कल्पनालाई आफ्नै उम्मेदवारी चिनाउन हम्मे!

कल्पना घिमिरे आइतबार, कात्तिक २०, २०७९ २१:१०

काठमाडौं– आइतबार बिहान टेकुस्थित रुद्रविनायक मन्दिरमा सत्ता गठबन्धनका कार्यकर्ता भेला भइसकेका थिए। केही समयपछि प्रदेशतर्फ गठबन्धनकी उम्मेदवार नेपाली कांग्रेसकी नानु बास्तोला (शिवाकोटी) आइपुगिन्। उनले मन्दिरमा पूजा–आर्चना गरिन्।

त्यसैबेला पूर्व स्वास्थ्य राज्यमन्त्री तीर्थराम डङ्गोल, कांगेस जिल्ला कमिटी अध्यक्ष भद्र तन्डुकार लगायतका नेताहरुको बाक्लो उपस्थिति भयो। २० मिनेटको बसाइपछि आइपुगिन् प्रतिनिधि सभा उम्मेदवार नेकपा माओवादीकी कल्पना धमला।

कल्पनालाई फूलमाला लगाउँदै पूर्वमन्त्री डङ्गोलले स्वागत गरे। त्यसपछि गठबन्धनको घरदैलो कार्यक्रम अगाडि बढेयो। मन्दिरमा पूजा गर्दै निस्कियो गठबन्धनका कार्यकर्ताको लाम।

सय मिटर पर पुगेपछि त्यो लाम एउटा किराना पसलमा पुगेर अडियो। त्यो पसल थियो आशामाया शाहीको। आशामायासँग परिचय गराउँदै कल्पनाले भनिन्, ‘नमस्कार म गठबन्धनको उम्मेदवार कल्पना धमला। मेरो चुनाव चिह्न गोलाकार भित्रकोे हँसिया हथौडा हो। यसमा भोट हाल्नुहोला।’

आशामायाले हाँस्दै ‘पहिला चिनेको थिइनँ, अहिल आउनुभयो र चिने। हुन्छ भोट तपाईलाई नै हालौँला। कति पुरानालाई मात्र हाल्ने? अब नयाँलाई भोट हालेर हेर्नुपर्छ,’ जवाफ दिइन्। प्रदेशतर्फकी उम्मेदवार नानु बास्तोला पनि आफ्नो परिचय दिँदै भोट मागिन्। त्यसपछि त्यहाँबाट जुलुस अगाडि बढ्यो ।

कल्पनालाई आफ्नो परिचय गराउन हम्मेहम्मे परेको देखिन्थ्याे । मतदातासाग भेट ग¥योे कि आफ्नो परिचय बताउनैपर्ने। किनकी, उनी काठमाडौंमा नयाँ थिइन्। त्यही पनि उनको परिचय गराउन उनका कार्यकर्ताले मनग्य सहयोग गरिरहेका देखिन्थे । ‘हाम्रो लोकतान्त्रिक गठबन्धनको उम्मेदवार कल्पना धमला, उहाँको चुनाव चिह्न गोलाकार भित्रको हसिया हथौडा अब उहाँलाई भोट गरेर जिताउनुपर्छ’ भनेर कार्यकर्ता सिकाउँदै थिए।

काठमाडौंको क्षेत्रमा नयाँ अनुहार भए तापनि उनले यसअघि २०६४ सालमा भएको पहिलो संविधान सभा निर्वाचनमा साविक धादिङ–२ बाट चुनाव जितेकी थिइन्। त्यसपछि उनी २०६८ मा डा बाबुराम भट्टराई नेतृत्वको मन्त्रिपरिषदमा उनी विज्ञान तथा प्रविधि मन्त्री बनेकी थिइन्। २०७० सालको चुनावमा भने पराजित भएकी थिइन्।

भोट माग्ने क्रममा धमलाको टोली ह्युमत टोलमा पुग्यो। त्यहाँ दुर्गा देवीको मन्दिरमा थियो। मच्छरी स्थानीय डङ्गोल पूजा गर्दै थिइन्। उनीसँग ‘म हजुरको उम्मेदवार कल्पना धमला, मलाई आशिर्वाद दिनूस् भन्दै कल्पना पुगिन्। डङ्गोलले ‘जय आशिर्वाद’ भने। कल्पनाले भिजिटिङ कार्ड दिँदै ‘मेरो चुनाव चिह्न यो गोलाकार भित्रको हँसिया हथौडामा भोट हाल्नूस्,’ भनिन्। जवाफमा उनले म अक्षर चिन्दिनँ। छोराछोरीले कसलाई हाल भन्छ उसलाई हाल्छु भोट भनिन्।

