रुपन्देही– गत शुक्रबार सम्मरीमाई गाउँपालिका–५ रोइनिहवामा रहेको माछापुच्छ्रे बैंकको शाखा अगाडि एक हुल मानिस बैंकको बचत भौचर, एटीएमलगायतका कागजातसहित उभिरहेका थिए।
बैंकबाट आफूहरू पीडित भएको, बचत गरेको रकम नै गायब भएको भन्दै उनीहरू न्यायको याचना गरिरहेका थिए। स्थानीयहरू आक्रोशित हुँदै बैंकको शाखा अगाडि पुग्दा कर्मचारी भनेर ढोका बन्द गरेर बाहिरिसकेका थिए। आफूहरूले बचत गरेको रकम नै खातामा नभएको बचतकर्ताहरूको भनाइ थियो।
विश्वास गरेर बैंकमा जम्मा गरेको रकम नै हराउँदा आत्तिएका उनीहरू त्यसमाथि कर्मचारी नै फरार भएपछि भने आक्रोशित भए। उपस्थित स्थानीयले ठगीमा बैंक नै संलग्न भएको आरोप लगाए।
उनीहरूले आफू पीडित भएको दाबी गरेको बैंकको शाखाका व्यवस्थापकीय जिम्मेवारी पाएका व्यक्ति हुन् शिकन्दर ठाकुर। ठाकुरमाथि नै उनीहरूले प्रश्न गर्दै आफूहरूले जम्मा गरेको रकम यथाशीघ्र खातामा उपलब्ध गराउन माग समेत गरेका छन्।
बैंकले ठगी गरेको भनेर बचत रकम फिर्ता गराइदिन अनुरोध गर्दा समेत प्रमुख जिल्ला अधिकारी (सिडिओ) भरतमणि पाण्डे बेखबर भएको उनीहरूको गुनासो छ।
चार वर्षअघि निकै तामझामका साथ माछापुच्छ्रे बैंकले रोइनिहवामा आफ्नो शाखा खोलेको थियो। त्यतिबेला स्थानीय निरन्जन पाठकलाई सेवा सञ्चालन लागि भन्दै अनुमति दिइएको थियो।
1666080884.jpg)
बैंकले ४ वर्षसम्म सेवा त दियो। तर, चार वर्षसम्म स्थानीयलाई झुक्याएर रकम बचत गर्न लगाउँदै गर्दा न बचतकर्तालाई थाहा भयो, न बैंकको माथिल्लो निकायलाई नै।
चार वर्षदेखि बचत गरेको रकम नै गायब हुनुमा शाखाका व्यवस्थापकीय प्रमुख ठाकुर नै जिम्मेवार भएको बचतकर्ताहरूको भनाइ छ।
ठाकुरले एक करोड ५० लाख रुपैयाँ बचत रकम हिनामिना गरेको आरोप लागेको छ। बचत रकम नै खातामा नभएपछि सेवाग्राही भने पीडित बनेका छन्। हातमा बैंकको भौचर छ। भौचरमा माछापुच्छ्रे बैंक रोइनिहवा सेवा केन्द्र भनेर लेखिएको छाप समेत छ, तर खातामा पैसा छैन।
रोइनिहवा निवासी शंकटासुर (५६) शारीरिक रुपमा अस्वस्थ छन्। शंकटासुरले व्यवस्थापकीय प्रमुख ठाकुरमार्फत् बैंकमा खाता खोलेका थिए।
‘मैले ठाकुरलाई बचत गर्न रकम दिएँ। ठाकुरले जम्मा भएको भौचर पनि दिए। आफूलाई आवश्यक परेकाले जम्मा भएको रकम निकाल्न खोजें। ठाकुरले भोलि भोलि भन्दै टारे। पछि थाहा भयो आफूले जम्मा गरेको ६७ हजार त खातामामै रैनछ’, शंकटासुरले नेपाल लाइभसँग भने।
1666080886.jpg)
