काठमाडौं– अहिले जनता समाजवादी पार्टीका संयोजक रहेका हृदयेश त्रिपाठी तीन फरक–फरक पार्टीबाट ५ पटक संसद् पुगिसकेका छन्। चर्चित, सक्रिय र वाकपटु नेता त्रिपाठी ५ पटक मन्त्रीसमेत भइसकेका छन्।
विद्यार्थी राजनीतिबाट आफ्नो यात्रा सुरु गरेका त्रिपाठी कुनै बेला प्रतिबन्धित नेपाल कम्युनिस्ट पार्टी (रायमाझी)को केन्द्रीय सदस्यसमेत थिए। उनको परिचयको फैलावट भने मधेश केन्द्रित दल नेपाल सद्भावना पार्टीबाट भएको पाइन्छ। सोही पार्टीबाट उनले संसदीय यात्रा सुरु गरेका थिए।
त्रिपाठी लगातार नवलपरासीबाट निर्वाचित हुँदै आएका छन्। २०४८ सालमा नवलपरासी- ३ मा नेपाल सद्भावना पार्टीका उम्मेदवार बनेका उनले कांग्रेस उम्मेदवार नन्दलाल मिश्र र एमाले उम्मेदवार शान्ता मानवीलाई पराजित गरेका थिए। त्यतिबेला त्रिपाठीले १६ हजार ७०७, मिश्रले १० हजार ४५६ र मानवीले ६ हजार ४६५ मत पाएका थिए।
२०५१ मा पनि त्रिपाठी सोही क्षेत्रबाट उम्मेदवार बने। त्यतिबेला उनले १५ हजार २९७ मत पाए। निकटतम प्रतिस्पर्धी बन्न आइपुगे, कांग्रेसका त्रियुगी नारायण थारु चौधरी। उनले ११ हजार ७२९ मत पाए। राप्रपा र एमाले उम्मेदवार क्रमशः तेस्रो र चौथो भए।
२०५६ मा पनि त्रिपाठी नवलपरासी- ३ बाटै निर्वाचित भए। उनले १८ हजार १३३ मत पाएका थिए। निकटतम प्रतिस्पर्धीहरु कांग्रेसका त्रियुगी नारायण थारु चौधरीले १७ हजार ३४९ र एमालेका रामलखन चमारले ८ हजार ९८६ मत पाएका थिए।
२०६४ को पहिलो निर्वाचनअघि विभिन्न पार्टीका मधेसी नेताहरुले मिलेर तराई मधेश लोकतान्त्रिक पार्टी गठन गरेका थिए। त्रिपाठी पनि सोही पार्टीमा लागे। सोही पार्टीबाट संविधान सभा सदस्यमा निर्वाचित भए। २०६४ चैत २८ मा सम्पन्न निर्वाचनमा उनी नवलपरासी- ६ बाट निर्वाचित भएका थिए।
त्यतिबेला उनले १० हजार २९ मत पाएका थिए। उनका प्रतिस्पर्धी कांग्रेस उम्मेदवार देवकरन कलवारले ९ हजार ८५६ र नेकपा माओवादीका रोहित प्रसाद केवटले ५ हजार ७४९ मत पाएका थिए।
२०७० मा भने त्रिपाठी पराजित भए। नवलपरासी- ६ बाटै उम्मेदवार बनेका उनी कांग्रेस उम्मेदवार देवकरन कलवारसँग पराजित भएका थिए। कलवारले १४ हजार ५८० मत पाउँदा त्रिपाठीले ८ हजार ४२४ मत पाएका थिए।
२०७४ वैशाखमा ६ वटा मधेस केन्द्रित दल मिलेर राष्ट्रिय जनता पार्टी गठन गरियो। त्रिपाठी पनि केही समय त्यही पार्टीमा लागे तर पछि अलग्गिए। २०७४ मंसिरमा सम्पन्न प्रतिनिधि सभा निर्वाचनमा उनले एमालेको चुनाव चिह्न सूर्य लिएर प्रतिस्पर्धा गरे।
नवलपरासी पश्चिम- १ बाट उम्मेदवार बनेका त्रिपाठी ३८ हजार ५९२ मतका साथ निर्वाचित भएका थिए। उनले कांग्रेस उम्मेदवार देवकरन कलवारलाई नै पराजित गरेका थिए। उनले ३३ हजार ५९१ मत पाएका थिए।
२०४८ पछिका एउटाबाहेक सबै संसद्/संविधान सभामा पुगेका त्रिपाठी पाँचपटक मन्त्रीसमेत भइसकेका छन्। उनी लोकेन्द्रबहादुर चन्द, सूर्यबहादुर थापा, गिरिजाप्रसाद कोइराला, डा बाबुराम भट्टराई र केपी शर्मा ओली नेतृत्वको मन्त्रिपरिषद्मा विभिन्न जिम्मेवारीका साथ मन्त्री भएका छन्।
[समानुपातिक प्रणालीबाट पटकपटक सांसद बन्नेहरुको जति चर्चा हुन्छ, प्रत्यक्षतर्फ सांसद बन्नेहरुको खासै हुँदैन। हुन त, व्यक्तिगत रुपमै लोकप्रिय नेता जनताबाट प्रत्यक्षरुपमा जति पटक अनुमोदन भए पनि के फरक पर्छ र? भन्ने बहस पनि हुने गरेको छ, तर दुवै प्रणालीबाट निर्वाचित हुनेहरु पार्टीगत लोकप्रियता भन्दा धेरै पर भने नहुने स्पष्टै छ। प्रत्यक्ष प्रणालीबाट एउटै व्यक्ति कति पटक सांसद बन्ने? यही बहसलाई सघाउ पुगोस् भनेर यो शृंखला सुरु गरेका छौँ। यसअन्तर्गत हामी २०४८ मै सांसद भइसकेका र अहिले पनि सांसद बन्ने प्रयत्नमा रहेका नेताहरुको विषयमा चर्चा गर्नेछौँ]
यो श्रृङ्खलाका अन्य सामग्री:
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
