लन्डन– सत्तारुढ कन्जरभेटिभ पार्टीको सांसद निर्वाचित भएको सात वर्षमै बेलायतको प्रधानमन्त्री नियुक्त भएका ऋषि सुनक कोरोनाभाइरस महामारीका बेला ब्रिटिश अर्थमन्त्री थिए। सन् २०२० फेब्रुअरीमा अर्थमन्त्री बनेको केही सातामै उनले महामारी र लकडाउनका चुनौतीहरू व्यहोर्नु पर्यो।
उनले महामारीमा आम सर्वसाधारण तथा व्यवसायीहरूलाई सघाउन ३५० अर्ब स्टर्लिङ पाउन्ड बराबरको सहायता कार्यक्रम सार्वजनिक गरे। त्यसले उनको व्यक्तिगत लोकप्रियता निक्कै बढ्न पुग्यो ।
तर जून २०२० मा डाउनिङ्ग स्ट्रिटमा लकडाउनका नियम तोडेको भन्दै तत्कालीन प्रधानमन्त्री बोरिस जोनसनसँगै उनी कारबाहीमा परेका थिए।
सुनकका बाबुआमा दुवै पूर्वी अफ्रिकाबाट बेलायत आएका हुन् र दुवै भारतीय मूलका हुन्।
जनरल फिजिसियन बुवा र औषधि पसल सञ्चालन गर्ने आमाका सन्तानका रूपमा उनी सन् १९८० मा बेलायतकाे साउथह्याम्पटनमा जन्मिएका हुन्।
आफ्ना बुवाको सामुदायिक सेवाप्रतिको प्रतिबद्धताबाट आफू प्रेरित भएको सुनक बताउँछन्।
उनले एउटा प्रतिष्ठित विन्चेस्टर कलेजमा र पछि अक्सफोर्ड विश्वविद्यालयमा दर्शन, राजनीति शास्त्र र अर्थशास्त्र पढेका थिए।
अमेरिकास्थित स्ट्यान्डफर्ड युनिभर्सिटीमा एमबीए पढ्दा उनको अक्षता मूर्तिसँग भेट भयो, जो चर्चित भारतीय प्रविधि कम्पनी इन्फोशिसका सह–संस्थापक नारायण मूर्तिकी छोरी हुन्। सन् २००९ मा उनीहरूको विहे भयो, उनीहरूका दुई छोरी छन्।
सन् २००१ देखि २००४ सम्म सुनकले गोल्डम्यान स्याक्स ब्याङ्कमा विश्लेषकका रुपमा काम गरे। उनी बेलायतका सबैभन्दा धनी सांसदहरूमध्ये एक हुन् ।
टरिजा मेको सरकारमा उनी कनिष्ठ मन्त्री बनेका थिए।
जोनसनले उनलाई अर्थ मन्त्रालयमा दोस्रो वरीयतामा रहने चिफ सेक्रेटरी टू द ट्रेजरीमा नियुक्त गरे। र, अन्ततः फेब्रुअरी २०२० मा उनलाई चान्सलर अफ दि एक्सचेकर (अर्थमन्त्री) मा पदोन्नति गरियो।
गएको २०० वर्षयता ब्रिटेनको इतिहासमै सबैभन्दा कम उमेरको प्रधानमन्त्री नियुक्त भएका सुनक हिन्दू धर्मावलम्वी हुन्। अनि, बेलायतको प्रधानमन्त्री बन्ने पहिलो गैर–श्वेत व्यक्ति पनि!
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