शंकटासुरमात्रै होइन बैंकबाट पीडित थुप्रै स्थानीय छन्। ५६ वर्षीया अनारकली लोध यस्तै अर्की पात्र हुन्। लोधले छोरीको विवाहका लागि भनेर बैंकमा ५ लाख रुपैयाँ जम्मा गरेकी बताउँदै आएकी छिन्।
‘मैले बैंकबाट बचत रकम निकाल्छु भन्दा एजेन्टले प्राविधिक समस्याका कारण पैसा केही दिन निकाल्न नसक्ने भन्दै आलटाल गर्दै आएका थिए। अहिले आएर थाहा भयो बैंकले ठगेको रहेछ’ लोधले भनिन्।
अहिले पीडितहरू रोइनिहवामा रहेको माछापुच्छ्रे बैंकको शाखा अगाडि सर्वसाधारण भौचर बोकेर दैनिक धाउन थालेका छन्। दैनिक बैंक धाउने अर्की पात्र हुन्, स्थानीय चन्द्रिका लोध। लोधले जम्मा गरेको ३ लाख रुपैयाँको अहिले अत्तोपत्तो छैन।
चन्द्रवती मौर्याको समस्या पनि उस्तै छ। मौर्या दैनिक श्रम गरेर गर्जो टार्दै बाँकी रहेको केही रकम बैंकमा जम्मा गर्दै आएकी थिइन्। उनका श्रीमान अहिले अवस्थ छन्। श्रीमान अस्वस्थ भएपछि बैंकमा जम्मा गरेको १ लाख ५० हजार रुपैयाँ निकालेर उपचार गर्ने निधो उनले गरिन्। रकम निकाल्न जाँदा खाता रित्तै। त्यसपछि उनी छाँगाबाट खसेजस्तै भइन्। ‘बचत रकम नै नभएपछि गहना बेचेर श्रीमानलाई औषधी खुवाइरहेकी छु’ मौर्याले भनिन्।
1666080884.jpg)
बैंकले शाखारहित सेवा दिँदा भौचर भर्न पाउँदैन। तर, स्थानीय एजेन्टले भने धमाधम भौचर भर्दै रकम जम्मा गरेको देखाउँदै पैसा गायब पारिएको आरोप लागेको छ।
निक्षेप संकलन गर्दा अनलाइन इन्ट्री गरेर स्थानीयलाई अनलाइन रकम जम्मा भएको बिल दिनुपर्छ। तर, यहाँ बैंक भौचर भरेर दिइएको छ भने अनलाइन इन्ट्री नै गरिएको छैन। कतिपय स्थानीयलाई भने भौचरसमेत दिइएको छैन।
एजेन्टले स्थानीयसँग भएको एटीएम कार्ड, चेक र भौचर समेत आफैं राख्ने गरेको आरोप समेत लागेको छ। जसकारण कतिपयसँग प्रमाण नै छैन।
अर्कोतर्फ भौचरमा खातावालाको खाता नम्बर नलेखेर एटीएम कार्डको सिरियल नम्बर लेखेर रकम जम्मा भएको भौचरमा छाप लगाउने गरेको समेत खुलेको छ।
आफूहरू ठगिएको भन्दै निवेदन दिँदा समेत नलिएको माछापुच्छ्रे बैंकले भने अनुसन्धान भइरहेको भन्दै पन्छिने गरेको उनीहरूको आरोप छ।
यो प्रकरण बाहिरिएपछि अहिले बैंकले एजेन्टसँगको सम्झौता तोडेको छ भने शाखारहित सेवा बन्द गरेको छ। गत जेठ महिनामा नै शाखारहित बैंकिङ सेवा बन्द गरेको हो।
यता माछापुच्छ्रे बैंकले भने एजेन्ट ठाकुर र व्यवस्थापकीय प्रमुख शिकन्दरका कारण स्थानीय पीडित भएको भन्दै उनीहरूविरुद्ध जिल्ला प्रहरी कार्यालय रुपन्देहीमा उजुरी दिएको जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791822485.png)
-1786602170.png)
