काठमाडौं– सेयर बजार परिसूचक नेपाल स्टक एक्सचेञ्ज (नेप्से)मा आज पनि गिरावट आएको छ।
लगातारको गिरावटसँगै मंगलबार झिनो अंकले बढेको बजार आज पुनः गिरावट आएको हो।
अघिल्लो दिनको तुलनामा आज नेप्से परिसूचक २० अंक घटेको हो। योसँगै आज २५४४ विन्दुमा कायम भएको छ।
सेयर बजारमा गिरावट आएसँगै कारोबार रकम तीन अर्ब ८२ करोडमा खुम्चिएको छ। यसअघि मंगलबार झण्डै साढे तीन अर्ब बराबरको सेयर कारोबार भएको थियो।
४९ कम्पनीको मूल्य बढ्दा १९८ को घट्यो भने ७ को स्थिर रह्यो। उत्पादन बाहेक सबै समूहका सूचक घटेका छन्। उत्पादन समूह ०.२३ प्रतिशत बढ्यो।
त्यस्तै व्यापार समूह सबैभन्दा धेरै २.३५ प्रतिशत घट्यो। बैंकिङ ०.६७, विकास बैंक ०.३०, फाइनान्स ०.७९, होटल तथा पर्यटन ०.१८, हाइड्रोपावर ०.७०, लगानी ०.९९, जीवन बीमा ०.९९, माइक्रोफाइनान्स ०.६९, निर्जीवन बीमा ०.५४ र अन्य समूह १.३३ प्रतिशत घटे।
चार कम्पनीको मूल्य १० प्रतिशत बढेको छ। भूगोल इनर्जी, सागर डिस्टिलरी, बुंगल हाइड्रोपावर र बन्दीपुर केबुलकारको मूल्य १० प्रतिशत बढ्यो। १० प्रतिशत मूल्य बढेका भूगोल इनर्जीबाहेक अरु तीन कम्पनी हालै सूचीकृत भएका नयाँ हुन्।
अपर सोलु हाइड्रो इलेक्ट्रिकको ५.३१, नेपाल माइक्रोइन्स्योरेन्सको ३.७५ प्रतिशत मूल्य बढ्यो।
दरामखोला हाइड्रो इनर्जीको मूल्य सबैभन्दा धेरै ८.७२ प्रतिशत घट्यो। माबिलुङ इनर्जीको ८.२१, मेरो माइक्रोफाइनान्सको ४.५७ प्रतिशत मूल्य घट्यो। आज धेरै कारोबार भएका पाँच कम्पनीमा एनआरएन इन्फ्रास्ट्रक्चर, राधि विद्युत्, साहस ऊर्जा, युनियन हाइड्रोपावर र शिवम् सिमेन्ट रहे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1762935254.png)
