काठमाडौं– कतारमा जारी विश्वकप फुटबलअन्तर्गत मंगलबार मध्यराति दुई युरोपेली टोली पोर्चुगल र स्विट्जरल्याण्ड भिड्दैछन्। दुवै टोलीको लक्ष्य अन्तिम १६ को यो खेल जित्दै क्वार्टरफाइनलमा स्थान बनाउनु हुनेछ।
आज राति स्विट्जरल्याण्डविरुद्ध उत्रँदा पोर्चुगिज कप्तान क्रिस्टियानो रोनाल्डोले पुरानो सुखद नतिजा पक्कै सम्झिने छन्। सन् २०१९ को जुन ५ मा भएको युरोपियन नेसन्स लिगको सेमिफाइनलमा उनले स्विट्जरल्याण्डविरुद्ध ह्याट्रिक गरेर ३–१ को जित निकाल्दै आफ्नो टोलीलाई फाइनलमा पुर्याएका थिए। पोर्चुगलले नेदरल्याण्ड्सलाई १–० ले हराएर नेसन्स लिगको पहिलो उपाधि नै जितेको थियो।
रोनाल्डोले स्विट्जरल्याण्डविरुद्ध सनसनीपूर्ण ह्याट्रिक गरेको साढे तीन वर्षपछि उनी आज सोही टोलीविरुद्ध उत्रँदै छन्। त्यो पनि विश्वकपको नकआउट चरणमा। जारी विश्वकपमा रोनाल्डोको प्रदर्शन सोजेजस्तो भएको छैन। उनले हालसम्म एक गोलमात्रै गरेका, त्यो पनि पेनाल्टीमा। यसर्थ, रोनाल्डो स्विट्जरल्याण्डविरुद्ध आफूले हासिल गरेको पहिलेकै नतिजा दोहोर्याएर आफू लयमै रहेको देखाउन चाहन्छन्। पोर्चुगलजस्तो दाबेदार मानिएको टोलीलाई क्वार्टरफाइनलमा पुर्याउनु त छँदै छ।
यता, स्विट्जरल्याण्ड सन् १९५४ मा घरमै भएको विश्वकपमा क्वार्टरफाइनलमा क्वार्टरफाइनलमा पुगेयता अन्तिम १६ भन्दा अघि बढ्न सकेको छैन। यसर्थ, आज स्टार खेलाडीले भरिएको पोर्चुगललाई हराउँदै नयाँ इतिहास बनाउन चाहन्छ।
यी दुई चिरपरिचित प्रतिद्धन्द्धीबीच हालसम्म २५ पटक भेट भएको छ। जसमा स्विट्जरल्याण्डको पल्ला केही भारी छ। स्विट्जरल्याण्डले ११ पटक जितेको छ भने पोर्चुगलले ९ पटक नतिजा आफ्नो पक्षमा पारेकोे छ। तीनपटक भने बराबरी भएको छ। पोर्चुगल समूह ‘एच’को विजेताको रूपमा अन्तिम १६ मा पुगेको हो। अर्कोतिर, स्विट्जरल्याण्ड भने समूह ‘जी’को उपविजेता भएको हो। यसरी हेर्दा समूह चरणमा पोर्चुगलले केही राम्रो प्रदर्शन गरेको बुझ्न सकिन्छ ।
साथै, स्विट्जरल्याण्डसँग भएका पछिल्ला पाँच खेलमा पनि पोर्चुगलले तीन खेलमा जित हात पारेको छ। तीनमा भने स्विट्जरल्याण्डले जित निकालेको छ। फिफा वरीयतामा पनि पोर्चुगल अगाडि छ। यसर्थ, आजको खेलमा स्टार खेलाडीले भरिएको पोर्चुगलले जित्ने सम्भावना बढी रहेको फुटबल पण्डितहरूले बताइरहेका छन्। तर, स्विट्जरल्याण्ड यस्तो टोली हो जसले प्रमुख प्रतियोगितामा ठूला टोलीलाई हराउने गरेको इतिहास छ। यसर्थ, जसले जिते पनि आजको खेल रोमाञ्चक र प्रतिस्पर्धात्मक हुने अनुमान गरिएको छ।
८.४५ बजे हुने आजको पहिलो प्रि–क्वार्टरफाइनलको खेलमा मोरक्को र स्पेन आमनेसामने हुँदैछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
