बाबुलाई हराउनेलाई नै हराएर सांसद बने छोरो योगेश गौचन

राजनीति

ईश्वर बराल सोमबार, मंसिर ५, २०७९ १३:०९

काठमाडौं– आइतबार सम्पन्न प्रतिनिधि सभा निर्वाचनमा पहिलो निर्वाचित हुने सांसद बने मुस्ताङका योगेश गौचन थकाली। २९ वर्षे गौचन मुस्ताङ कांग्रेसका सभापति रोमी गौचन थकालीका छोरा हुन्। नेपाली कांग्रेसको केन्द्रीय समितिले रोमीलाई उम्मेदवार बनाएर टिकट पठाएको थियो। तर रोमीले आफ्नै छोरा योगेशलाई टिकट थमाएर संसदीय राजनीतिमा उतारे।

योगेशले प्रतिस्पर्धा गर्नुपर्ने भयो, अघिल्लो निर्वाचनमा आफ्नै बाबुलाई हराएर सांसद बनेका एमालेका उम्मेदवार प्रेम तुलाचनसँग। विद्यार्थी राजनीतिबाट भर्खर राजनीति सुरु गर्दै गरेका योगेशले एमालेका प्रभावशाली तुलाचनसँगको प्रचिस्पर्धालाई रोचकता साथ हेरिएको थियो।

योगेशको राजनीतिक यात्रा खासै लामो छैन, तर बाबु रोमीको भने लामो छ। रोमीले २०५६ बाट संसदीय राजनीतिमा प्रतिस्पर्धा गरेका थिए। त्यसयताको ४ निर्वाचनमध्ये सरोबर जित हार निकालेका रोमी २०५६ र २०७० को निर्वाचनमा विजयी भएका थिए। २०६४ र २०७४ को निर्वाचनमा भने पराजय बेहोरेका थिए।

योगेशले ४० वर्षदेखिको प्रभाव बनाएका बाबुको राजनीतिक विरासतलाई कायम गर्दै तुलाचनलाई पराजित गरे। योगेशले ३ हजार ९९२ मत प्राप्त गर्दा उनका निकटतम प्रतिद्वन्द्वी एमालेका तुलाचनले ३ हजार ७८ मत मात्र प्राप्त गरे। यो विजयको निर्वाचन आयोगबाट अन्तिम घोषणा हुन भने बाँकी छ।

युवा पुस्ताका योगेशले बाबुको नाममा आएको टिकट लिएर बाबुलाई पराजित गर्ने तुलाचनलाई पराजित गरे। आइतबार सम्पन्न निर्वाचनमा युवा र नयाँ पुस्तातिर रुझान देखिएको थियो। योगेशको पहिलो जितले हिमालपारिको जिल्लाबाट संसदीय राजनीतिमा युवाको उपस्थिति जबरजस्त हुने प्रारम्भिक संकेत गरेको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।