काठमाडौं– अर्जेन्टिना र फ्रान्स कतारमा जारी विश्वकप फुटबलको फाइनलमा प्रवेश गरेका छन्। २ पटकको विश्वविजेता अर्जेन्टिना छैँटौपटक फाइनलमा प्रवेश गरेको हो। यता, समान २ पटकको विश्वविजेता फ्रान्स भने चौथोपटक फाइनलमा स्थान बनाउन सफल भएको छ। यहाँ हामीले सबैभन्दा धेरै फाइनलमा खेल्ने ६ राष्ट्रबारे जानकारी दिन गइरहेका छौं। जसको अग्र स्थानमा जर्मनी रहेको छ।
१. जर्मनी– ८ पटक
जर्मनी सर्वाधिक ८ पटक विश्वकपको फाइनलमा पुगेको राष्ट्र हो। जर्मनीले विश्वकप ४ पटक जितेको छ। जर्मनीले १९५४, १९७४, १०९० र २०१४ गरी ४ पटक विश्वकप जितेको हो। जर्मनीले सन् १९५४ मा स्विट्जरल्याण्डमा भएको विश्वकप पहिलोपटक जितेको थियो। त्यो विश्वकपको फाइनलमा जर्मनीले हंगरीलाई ३–२ गोल अन्तरले पाखा लगाएको थियो।
त्यस्तै, घरेलु मैदानमा भएको १९७४ को विश्वकप पनि जर्मनीले नै जितेको थियो। प्रमुख प्रतिद्धन्द्धी नेदरल्याण्ड्सलाई २–१ ले हराउँदै जर्मनी दोस्रोपटक च्याम्पियन बनेको थियो। यसैगरी, १९९० मा इटालीमा भएको विश्वकपमा अर्जेन्टिनालाई १–० ले हराउँदै जर्मनी तेस्रोपटक विश्वविजेता बनेको थियो।
जर्मनीले चौथोपटक भने ब्राजिलमा विश्वकप जित्यो। अर्जेन्टिनालाई नै १–० गोल अन्तरले पाखा लगाउँदै जर्मनीले चौथोपटक उपाधि जितेको थियो। यसँगै जर्मनी दक्षिण अमेरिकामा विश्वकप जित्ने हालसम्म पहिलो र एकमात्र राष्ट्र बनेको छ।
यस्तै, समान ४ पटक नै जर्मनी विश्वकपको फाइनलमा पराजित भएको छ। जर्मनी १९६६ मा घरेलु टोली इंग्ल्याण्डसँग ४–२ ले पराजित भएको थियो। यस्तै, १९८२ मा स्पेनमा भएको विश्वकपको फाइनलमा जर्मनी इटालीसँग ३–१ ले हारेको थियो। मेक्सिकोमा भएको १९८६ को विश्वकपमा जर्मनी अर्जेन्टिनासँग ३–२ ले पराजित भएको थियो। यसैगरी, दक्षिण कोरिया र जापानमा भएको २००२ मा जर्मनी ब्राजिलसँग २–० ले पराजित भएको थियो। ६२ र ८६ गरी लगातार २ पटक जर्मनी फाइनलमा पराजित भएको थियो। १९५४ देखि १९९० सम्मका फाइनल जर्मनीले पश्चिम जर्मनीको नाममा खेलेको थियो। सर्वाधिक ८ पटक फाइनल खेलेको र ४ पटक जितेको जर्मनी कतारमा जारी विश्वकपमा भने समूह चरण पार गर्न सकेन।
२. ब्राजिल– ७ पटक
ब्राजिल पेले, रोनाल्डिन्हो, रोनाल्डो, काका, नेइमारजस्ता आक्रमक खेलाडी जन्माएको टोली हो। सर्वाधिक ५ पटक विश्वकप जितेको ब्राजिल समग्रमा ७ पटक फाइनलमा पुगेको छ। यीमध्ये २ पटक भने ब्राजिलले फाइनल गुमाएको छ।
ब्राजिलले सन् १९५८ मा स्विडेनमा भएको विश्वकपमा पहिलोपटक विश्वविजेता बनेको थियो। पेलेप्रेरित ब्राजिलले घरेलु टोली स्विडेनलाई ५–२ को भारी अन्तरले पराजित गर्दै उपाधि जितेको थियो।
त्यसपछि ब्राजिलले लगातार अर्को विश्वकप जित्दै इटालीले १९३४ र ३८ मा बनाएको कीर्तिमान बराबरी गर्यो। १९६२ मा चिलीमा भएको सो विश्वकपमा ब्राजिलले तत्कालीन चेकोस्लाभाकियालाई ३–१ ले हराउँदै उपाधि जितेको थियो।
त्यसपछि ब्राजिलले १९७० मा पनि विश्वकप जित्यो। मेक्सिकोमा भएको उक्त विश्वकपमा इटालीलाई ४–१ ले पाखा लगाउँदै ब्राजिलले तेस्रोपटक विश्वकप जितेको थियो। यो विश्वकप जितेसँगै पेले १९५८, ६२ र ७० मा गरी ३ पटक विश्वकप जित्ने १ मात्र विजेता बने। त्यो अहिले पनि कायम छ।
