काठमाडौं- एमाले उपमहासचिव प्रदिप ज्ञवाली र कांग्रेस नेता चन्द्र भण्डारी संसदीय राजनीतिका पुराना प्रतिद्वन्द्वी हुन्। आगामी ४ मंसिरमा हुने प्रतिनिधि सभा निर्वाचनमा पनि यी दुई नेताबीच प्रतिस्पर्धा हुँदैछ।
२०६४ मा भएको पहिलो संविधान सभा निर्वाचनबाट भण्डारी र ज्ञवाली चुनावी लडाइँ लडिरहेका छन्। उनीहरु गुल्मी- मा प्रतिस्पर्धा गर्दैछन्।
२०६४ यता भएका ३ निर्वाचनमा ज्ञवालीले २ जित र भण्डारीले १ जित निकालेका छन्। आसन्न निर्वाचनमा ज्ञवाली ‘ह्याट्रिक’ गर्ने योजनामा छन्। यद्यपि, ज्ञवाली २०५६ को निर्वाचनबाटै संसदीय राजनीतिमा प्रवेश गरिसकेका नेता हुन्। उता, भण्डारी ज्ञवालीसँगको प्रतिस्पर्धामा दोस्रो जित निकालेर बराबरी गर्ने भण्डारीको दाउ छ।
आसन्न निर्वाचनको परिदृश्यबारे चर्चा गर्दा ज्ञवाली र भण्डारीले स्थानीय राजनीतिदेखि केन्द्रको राजनीतिसम्म खेलेको भूमिका र वैशाखमा सम्पन्न स्थानीय तह निर्वाचनमा दलहरूले प्राप्त गरेको मतलाई विश्लेषण गर्नु आवश्यक हुन्छ।
भण्डारीसँग प्रतिस्पर्धा गरिरहेका ज्ञवाली
ज्ञवाली २०५६ देखि गुल्मीमा चुनाव लडिरहेका छन्। सो निर्वाचनमा ज्ञवाली २४ हजार ३४५ मत ल्याएर विजयी हुँदा उनका प्रतिद्वन्द्वी कांग्रेसका चन्द्रबहादुर केसीले २३ हजार ६६९ मत प्राप्त गरेका थिए।
यस्तै, २०६४ मा भएको पहिलो संविधान सभा निर्वाचनमा ज्ञवालीको प्रतिस्पर्धा चन्द्र भण्डारीसँग भयो। ज्ञवालीले २३ हजार २५३ मत ल्याउँदा भण्डारीले २१ हजार १०१ मत पाएका थिए।
यता, २०७० को दोस्रो संविधान सभाको निर्वाचनमा भण्डारीले ज्ञवालीसँगको हार उल्ट्याएका थिए। ज्ञवालीले १८ हजार ६८१ मत ल्याउँदा भण्डारी २१ हजार १८९ मतसहित विजयी भए।
२०७४ को प्रतिनिधि सभा निर्वाचनमा भने ज्ञवाली विजयी भए। तत्कालीन बाम-गठबन्धनका उम्मेदवार ज्ञवालीले ३७ हजार ८१४ मत ल्याउँदा भण्डारीले ३० हजार २५६ मत ल्याएका थिए।
बौद्धिक छवि बनाएका नेता
ज्ञवाली र भण्डारी पार्टी तथा सार्वजनिक वृत्तमा अध्ययनशील तथा बौद्धिक छवि बनाएका नेतामा गनिन्छन्।
ज्ञवाली गुल्मी भूगोलबाट जिल्ला हुँदै केन्द्रीय राजनीतिमा आएका नेता हुन्। उनी हाल एमालेका उपमहासचिव हुन्। तर उनी केन्द्रमा आएपछि जिल्लाका काममा भने बेवास्ता गर्न थालेको जानकारहरू बताउँछन्।
बारम्बार मन्त्री बनेर लाभ लिएका ज्ञवालीले जिल्लाको विकास लगायतका काम खासै गर्न नसकेको बताउँछन् उनकै जिल्लाका मतदाता।
त्यसो त, पछिल्लो समय केन्द्रीय नेतृत्वको बचाउमा व्यस्त ज्ञवाली त्यसै पनि आलोचित बनेका छन्।
लाभको पदमा नरहेका भण्डारी
नेपाल विद्यार्थी संघका महामन्त्रीसम्म बनेका भण्डारी एक पटक सांसद बन्नु बाहेक अन्य समय पार्टी राजनीतिमै व्यस्त छन्। कांग्रेसको पछिल्लो महाअधिवेशनमा उपसभापतिका प्रतिस्पर्धी रहेका भण्डारीले पराजय बेहोरेका थिए।
एक पटक सांसद बन्नु बाहेक लाभको पदमा नपुगेका भण्डारीलाई जनतासँग मत माग्न ज्ञवालीको तुलनामा सहज देखिने उनी निकटको दाबी छ।
गठबन्धनले बलिया बनेका भण्डारी
सत्ता गठबन्धनका उम्मेदवार भण्डारीलाई जितका लागि केही सहज देखिन्छ। यसका लागि वैशाखमा सम्पन्न स्थानीय तह निर्वाचनमा यो क्षेत्रमा दलहरूका वडाध्यक्षले प्राप्त गरेको मतलाई लिन सकिन्छ।
गुल्मी- २ मा कालिगण्डकी गाउँपालिका, सत्यवती गाउँपालिका, रुरु गाउँपालिका, छत्रकोट गाउँपालिका, गुल्मी दरबार गाउँपालिका,चन्द्रकोट गाउँपालिका र रेसुङ्गा नगरपालिकाका वडा नम्बर ७,८,९,१०,११,१२,१३,१४ पर्छन्।
स्थानीय तहको निर्वाचनमा यो क्षेत्रबाट एमाले वडाध्यक्षका उम्मेदवारले ३५ हजार ७०१ मत, कांग्रेसका उम्मेदवारले ३१ हजार २९४ मत, माओवादी केन्द्रका उम्मेदवारले ४ हजार ९७० मत, एकीकृत समाजवादीका उम्मेदवारले ४९७ मत, राष्ट्रिय जनमोर्चा, राप्रपा लगायत अन्य दल तथा स्वतन्त्र उम्मेदवारले करिब ३ हजार मत पाएका छन्।
तर, गठबन्धनका वडाध्यक्ष उम्मेदवारले प्राप्त गरेको मत एमाले वडाध्यक्ष उम्मेदवारको भन्दा झिनो मतले मात्र अघि छ। त्यसकारण, भण्डारी र ज्ञवालीबीचको जितको आकलन गर्न भने उनीहरूले यो क्षेत्रमा गरेको योगदान, व्यक्तिगत छवि र राजनीतिक समीकरणले प्रभाव पार्ने देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
