाई समेत समेटियो।

‘यो नाटकमा हामीले ग्रामिणका साथै सहरी क्षेत्रमा पनि देखिएको अभिभावक र विद्यार्थीबीचको सम्बन्ध बिग्रदै गएको अवस्था र यसो हुनु पछाडीको मनोसामाजिक कारणलाई नाटकमार्फत् देखाउने प्रयास गरिएको छ’, स्कुलका प्रिन्सिपल कुमार थापाले भने।

दुई नाट्य प्रशिक्षकले तयार पारेको पटकथालाई विद्यार्थीको सुझाव र अनुभवसहित संशोधन गरेर करिब एक महिनाको तयारीमा नाटक प्रस्तुत गरिएको थापाले जानकारी दिए।

कार्यक्रममा विङ्गस् स्नेल शीर्षको नाटक पनि मञ्चन गरिएको थियो।

हेर्नुहोस् तस्बिरमा :