ब्राजिलले १९९४ मा अमेरिकाका भएको विश्वकप पनि जित्यो। इटालीलाई टाइब्रेकरमा ३–२ ले हराउँदै ब्राजिलले विश्वकपको चौथो उपाधि हात पारेको थियो। टाइब्रेकरअघि यी २ टोलीबीचको खेल गोलरहित बराबरीमा सकिएको थियो।
यसपछि ब्राजिलले पाँचौ विश्वकप जित्न धेरै समय लगाएन। मात्र ८ वर्षपछि दक्षिण कोरिया र जापानमा भएको विश्वकपको उपाधि ब्राजिजले नै हात पार्यो। २००२ मा जापानमा भएको उक्त फाइनलमा रोनाल्डोप्रेरित ब्राजिलले जर्मनीलाई २–० गोल अन्तरले हराउँदै उपाधि जितेको थियो। त्यसयता ब्राजिलले विश्वकप जित्न सकेको छैन। कतारमा जारी विश्वकपमा पनि नेइमारप्रेरित ब्राजिल क्वार्टरफाइनलबाटै बाहिरिएको छ।
यसैगरी, ब्राजिल १९५० र १९९८ गरी २ पटक विश्वकपको फाइनलमा पराजित भएको छ। १९५० मा घरेलु मैदानमा भएको विश्वकपको अन्तिम खेलमा प्रमुख दाबेदार मानिएको ब्राजिलले उरुग्वेलाई २–१ ले सुम्पिएको थियो। यस्तै, १९९८ मा पनि ब्राजिलले घरेलु टोली फ्रान्सलाई ३–० ले नतिजा सुम्पिएको थियो। ब्राजिलले घरेलु मैदानमा २ पटक विश्वकप खलिसकेको छ। तर, जित्न सकेको छैन।
३. इटाली– ६ पटक
इटालीले ६ पटक विश्वकपको फाइनल खेलेको छ। यसमध्ये ४ पटक जितेको छ। इटालीले १९३४ मा घरेलु मैदानमै भएको विश्वकप पहिलोपटक जितेको थियो। सो विश्वकपको फाइनलमा तत्कालीन चेकोस्लोभाकियालाई २–१ ले हराउँदै इटालीले विश्वकप उपाधिको खाता खोलेको थियो। त्यसपछि इटालीले लगातार अर्को विश्वकप जित्यो। १९३८ मा फ्रान्समा भएको विश्वकपको फाइनलमा हंगेरीलाई ४–२ ले हराउँदै इटालीले दोस्रो विश्वकप जितेको थियो। इटाली लगातार विश्वकप जित्ने पहिलो राष्ट्र हो।
तेस्रो विश्वकप जित्न भने इटालीले १९८२ सम्म कुनुपर्यो। स्पेनमा भएको उक्त विश्वकपमा इटालीले फाइनलमा पश्चिम जर्मनीलाई ३–१ ले हराउँदै उपाधि जितेको थियो। इटालीले चौथो विश्वकप २००६ मा जित्यो। जर्मनीमा भएको उक्त विश्वकपमा जिनेदिन जिदानको प्रेरणामा रहेको फ्रान्सलाई टाइब्रेकरमा ५–३ ले हराउँदै इटालीले चौथो विश्वकप जितेको थियो। यसअघि निर्धारित समय १–१ को बरारबीमा सकिएपछि खेल टाइब्रेकरमा गएको थियो।
यस्तै, इटाली २ पटक विश्वकपको फाइनलमा हारेको छ। संयोगवश दुवैपटक ब्राजिलसँग नै हारेको छ। १९७० मा मेक्सिकोमा भएको विश्वकपको फाइनलमा इटाली ब्राजिलसँग ४–१ ले पराजित भएको थियो। यस्तै, सन् १९९४ मा अमेरिकामा भएको विश्वकपका इटाली ब्राजिलसँग टाइब्रेकरमा पराजित भएको थियो। टाइब्रेकरअघि खेल गोलरहित बराबरीमा सकिएको थियो।
अन्तर्राष्ट्रिय फुटबलको सदाबहार शक्ति मानिएको इटाली पछिल्ला २ वटा विश्वकपमा भने छनोट हुन सकेन। २०१८ मा रुसमा र अहिले कतारमा इटाली छनोट हुन नसकेको हो।
४. अर्जेन्टिना– ६ पटक
कतारमा जारी विश्वकपको सेमिफाइनलमा क्रोएसियालाई ३–० ले हराउँदै लियाेनल मेसीप्रेरित अर्जेन्टिना फाइनलमा पुगेको छ। आइतबार अर्जेन्टिनाले छौटौँपटक विश्वकपको फाइनल खेल्दैछ । यसअघि खेलेका ५ मध्ये ३ फाइनल अर्जेन्टिनाले गुमाएको छ भने २ पटक विश्वकप जितेको छ।
