मोरक्कोविरुद्ध स्पेनः अफ्ठ्यारो सीमाना भएका दुई छिमेकी, फुटबलमा पनि प्रतिद्वन्द्वीता बढ्दै

फिचर

दीपेन्द्र सापकोटा मंगलबार, मंसिर २०, २०७९ १५:११

काठमाडौं– मोरक्को अफ्रिकी मुलुक हो भने स्पेन युरोपेली। झट्ट हेर्दा यिनीहरूबीच कुनै सरोकार छैन भन्ने लाग्ला! तर, सरोकार छ।

स्पेनका क्युटा र मेलिल्लाजस्ता भू-भाग उत्तर अफ्रिकी मुलुक मोरक्कोसँग जोडिएका छन्। स्पेनका यी दुई भाग र मोरक्कोबीचको सीमानालाई संसारकै अफ्ठ्यारो सीमाना मानिन्छ। यही अफ्ठ्यारो सीमानाका कारण मोरक्को र स्पेनका बीच विवाद भइरहन्छ।

यो त भयो राजनीतिक कुरा, अब फुटबलतिर जाउँ। कतारमा जारी विश्वकपअन्तर्गत प्रि–क्वार्टरफाइनल खेलमा मंगलबार साँझ यिनै विवाद भइरहने दुईबीच प्रतिस्पर्धा हुँदैछ ।

मोरक्को समूह ‘एफ’को विजेताको रूपमा अन्तिम १६ मा पुगेको हो। स्पेन समूह ‘ई’को उपविजेता भएपछि मोरक्कोसँग भेट पक्का भएको हो।

स्पेन अन्तर्राष्ट्रिय फुटबल महाशक्ति राष्ट्र हो। यता, मोरक्को पनि अफ्रिकन फुटबलको पुरानो शक्ति। यी दुईबीच हालसम्म तीन खेल भएको छ। जसमा स्पेनले मोरक्कोमाथि दुई जित निकालेको छ। एक खेल भने बराबरीमा टुंगिएको छ।

सन् २०६१ मा भएको विश्वकप छनोटको अन्तरमहादेशीय प्ले अफमा दुई खेलमै शतप्रतिशत जित निकाल्दै स्पेन चिलीमा भएको १९६२ को विश्वकपका लागि छनोट भएको थियो।

पहिलो खेल मोरक्कोको मैदानमा भएको थियो। सो खेल स्पेनले १–० ले जितेको थियो। यस्तै, अर्को खेल स्पेनमा भएको थियो। त्यो पनि स्पेनले नै ३–२ ले जितेको थियो।

FIFA World Cup 2018 - Spain vs Morocco: VAR-aided goal gives Spain top spot | MARCA in English

याे त पुरानो प्रतिद्वन्द्वीता भयो। सन् २०१८ पछि मोरक्को र स्पेनबीच नयाँ प्रतिद्धन्द्धीता सुरु भएको छ। रुसमा भएको सो विश्वकपको समूह चरणको खेलमा मोरक्को र स्पेनबीच २–२ गालको बराबरी भएको थियो। त्यो खेल निकै तनाबपूर्ण भएको थियो। त्यसमा दुई देशका खेलाडीबीच सीमा विवादको तुष झल्किन्थ्यो। २–१ ले पछि परेको अवस्थामा अन्तिम समयमा गोल गर्दै स्पेनले खेल बराबरी गर्योे। योे नतिजाले स्पेन समूह विजेता बन्दै नकआउट चरणमा पुग्यो भने मोरक्को समूह चरणबाटै बाहिरियो।

मंगलबार साँझ यी दुईबीच झनै ठूलो खेल हुँदैछ। दुवै टोलीको क्वार्टरफाइनलमा पुग्ने भएकाले खेल प्रतिस्पर्धात्मक हुने अनुमान गरिएको छ। तुलनात्मक कमजोर आँकिएको मोरक्को क्रोएसिया र बेल्जियमसम्मिलित टोलीमा शीर्ष स्थानमा रहँदै अन्तिम १६ मा पुगेको हो।

यसर्थ, उ सन् २०१० को विश्वविजेता स्पेनलाई स्तब्ध बनाउँदै पहिलोपटक विश्वकपको क्वार्टरफाइनलमा पुग्न चाहन्छ। यता, स्पेन पनि समूह चरणमा भएका गल्ती सुधार्दै मोरक्कोमाथिको विगतको वर्चश्व कायम राख्न चाहन्छ। अफ्ठ्यारो सीमाना भएका यी दुई देशबीच विश्वकपको ठूलो मञ्चमा प्रतिस्पर्धा हुँदा त्यहाँ राजनीतिक गन्ध आउनसक्ने सम्भावना भने प्रबल छ।

मोरक्कोका कतिपय खेलाडी स्पेनमै व्यवसायिक फुटबल खेल्छन्। कतिपय त त्यही जन्मिएका पनि छन्। यसर्थ, यी दुई देशका खेलाडी भेटिँदा आज खाली दुश्मनीमात्र हुँदैन खेल सकिएपछि भाइचारा पनि देखिन सक्छ।