लन्डन – सत्तारुढ कन्जरभेटिभ पार्टीको नेता चुनिएको एक दिनपछि भारतीय मूलका ऋषि सुनक बेलायतको प्रधानमन्त्री नियुक्त भएका छन्।
प्रधानमन्त्री लिज ट्रससँग पराजित भएको दुई महिनामै कन्जरभेटिभ पार्टीका तर्फबाट उनी प्रधानमन्त्री नियुक्त भएका हुन्।
ट्रस बेलायतको इतिहासमै सबैभन्दा कम समय पदमा रहने प्रधानमन्त्री बनेकी छिन्।
गत बिहीबार उनले राजीनामा दिएपछि सुनक, पूर्वप्रधानमन्त्री बोरिस जोनसन तथा पूर्वरक्षा मन्त्री पेनी मर्डन्ट नयाँ प्रधानमन्त्रीको दौडमा थिए। तर पछि जोनसन र मर्डन्ट दुवै कन्जरभेटिभ पार्टीको नेतृत्व दौडबाट बाहिरिएका थिए।
मंगलबार बिहान ४२ वर्षीय सुनकले बकिङ्घम राजदरबारमा राजा चार्ल्स तृतीयलाई भेट गरेका थिए। उक्त भेटमा राजा चार्ल्स तृतीयले उनलाई नयाँ सरकार गठन गर्न आमन्त्रण गरेको बीबीसीले जनाएको छ।
'बेलायत गम्भीर आर्थिक सङ्कटमा'
मंगलबार बिहान स्थानीय समय अनुसार ११:५० बजे मध्य लन्डनमा प्रधानमन्त्रीको कार्यालय, १० डाउनिङ्ग स्ट्रीट, बाहिर उभिएर बोल्दै नवनियुक्त प्रधानमन्त्री ऋषि सुनकले अहिले बेलायतले गम्भीर आर्थिक सङ्कट सामना गरिरहेको खुलासा गरे। तर त्यसको विवरण भने दिएनन्।
उनले आफ्नी पूर्ववर्ती लिज ट्रसले गरेका "केही गल्तीहरू" सुधार्ने काम तत्काल सुरु हुने पनि बताए।
उनले आर्थिक स्थायित्व कायम गर्नु र सरकारमाथि फेरि जनताको विश्वास बहाली गर्नु आफ्नो सरकारको प्राथमिकता हुने बताएका छन्।
ब्रिटेनले दुई अंकको मूल्य वृद्धि, इन्धनको मूल्य वृद्धि, पौण्डको भाउमा गिरावट लगायतका समस्या ब्यहोरिरहेको बेला सुनक प्रधानमन्त्री पदमा नियुक्त भएका हुन्।
बेलायतमा आम चुनाव हुन झण्डै दुई वर्ष बाँकी छ, तर विपक्षी दलहरूले तत्काल चुनाव गराउन माग गरेका छन्।
सुनकले चाहिँ तत्काल आम निर्वाचन गराउने पक्षमा आफु नरहेको बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
