काठमाडौं– सत्तारुढ दल नेपाली कांग्रेसको आन्तरिक विवाद चुलिँदै गएको छ। संस्थापन पक्षले समानुपातिकतर्फको बन्दसूचीमा एकपक्षीय ढंगले उम्मेदवारको नामावली पेस गरेको भन्दै संस्थापन इतर पक्ष चिढिएको थियो।
प्रधानमन्त्री तथा पार्टी सभापति शेरबहादुर देउवा गठबन्धनभित्र प्रतिनिधि सभा र प्रदेश सभाको सिट बाँडफाँटमा लागिरहेका बेला शेखर पक्षले भने कांग्रेसभित्रैबाट आफूलाई ४० प्रतिशत दिनुपर्ने माग गर्दै आएको छ।
समानुपातिक तर्फको बन्दसूची बुझाउँदा नै सभापति देउवाले एकलौटी गरेको भन्दै विरोध मात्र होइन शेखर पक्ष आन्दोलनमै उत्रिएको छ। आन्दोलनकै क्रममा बुधबार शेखर पक्षका नेताले पार्टी कार्यालय सानेपामा धर्ना दिएका थिए।
चियापानमा देखिएको दृश्य
बिहीबार डा शेखर कोइरालाले बत्तिसपुतलीस्थित अनुपम फुडल्यान्डमा दशैं तथा दिपावलीको अवसरमा चियापान कार्यक्रमको आयोजना गरे। उक्त चियापानमा कांग्रेसभित्र संस्थापन पक्षका नेताहरु उपस्थित थिएनन्।
कोइरालाले आयोजना गरेको चियापान कार्यक्रमको शीर्षक नै अघिपछिका भन्दा यसपाली भिन्न थियो। यसपाली चियापानकै नारा ‘पार्टीको आन्तरिक एकता, समान अवसर र न्यायका निम्ति खबरदारी’ राखिएको थियो।
उक्त कार्यक्रममा दशैंको शुभकामना र खुशी बाँड्नुभन्दा पनि कोइराला पक्षका धेरै नेता कार्यकर्ताको गुनासो सुनिन्थे। ‘दशैंकै मुखमा न बसको टिकटको फिक्स छ, न सांसदको’ कार्यक्रममा सहभागी नेताहरु एक आपसमा खासखुस गर्दै थिए।
उक्त खबरदारी कार्यक्रममा सञ्चारमाध्यममा मुख नखोलेका तर पार्टीभित्र दबाब सिर्जना गरिरहेका शेखर कोइराला, कांग्रेस उप–सभापति धनराज गुरुङ, महामन्त्री गगन थापा, सह–महामन्त्री बद्रीप्रसाद पाण्डे, डा मिनेन्द्र रिजाल, चन्द भण्डारी, अर्जुननरसिंह केसी लगायतका नेताहरु देखिए।
कोइरालासहितका नेताहरु अनुपम फुडल्यान्डमा देखा पर्नेबित्तिकै उनीहरु निकटका नेताहरुले घेरिहाले। कार्यक्रममा सहभागीहरु अधिकांश जिल्लास्तरका नेता कार्यकर्ताहरु कोइराला, उपसभापति गुरुङ, महामन्त्री थापा, सहमहामन्त्री पाण्डेलगायतका शीर्ष नेताहरुसँग आफ्नो गुनासो पोखिरहेका थिए। सहभागीहरु भन्दै थिए, ‘दाई जय नेपाल! म ..., हाम्रोमा देउवा दाईले निकै अन्याय गर्नुभयो। तपाईंहरुले यस विषयमा उचित दबाब दिनुपर्यो।’
जवाफमा महामन्त्री थापाले मुन्टो हल्लाउँदै भन्दै थिए,‘अँ म तपाईंलाई चिन्छु, थाहा छ, हामी माथि छलफल गरिरहेका छौं। नआत्तिनुहोस्।’ भीडमा नेताहरुले कार्यकर्तालाई ठ्याक्कै ठम्याउन नसके पनि उनीहरु विचलित नबनुन भनेर चिनेजस्तै आश्वस्त पारिरहेका थिए। कोइराला पक्षका नेता कार्यकर्ताहरु चियापानमा शीर्ष नेताबाट केही आश्वासन आओस् भन्ने चाहिरहेका थिए। तर उनीहरुले कुनै प्रतिक्रिया जनाएनन्।
जिल्ला स्तरका नेता कार्यकर्ताले कोइरालालगायतका शीर्ष नेतासँग फोटो खिचे। अनि हामी बैठक बस्नपर्यो भन्दै त्यहाँ उपस्थित नेता कार्यकर्तासँग बिदाई माग्दै कार्यक्रमस्थलबाट बाहिरिए।
