काठमाडौं– नेपाल आर्थिक पत्रकार संघ (नाफिज)ले आफ्नो वार्षिक जर्नल विमोचन गरेको छ। नेपाल राष्ट्र बैंकका डेपुटी गभर्नर बमबहादुर मिश्रको उपस्थितिमा नाफिजले बुधबार आफ्नो वार्षिक जर्नल ‘अर्थचित्र’विमोचन गरेको हो। विमोचित जर्नल आत्मनिर्भर अर्थतन्त्र विषयमा केन्द्रित छ।
बुधबार नै नाफिजले आफ्ना सदस्यलाई महत्त्वपूर्ण पुरस्कारहरु समेत वितरण गरेको छ। शारदा–ढुण्डीराज भट्टराई नाफिज आर्थिक पत्रकारिता पुरस्कार एक जनालाई र सिबिफिन–नाफिज बैंकिङ पत्रकारिता पुरस्कार दुई जनालाई प्रदान गरिएको छ।
आर्थिक पत्रकारितामा सबैभन्दा ठूलो एक लाख रुपैयाँ धनराशीको ‘शारदा–ढुण्डीराज भट्टराई नाफिज आर्थिक पत्रकारिता पुरस्कार’बाट बिजमाण्डु डटकमका खेमराज श्रेष्ठ पुरस्कृत भएका छन् भने ‘सिबिफिन–नाफिज बैंकिङ पत्रकारिता पुरस्कार (५० हजार राशी)’ बाट बाह्रखरी डटकमका विजय पराजुली (हाल अनलाइनखबर डटकममा कार्यरत) र टक्सार म्यागेजिनका अनुप आचार्य पुरस्कृत भएका छन्। उनीहरुलाई नगद र पुरस्कारसँगै प्रमाणपत्र पनि वितरण गरिएको छ।
जर्नल विमोचन तथा पुरस्कार वितरण समारोहमा डेपुटी गर्भनर मिश्रले पत्रकारिता पेसा आफैंमा जटिल रहेको बताए। विशेष गरी आर्थिक पत्रकारिता थप जटिल हुनसक्ने उनको धारणा छ।
‘धेरैले मिडिया सम्बन्धी विषय पढेर आएका हुन्छन्, पेसामा आएपछि थप विषय जानकारी लिनुपर्ने देखिन्छ’, उनले भने, ‘त्यो विषय पनि सबैले बुझ्ने गरी सम्प्रेषण गर्नु आफैंमा चुनौति देखिन्छ।’
कार्यक्रममा नेपाल चेम्बर अफ कमर्सका अध्यक्ष राजेन्द्र मल्लले नाफिजसँग जोडिएर आर्थिक पत्रकारलाई थप दुई पुरस्कार दिने घोषणा समेत गरेका छन्। नेपाल निर्जीवन बीमा व्यवसायी संघले स्रोत जुटाई एउटा कृषि र अर्को बीमा सम्बधी पुरस्कार दिने घोषणा गरेका हुन्। दुई पुरस्कारको धनराशी ५०/५० हजारको हुने पनि उनले घोषणा गरे।
बैंक तथा वित्तिय संस्था परिसंघ नेपाल (सिबिफिन)का अध्यक्ष तथा पुरस्कारका ट्रष्टी पवनकुमार गोल्यानले नेपालमा अब आर्थिक क्रान्तिको कुरा हुनुपर्ने र सोही अनुसारको मुद्दा उठ्नु पर्ने बताए।
उनले नेपालमा धेरै खालका क्रान्तिहरु भइसकेको भन्दै अब आर्थिक क्रान्ति हुनपर्ने र त्यसको दायित्व मिडियाको समेत रहेको बताए।
बैंक तथा बीमा विज्ञसमेत रहेका अर्का पुरस्कार ट्रष्टी तथा महालक्ष्मी लाइफ इन्स्योरेन्सका प्रमुख कार्यकारी अधिकृत रमेश कुमार भट्टराईले पत्रकारिता गहिराइमा हुनपर्ने बताए। उनले आफू पनि कुनै समयको पत्रकार नै रहेको स्मरण गर्दै कुनै सूचना सम्पेषण गर्नु मात्रै पत्रकारको जिम्मेवारी नरहेको बताए।
नेपाल घरेलु तथा साना उद्योग महासंघका अध्यक्ष उमेशकुमार सिंहले उद्योगी व्यवसायीले गलत गरेको खण्डमा झकझक्याउने काम हुने गरेको भन्दै त्यसले व्यवसयीलाई राम्रो समेत हुने गरेको बताए।‘मिडियाका कारण सच्चिने मौका मिल्छ’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