उमेरले ७० वर्ष पुगेकी उनले थुप्रै पटक भोट हालिन्। तर अरुको सहारामा मात्र भोट हालेको बताइन्। कुन पार्टीभन्दा पनि छोरा–नातिले जसलाई भन्छन् उसैलाई भोट हालन लगाउने गरेकी रहिछन्। ‘मेरो त छोरा नातिले हालिदिन्छ। उनीहरुले जसलाई हाल्छ–हाल्छ,’ उनले भनिन्।

‘भगवानलाई ढोगेर पैसा पनि चढाएर गएछ, जित्छ चुनाव त। हुन त जसले जिते पनि केही गर्ने होइन,’ उनी एक्लै बोलिन्।

केही समय हिँडेपछि ब्रह्म टोल पुगियो। त्यहाँका स्थानीय पनि घरदैलो कार्यक्रमका टोलीलाई झ्यालबाट हेर्दै थिए। त्यही टोलको एउटा घरको सानो ढोकाबाट चियाएर हेर्दै थिए ७० वर्षीया रामशरण महर्जन। उनीसमक्ष हात जोड्दै पुगिहालिन् कल्पना।

‘नमस्ते, म कल्पना धमला। तपाईँहरूको उम्मेदवार। गोलाकार भित्रको हँसिया हथौडामा भोट हालेर मलाई जिताउनुहोला।’ उनले हुन्छ भन्ने जवाफ दिए। साथै उनले कल्पना समक्ष नेताहरुले अरु बेला बेवास्ता गर्ने र भोट माग्ने बेलामा आउने र आश्वासन देखाउने गरेकोप्रति गुनासो पोखे।

टेकु निवासी रमिता सिंह पनि घरदैलो कार्यक्रमको समूहमा मिसिन आइपुगिन्। उनले कल्पनालाई भेटेर शुभकामना दिइन्। ‘हुन त मलाई राजनीति मन पर्दैन। तर म महिला उम्मेदवारको सम्मान गर्छु। म पहिला राजनीतिमा हिँडेकी हुँ। मेरो भाइ कांगे्रस थियो। म राप्रपा हो। २०३६ सालदेखि आन्दोलनमा हिँडेकी थिएँ। मेरो भाइ २०६३ सालमा सहिद भयो। त्यसपछि मलाई राजनीति मन पर्न छाड्यो,’ उनले भनिन्।

कालो दौरा–सुरुवाल, भादगाउँले टोपी सहित नेवारी पोशाकमा सजिएका ७८ वर्षीया महेन्द्र महर्जन पनि गठबन्धनको घरदैलो कार्यक्रममा मिसिन पुगे। उनलाई पनि कल्पनाले परिचय गराइन्। त्यसपछि उनले आफेनो समस्या समाधान गरिदिन आग्रह गरे। भने, ‘अरु कुरा केही पनि होइन। यहाँ पानीको ठूलो समस्या छ। पानी ल्याउने काम गर्नुस्। भोट तपाईँलाई पक्का भो।’ त्यस टोलमा पानीको एकदमै समस्या रहेछ। हप्तामा आउने पानी १० मिनेट जति आएपछि बन्द हुने र पानीको निकै अभाव भएको महर्जनले बताए।

उग्रतारा महर्जन पनि त्यस समूहमा मिसिन पुगिन्। उग्रताराले कल्पनालाई स्वागत गरिन्। र, भनिन् ‘हाम्रो परिवारको तर्फबाट तपाईंलाई ८० मत भो, ढुक्क हुनूस्।’

मतदातालाई मत माग्दा आफ्नो परिचय गराउँदै घरदैलो कार्यक्रमको निश्चित समय सकियो। कल्पना भने जित हुनेमा ढुक्क देखिन्छिन्। गठबन्धनका कार्यकर्ताले पनि जित पक्का भएको बताए।

‘गठबन्धनले जित्छ मात्र होइन, गठबन्धनको सरकार नेता शेरबहादुर देउवाको नेतृत्वमा सरकार बन्छ। म पहिला काठमाडौं कांग्रेसको सभापति थिएँ। त्यतिबेला पनि मैले चुनाव जितेको थिएँ। अहिले पनि यो क्षेत्रमा कांग्रेसले जित्छ,’ पूर्वमन्त्री डङ्गोलले भने।

उम्मेदवार धमलाले पनि आफ्नो जित सुनिश्चित रहेको दावी गरिन्। उनले भनिन्, ‘यस क्षेत्रमा मेरो जित सुनिश्चित छ। एक त गठबन्धन त्यसमाथि हामीले विकास र समृद्धिका मुद्दा उठाएका छौं।’