चियापानमा आन्दोलनकै रुप
चियापानमा शीर्ष नेताहरु नबोले पनि उनीहरुले कार्यक्रममा सहभागी जनाउनु नै आन्दोलनप्रतिको ऐक्यवद्धता भएको कांग्रेस नेता भुपेन्द्रजंग शाहीले बताए। ‘हामी बोलिरहेकै छौं। उहाँहरुले पार्टीको शीर्ष नेतृत्वमा बोल्ने हो’, शाहीले भने, ‘आन्दोलनमा शीर्ष नेताहरु किन आउँदैनन् भन्ने सवालको जवाफ नेताहरु चियापानमा आएर पुष्टि गरिसक्नु भएको छ।’
सभापतिले कार्यकर्ताको भावनाको नबुझे विकल्प खोज्ने
त्यस्तै शेखर समूहका नेता गुरुराज घिमिरेले चियापान तथा शुभकामना परम्परा र संस्कृतिलाई निरन्तरता दिने एउटा प्रयास भएको बताए।
पार्टीभित्रको अन्तर संघर्षबारे घिमिरेले भने,‘अन्तरसंघर्ष जारी छ। न्यायोचित अवसरको वितरणका निम्ति हामीले पार्टीलाई भनेका हौं। त्यही अभियान अन्तर्गत नै आज चियापान गरेका हौं। यसको आयोजक हामी हौं। त्यसैले हाम्रो आन्दोलन जारी छ। सभापतिज्यूले सबैलाई मिलाएर लिन्छु भन्ने आश्वासन दिनुभएको छ।’
उनले सभापतिले आश्वासन दिनु सकारात्मक भएको भन्दै माग पूरा नभए आन्दोलनका लागि तीन चरण विनम्रता, विरोध र विद्रोह हुने बताए। उनले सभापतिले अझै पनि कार्यकर्ताको माग सम्बोधनमा बेवास्ता गरे आफ्नो बाटो लिनसकिने चेतावनी दिए।
व्यक्ति–व्यक्तिका विषयमा छलफल गरौं
त्यसैगरि नेता अर्जुननरसिंह केसीले कांग्रेसभित्र रहेका वाद–विवादलाई सम्वादको प्रक्रियाबाट सहमति हुने कुरामा विश्वास दिलाए। ‘शुभकामना आदान–प्रदान भनेको कसैलाई तितो बोल्ने काम नभइ सम्मान, सद्भाव, प्रेम, मित्रता र भातृत्वलाई विकास गर्ने प्रक्रिया हो। समानुपातिकतर्फको उम्मेदवारहरुको विवाद नटुंगिए निर्वाचनमा सहभागी हुँदैनौं,’ नेता केसीले भने, ‘त्यो दुर्भाग्य स्थिति नआओस भन्ने चाहन्छु।’
नेता केसीले सभापतिले देउवाले न्यायपूर्ण तरिकाबाट निर्णय गर्नुपर्नेमा जोड दिए। उनले हिजो देउवा प्रतिपक्षमा रहँदा न्यायका लागि ६०/४० को कुरा गरेको भन्दै आफूहरुले अहिले त्यही कुराको माग गरेको बताए।
उनले भने,‘म के भन्छु भने, योग्य र उपयुक्त पात्र हो भने, व्यक्ति–व्यक्तिका विषयमा छलफल गरौं। त्यो जुनसुकै पक्षको भए पनि कांग्रेस हो। इतिहास भएको, लोकप्रियता कायम गरेको सक्षम, जनप्रिय व्यक्तिलाई छानौं।’
समानुपातिक बन्दसूची सच्याउन देउवा राजी
समानुपातिक बन्द सूचीबारे विवाद चुलिएसँगै पार्टी सभापति शेरबहादुर देउवाले लगातार तीन दिनदेखि पदाधिकारीसँग छलफल गरिरहेका छन्।
सभापति देउवाले समानुपातिकमा भएको त्रुटि सच्याएर शेखर पक्षको माग सम्बोधन गर्ने आश्वासन दिएका छन्।
उक्त विषयमा बिहीबार पनि प्रधानमन्त्री निवास बालुवाटारमा बैठक बसिरहेको छ। कांग्रेसका नेता कार्यकर्ताहरु पनि टिकटको टुंग्गो नलागेसम्म राजधानी नछोड्ने मनस्थितिमा देखिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
