फुटबल

राजनीतिक उपनिवेशको फुटबलमार्फत बदला लिने मोरक्कोको मनसाय, लगातार फाइनलमा पुग्ने फ्रान्सको अभियान

दीपेन्द्र सापकोटा बुधबार, मंसिर २८, २०७९ १५:४०

काठमाडौं– कतारमा जारी विश्वकप फुटबलको फाइनल प्रवेशका लागि बुधबार मध्यराति फ्रान्स र मोरक्को भिड्दैछन्।

दुई पटकको विश्व विजेता फ्रान्स ‘डिफेन्डिङ च्याम्पियन’ पनि हो। यता, मोरक्कोले भने समूह चरणबाटै अप्रत्यासित नतिजा निकाल्दै सेमिफाइनलमा स्थान बनाएको छ। मोरक्को अफ्रिका महादेशबाट विश्वकपको सेमिफाइनलमा पुग्ने पहिलो देश बनेको छ।

फ्रान्स र मोरक्को फुटबलका ठूला प्रतियोगितामा यसअघि खासै प्रमुख प्रतिद्धन्द्धी रहेका थिएनन्। यसकारण यी दुई देशका खेलाडी एक–अर्काविरुद्ध मैदानमा उत्रँदा फुटबलभन्दा बढी पुरानो राजनीतिक इतिहास सम्झिने सम्भावना छ।

युरोपेली देश फ्रान्सले उत्तरी अफ्रिकी देश मोरक्कोलाई सन् १९१२ देखि ५६ सम्म ४४ वर्ष उपनिवेश बनाएको थियो।

फ्रान्सको उपनिवेश हुँदा ताकाको मेरक्कोको झण्डा। जहाँ फ्रान्सको झण्डा पनि समावेश गरिएको थियो।

यसैकारण अहिले पनि फ्रेन्च भाषा बोलिन्छ। अपनिवेशकै प्रभावका कारण अझै पनि धेरै मोरक्कन फ्रान्समा रोजगारी गर्छन्। फ्रान्सका एकजना खेलाडी मोरक्को मूलका छन् भने मोरक्कोका कतिपय खेलाडी फ्रान्समा जन्मिएका छन्।

उपनिवेशबाट मुक्त देश हुनको नाताले मोरक्कोमा राष्ट्रियताको भावना उच्च देखिन्छ। पहिलो आफूलाई उपनिवेश बनाएको स्पेनलाई प्रि–क्वार्टरफाइनलमा जित्दा पनि मोरक्कन जनताले यो झल्को दिलाएका थिए। जितपछि खेलाडीले मनाएको खुसीयालीमा पनि त्यसको झल्को आउँथ्यो।

यसर्थ, आज राति फ्रान्सविरुद्ध उत्रँदा मोरक्कोका खेलाडीले पनि राजनीतिक उपनिवेश स्मरण गर्दै बदलाको भावनास्परूप खेल्ने विश्लेषण गरिएको छ। यदि, आज फ्रान्सलाई हराएर पहिलोपटक फाइनलमा स्थान बनाएको खण्डमा उपनिवेशको ऋण चुक्ता हुने धेरै मोरक्कन जनताको दृष्टिकोण छ।

सन् २०१८ मा रुसमा भएको विश्वकपको फाइनलमा क्रोएसियालाई हराएर उपाधि जितेको फ्रान्स लगातार दोस्रोपटक फाइनलमा पुग्न चाहन्छ। यसर्थ, फ्रान्स आज राति मोरक्कोविरुद्ध ९० मिनेटमा नतिजा निकाल्ने दाउमा हुनेछ।

अर्कोतिर ‘अण्डरडग’ मानिएको मोरक्को फ्रान्सका आक्रमण रोक्दै प्रत्याक्रमण गर्न चाहन्छ। मोरक्कोको ध्यान निर्धारित र अतिरिक्त समयमा कम्तीमा बराबरी गरेर टाइब्रेकरमा भए पनि फ्रान्सलाई हराउँदै फाइनलमा पुग्ने रहेको फुटबलका अधिकांश पण्डितहरूले बताइरहेका छन्। कतिपयले भने मोरक्कोले सुरुवाती आक्रमण गरेर एक गोल नकालेपछि रक्षात्मक खेलेर फ्रान्सलाई ९० मिनेटमै हराउन सक्ने आकलनसमेत गरेका छन्।

उपनिवेशमुक्त भएपछिको मोरक्कोको झण्डा।

फ्रान्स र मोरक्कोबीच विश्वकपमा पहिलोपटक भेट हुन लागेको हो। यी दुई टोलीबीच, मेडिटोरियन गेम, फोर नेसन्स टुर्नामेन्टलगायत साना प्रतियोगितामा मात्र भेट भएको छ।

यी दुई टोलीबीच हालसम्म आठ पटक भेट भएकोका फ्रान्स हाबी छ। फ्रान्सले पाँच पटक जित्दा मोरक्कोले दुई पटकमात्र नतिजा आफ्नो नाममा लेखाएको छ। यी दुई टोलीबीचको एक खेल भने बरारबरीमा सकिएको छ।

फ्रान्सले मोरक्कोविरुद्ध १३ गोल गर्दा मोरक्कोले सात गोलमात्र फर्काएको छ। यसरी हेर्दा विगतमा मोरक्कोमाथि फ्रान्स हाबी देखिन्छ। अहिले पनि स्टार खेलाडीले भरिएको फ्रान्सलाई विश्वकपको प्रमुख दाबेदार मानिएको छ।

फ्रान्स र मोरक्कोको विजेताले उपाधि भिडन्तका लागि फाइनलमा लियोनल मेसीको कप्तानीमा रहेको अर्जेन्टिनासँग आइतबार प्रतिस्पर्धा गर्नेछ।