अर्जेन्टिनाले १९७८ मा घरेलु मैदानमा भएको विश्वकप पहिलोपटक जितेको थियो। नेदरल्याण्ड्सलाई ३–१ ले हराउँदै अर्जेन्टिनाले उपाधि जितेको थियो। त्यसपछि अर्जेन्टिनाले ८ वर्षपछि नै अर्को विश्वकप जित्यो। १९८६ मा मेक्सिकोमा भएको उक्त विश्वकपमा डिएगो म्याराडोनाप्रेरित अर्जेन्टिनाले पश्चिम जर्मनीलाई ३–२ ले हराउँदै उपाधि जितेको थियो।
यसअघि, १९३० मा भएको पहिलो विश्वकपको फाइनल अर्जेन्टिनाले गुमाएको थियो। अर्जेन्टिनाले घरेलु टोली उरुग्वेलाई ४–२ ले नतिजा सुम्पिएको थियो। त्यसपछि १९९० मा म्याराडोना नेतृत्वको अर्जेन्टिना फाइनलमा पश्चिम जर्मनीसँग १–० ले पराजित भएको थियो।
त्यसपछि अर्जेन्टिनाले फाइनल खेल्न २८ वर्ष कुर्नुपर्यो। मेसी नेतृत्वको अर्जेन्टिना २०१४ मा ब्राजिलमा भएको विश्वकपको फाइनलमा पुग्यो। तर, जर्मनीसँग १–० ले पराजित हुन पुग्यो। अहिले पुनः मेसीप्रेरित अर्जेन्टिना फाइनलमा पुगेको छ। तेस्रो उपाधिको खोजीमा छ। त्यसका लागि उसले आइतबार फ्रान्सलाई हराउनुपर्ने छ।
५. फ्रान्स– ४ पटक
फ्रान्स कतारमा जारी विश्वकपको फाइनलमा पुगेको छ। अब फ्रान्सले उपाधि भिडन्तका लागि अर्जेन्टिनासँग आइतबार प्रतिस्पर्धा गर्नेछ। यससँगै फ्रान्स विश्वकपको फाइनलमा चौथोपटक पुगेको हो। २ पटक उपाधि जितेको छ। फ्रान्सले १९९८ मा घरमै भएको विश्वकपको उपाधि पहिलोपटक जितेको थियो। सो विश्वकपमा प्रमुख दाबेदार मानिएको ब्राजिललाई ३–० को भारी अन्तरले हराउँदै जिदानप्रेरित फ्रान्सले उपाधि जितेको थियो।
त्यसपछि फ्रान्स २००६ मा फाइनलमा पुगेको थियो। तर, इटालीसँग टाइब्रेकरमा ५–३ ले पराजित भएको थियो। यसअघिको निर्धारित समय १–१ को बराबरीमा सकिएको थियो।
अघिल्लो विश्वकपको फाइनलमा स्थान बनाएको फ्रान्सले उपाधि नै जित्यो। २०१८ रुसमा भएको उक्त विश्वकपमा क्रोएसियालाई ४–२ ले हराउँदै फ्रान्सले आफ्नो दोस्रो उपाधि जितेको थियो। अब आइतबार फ्रान्स अर्जेन्टिनालाई हराउँदै तेस्रो विश्वकप जित्ने लक्ष्यमा हुनेछ।
६. नेदरल्याण्ड्स– ३ पटक
नेदरल्याण्ड्स यस्तो अभागी देश हो, जसले ३ पटक फाइनल खेलेर पनि उपाधि जित्न सकेको छैन। नेदरल्याण्ड्सले पहिलो फाइनल सन् १९७४ मा घरेलु टोली पश्चिम जर्मनीविरुद्ध खेलेको थियो। तर, २–१ ले परातित हुँदै उपाधि गुमायो। त्यसपछि नेदरल्याण्ड्स लगातार फाइनलमा पुग्यो। १९७८ मा भएको फाइनलमा पनि उसले घरेलु टोली अर्जेन्टिनालाई ३–१ ले नतिजा सुम्पियो।
नेदरल्याण्ड्स ३२ वर्षपछि पुनः २०१० मा फाइनलमा पुग्यो। तर, स्पेनसँग १–० ले पराजित हुँदै उपाधिबाट बञ्चित भयो। जारी विश्वकपमा डच टोली क्वार्टरफाइनलबाटै बाहिरिएको छ।
यसैगरी, उरुग्वेले २ पटक फाइनलमा पुगेर दुवैपटक उपाधि जितेको छ। चेकोस्लाभाकिया र हंगेरी २ पटक फाइनलमा पुगेर पराजित भएका छन्।
यस्तै, समान १ पटक फाइनलमा पुगेका इंग्ल्याण्ड र स्पेनले पहिलो प्रयासमै उपाधि जितेका छन्। स्विडेन र क्रोएसिया समान १ पटक फाइनल खेलेर पराजित भएका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
![Nepal Live Samachar नेपाल लाइभ समाचार, जेठ २९ [भिडियाे]](https://nepallive.net/uploads/posts/500X300/samachar++-299-1718118150.jpg)
![Nepal Live Samachar नेपाल लाइभ समाचार, जेठ २७ [भिडियाे]](https://nepallive.net/uploads/posts/500X300/samachar++-1717941479.jpg)
